《《六國論》粵譯 （林非）》

戰國六國亡國，唔係因為武備落後，打仗唔掂，而係因為想買通秦國。買通秦國買到自己無晒實力，咪死路一條囉。有人話「六國全部玩完，都係因為想買通秦國咩？」計我話「唔買通嘅係被想買通秦國嘅國家拖累呀，因為無咗盟友互相照應，又點可以獨善其身喎。因為我話係衰在『買通秦國』呀！」
　
秦國除咗攻城掠地攞到領土外，閒閒地都拎個「邑」，有時甚至得到成個城。比較之下，秦國由六國到拎返唻嘅領土，同佢哋真係用軍隊打仗贏返唻嘅領土比，大小相差簡直有一百倍咁多。咁班諸候因為想買通秦國而割出去嘅領土，同佢哋真係打敗仗而失去嘅領土，比例上亦係一比一百咁多。咁你睇到，秦國最想要嘅嘢、諸候最大鑊嘅事，根本就唔係打仗。
　
諗吓你哋伯爺，冒住風霜雨露，披荊斬棘，先得嗰丁屎咁多嘅領土。啲子孫唔愛惜，郁啲就話送畀人，當係草一樣。今日割五城，聽日又割十城，然後先得一晚好瞓。起身一睇，秦兵又殺到。但係諸候嘅領土係有限，而暴秦嘅欲望係無窮無盡，割得越多，佢就越中意打你，因為一打你就有城雙手奉上喎。咁仗都未正式打，強弱勝負已經好明顯啦，搞到亡國，根本就好正常。古代人話：「用割地和同秦國交往，好似抱住木柴去救火咁，柴唔燒晒，火係唔會熄。」呢句說話真係講得好中。
　
喂阿哥，咁齊國人從來都未試過割地畀秦國吖，最後都係步上五國後塵覆滅，又點解呢？因為佢哋幫秦王贏政都唔幫五國囉。五國收晒皮，齊國咪又係不能倖免。燕國同趙國嘅君主，開頭都叫做有啲遠見，守得住唔割地畀秦國。咪就係因為咁，燕國雖然係小國，但好後先滅亡，呢啲咪就係勇武抗秦嘅奇效囉。一路係去到燕丹請咗荊軻去刺秦王，先至大鑊之嘛。趙國曾經同秦國交戰五次，輸兩次贏三次，後來秦國又去打趙國，趙國嘅李牧打退咗秦軍好多次添啦。一直到李牧因為有人打佢小報告而被殺，先搞到邯鄲變成秦國嘅一個郡之嘛，可惜趙國勇武抗秦有頭無尾呀。再講吖，燕國同趙國處於當時嘅處境，係秦國已經將其他國家滅得七七八八嗰時，佢哋嘅處境可以話係無人無物，打輸仗而滅國，你估佢哋想嘅咩。假如當年想買通秦國嘅三個國家各自珍惜自己嘅領土，齊國人唔好黐埋去秦國到，唔好玩咩刺客嘅屎橋，好嘅將軍仍然打好佢份工，咁我諗邊個贏邊個輸，邊個生邊個死，都仲可以同秦國死過，無人知結果會係點。
　
唉，用割畀秦國嘅地封賞畀天下間嘅謀臣，用擦秦國鞋嘅心去禮待吓天下間嘅奇才，大家一齊用力向西抵抗，咁我諗秦國人食嘢都要背脊骨落呀！真係悲，形勢咁好，而畀秦國人一路積落唻嘅淫威嚇窒，日削月割，搞到亡國。治國嘅人，好心你哋就唔好淆呢啲「歷史積落」嘅淫威啦！
　
蝦，六國同秦，大家都係諸候，雖然國勢渣過秦國，都尚且有可以唔「卸」佢而贏佢嘅勢喺到。假如擁有成個天下，但又走去學六國滅國所做嘅事，就真係仲廢過六國咯。