《點解我堅持去廁所唔洗手？》
洗手，係一種原則嘅掙扎。
廁所塊鏡上面黐咗紙叫大家「節約用水」，但係昇盤側跟又有「洗手五部曲」。逐隻手指捽，手指公到手指尾，掌心捽兩下，洗埋手腕，仲要用番梘。「五步曲」同「節約」，唔可以兼得。洗得手耐就嘥水，慳水就唔衛生。
抹手，又係另一次掙扎。
鏡底有厚身抹手紙，門口有部吹風乾手機。要愛惜樹木就用乾手機，想慳電就就用抹手紙。想兩樣都慳，今次唔再係魚與熊掌，要兩樣都慳可以抹落衫褲、由得佢fing乾，揩落門柄，用水set頭。
世界充滿矛盾。去廁所，洗手，乾手，都要做一連串原則判斷。
社會充斥住互相矛盾嘅原則，要喺手背同手心揀一樣。若果仔細去諗自己每一步做緊啲乜，就代表下下都要喺無數條相互排斥嘅原則入面，搵一堆平衡出嚟。將呢啲原則分類，其實大概只得兩種，我姑且叫住佢哋做「順原則」同「逆原則」[1] 先啦。順同逆，大概就係懶同勤力嘅分別。順住個勢嘅，唔使用力；逆流嘅，要用力，會辛苦。當然順逆同好壞並冇必然關係：並唔係話順一定差、逆一定好。順，可以係飄移不定、隨波逐流，亦可以係因勢利導、從善如流；逆可以係秉持傳統、堅定不移，但係亦可以係標奇立異、冥頑不靈。所以我好憎「逆來順受」呢個講法。你一係順住大潮流，一係喺潮流之下逆風而行；要順住行，你就係潮流之中，本來冇逆過，又扮晒本身想抵抗，呢啲係虛偽。
世上求其兩個人，處事嘅原則都必然有分歧。正如去廁所洗手乾手，都可以有無數嘅原則分歧。
「順原則」可以係「人人都做我就做」，亦都可以係「無關痛癢就求其做」；「逆原則」可以係「跟足指示」，可以係「幾時都要注意衛生」，亦都可以係「每樣資源精打細算噉去用」。
因為原則實在太多、太唔同，就算一個人唔洗手直接出門口，從呢個行為係唔會估到佢背後嘅原則嘅。佢可以係一個終極環保嘅人，覺得用水用紙用電都係嘥，所以堅持唔做呢啲社會覺得佢要做嘅嘢；佢亦都可以係一個懶人，純粹係懶得洗手。但係結果都係一樣：有個人屙屎唔洗手，地球人用少咗幾百ml水，幾張抹手紙或者唔知幾多電。
呢兩個人做嘅行為一樣，但係「懶」同「堅持慳資源」，一順一逆，實行起上嚟難度唔同、層次有別。前者唔使用腦、後者攞苦嚟辛。兩者應該係傾唔到偈嘅。但係喺呢個行為上，呢件事上，佢哋係朋友。
洗手嘅原則都咁複雜，噉社會議題，梗係更加唔簡單。社會上嘅議題成千上萬，任何一個社會議題，即使原則一致，當你加入時間、身份、立場等各種因素，出到嚟可能會得出好唔同嘅取態；但係原則唔同，有時一樣可以有共同目標。呢種矛盾，幾時都會有。兩班人，好多時會用完全唔同嘅原則，去支持同樣嘅議題。
時間係一個好得意嘅元素。因為潮流隨住時間而改變，廿年前係順流嘅嘢，今日可能係逆流；以前可能係標奇立異，而家可以至係正常。喺香港支持粵語嘅人，正正體現到時間點樣令到兩班原則相反嘅人會支持同一件事。
上一代香港人，好多係走難落嚟嘅人，嚟自五湖四海，過半唔係以廣東話為母語。本身喺呢度嘅人，無論係粵客閩裔，都唔係今日呢種用廣州音做標準嘅廣東話。五十年代已經喺香港生活嘅人，如果今日喺屋企係講廣東話，好多係當年冇堅持自己母語，順住潮流，轉用一隻時尚啲、多啲人用嘅語言。
呢一代香港人，今日抵抗另一波洪流，喺普通話嘅進迫之下，廣東話嘅輸出，電影音樂文學都顯得輸蝕，父母開始想仔女學英文同普通話。喺呢個環境之下，對語言有興趣，而唔係用晒啲時間練普通話，反而繼續為廣東話出力嘅人，角色就變成逆流而上嘅行動者。
有啲人為咗保存中華文化、讀唐詩宋詞，而推廣廣東話。呢種原因似乎係上一代香港人對廣東話嘅觀感嘅殘留。對廣東話嘅推崇，係以廣東話作為雅俗俱宜嘅中文口語做前提，出於廣東話喺香港同中華文化圈嘅地位，而唔係母語感情。其中甚至唔少用呢個觀點去推廣廣東話嘅人，本身係講客家話、閩南話嚟嘅添。另一班人，為咗保持同中國嘅區隔，為咗唔俾北方漢人完全同化，而堅持廣東話，用廣東話建立屏障。係用保衛母語嘅心態去支持廣東話。明明前者追求大中華，後者反對；前者以文化為重，後者以母語優先，不過去到最底下嗰層，大家嘅原則即使完全相反，原來一樣可以冇問題㗎喎。
因為真正嘅原則放喺心，唔係宣之於口嘅。
兩班人明白大家支持緊嘅係同一樣嘢，各有各做，就夠。
每個議題都有一啲要堅守嘅陣地，但係原則並唔係陣地嚟嘅。有一種做法，係大家坐低一齊商討，討論原則問題，尋求共識，之後有一致意見之後再諗下一步。假如與會者喺原則上有衝突，呢種討論即係要傾完之後，其中一方喺行動前放棄原則。所以坐低「傾好原則」係一種痴撚線嘅行為。
講到底，原則同立場，係兩個層次嘅嘢。想做啲乜、同咩人合作，千祈唔好計較咩原則。你搵啲想做類似嘢嘅人，落手落腳去做就得。
[1] 我呢種諗法或多或少受到「優選論 (Optimality Theory)」 嘅影響。呢套理論係用嚟理解「音系」嘅。不過用落人生大道理，一樣啱使。
BTW 我嘅衛生原則高於環保，所以我話知佢嘥水嘥紙，我洗完手唔會慳住啲水，洗完會拎抹手紙。