(beta 公測版本)
< 返回

《廣東話意譯《六國論》蘇洵》

作者:說書人
日期:2016年3月16日

《六國論》蘇洵 北宋

﹣﹣﹣
廣東意譯: 

  六國比人滅咗,唔係因為軍備唔夠人好、打仗唔夠人勁;問題係佢地用割地嚟收買秦國。割咗地比秦國,國力自然渣,咁咪就係比人滅國囉。有人可能問:「六國一個一個被滅,唔通全部都係因為割地咩?」我話:「唔割地嘅國家都會因割咗地嘅國家玩完,所以冇咗強而有力嘅外援,最後自己都唔可以獨善其身。」所以我都係話:「問題係在於割地收買秦國。」

  秦國除咗打仗嬴翻嚟嘅嘢之外,又收到細嘅市鎮,又收到大嘅城市。如果將秦國收到嘅嘢同佢打仗打翻嚟嘅嘢比較一下,前者其實多成百倍。諸侯自己割走嘅地同打輸咗而冇咗嘅地比較,又係成百倍。所以話,秦國嘅欲望同埋諸侯嘅慘況,其實都唔係好關打仗事。諗翻以前啲開國祖宗,佢地捱餐死,排除萬難頂硬上,為咗得到嗰少少嘅國土。但係啲子孫一啲都唔珍惜,就咁就將佢地送咗比人,好似掉垃圾咁。今日割走五個城,聽日又割走十個城,只係為咗可以瞓餐好。但係望吓周圍,啲秦兵又打到嚟啦。諸侯嘅國土有限,而秦國嘅欲望係無限;你比得愈多,佢就打得愈快。所以根本未打就分咗勝負。至於滅國,自然係理所當然嘅事。古人話:「用割地嘅方法去對待秦國,就好似抱住乾柴去救火咁,啲柴一日未燒晒,個火都係唔會熄。」呢句講得啱啊。

  齊國嘅人冇試過割地比秦國,但係最後都係好似五國一樣被滅國,點解會咁呢?咁係因為佢企喺秦國嗰邊而唔去幫其餘嗰五國。五國被滅之後,齊國少不免都係咁先。燕趙嘅君主就有啲遠見,守得住自己國土,堅持正義唔割地比秦。正因為咁,燕國雖然細,但係佢係到最後先被滅國。呢個就係肯出兵打仗嘅效果。係去到用荊軻(刺秦皇)條計時,佢地先加快玩完。趙國同秦國打過五場仗,兩敗三勝。後來秦國再打趙國嗰陣,李牧都三番四次擋得住。不過後來趙王聽埋晒啲壞話,走去殺咗李牧,最後首都邯鄲就變咗秦國嘅一個縣喇。用兵但係又唔堅持到底,可惜啊。

  而且嗰陣秦國差唔多已經滅晒其他國,得翻燕國、趙國。佢地勢孤力弱,打輸都真係冇計。如果三國都愛惜自己國土,齊國唔好企喺秦嗰邊,燕國唔好派刺客,趙國李牧冇比人殺,咁邊知嬴、邊個輸、邊個生存、邊個玩完;三國同秦國比,都唔係話咁易估到㗎。

  唉!用割比秦國嘅地,封比天下有謀略嘅人;用奉承秦國嘅熱心,好好對待天下有能力嘅人;大家合力向西對抗,咁我驚秦國人食飯都未必食得咁安樂啊。唉,慘啊!明明有咁嘅氣勢,但係都要比秦國個勢食住,一日一日咁比人侵蝕,最後搞到滅亡,國家係唔應該比人地個勢食住啊!

  六國同秦國都係諸侯國,雖然勢力比秦國弱,但係仍然有唔割地都可以嬴嘅形勢。如果而家有天下之大嘅國土,但係都係同六國滅國嘅故事一樣,咁就真係比六國更廢喇!

----
原文:

  六國破滅,非兵不利,戰不善,弊在賂秦。賂秦而力虧,破滅之道也。或曰:「六國互喪,率賂秦耶?」曰:「不賂者以賂者喪,蓋失強援,不能獨完,故曰弊在賂秦也。」

  秦以攻取之外,小則獲邑,大則得城,較秦之所得,與戰勝而得者,其實百倍;諸侯之所亡,與戰敗而亡者,其實亦百倍。則秦之所大欲,諸侯之所大患,固不在戰矣。思厥先祖父,暴霜露,斬荊棘,以有尺寸之地。子孫視之不甚惜,舉以予人,如棄草芥。今日割五城,明日割十城,然後得一夕安寢。起視四境,而秦兵又至矣。然則諸侯之地有限,暴秦之欲無厭,奉之彌繁,侵之愈急,故不戰而強弱勝負已判矣。至於顛覆,理固宜然。古人云:「以地事秦,猶抱薪救火,薪不盡,火不滅。」此言得之。

  齊人未嘗賂秦,終繼五國遷滅,何哉?與嬴而不助五國也。五國既喪,齊亦不免矣。燕、趙之君,始有遠略,能守其土,義不賂秦。是故燕雖小國而後亡,斯用兵之效也。至丹以荊卿為計,始速禍焉。趙嘗五戰於秦,二敗而三勝。後秦擊趙者再,李牧連卻之。洎牧以讒誅,邯鄲為郡;惜其用武而不終也。

  且燕、趙處秦革滅殆盡之際,可謂智力孤危,戰敗而亡,誠不得已。向使三國各愛其地,齊人勿附於秦,刺客不行,良將猶在,則勝負之數,存亡之理,當與秦相較,或未易量。

  嗚呼!以賂秦之地,封天下之謀臣;以事秦之心,禮天下之奇才;並力西嚮,則吾恐秦人食之不得下咽也。悲夫!有如此之勢,而為秦人積威之所劫,日削月割,以趨於亡,為國者無使為積威之所劫哉!

  夫六國與秦皆諸侯,其勢弱於秦,而猶有可以不賂而勝之之勢;茍以天下之大,而從六國破亡之故事,是又在六國下矣!

全文 1496 字 (唔計英文、空格、標點)