(beta 公測版本)
< 返回

《廣東話譯《花潮》-李廣田 (1962)》

作者:說書人
日期:2016年3月16日

《花潮》-李廣田 (1962)

又係會考嘅一篇範文,一篇用嚟學寫描寫文嘅參考文章。廣東話比人感覺係俗啲,冇咁靚;如果係咁寫描寫文就比較蝕底嘞,用俗詞又點去描寫靚嘅嘢呢?不過又係咪真係咁呢?

所以我就試試將《花潮》譯做廣東話,睇吓有咩感覺。譯嘅時候先發覺本身《花潮》原文嘅文筆都好似口語!所以譯上手都唔算難。

不過有時係要諗吓邊啲字應該要變做廣東話呢?(其實更大嘅問題係:咩先叫做廣東話書面語?)譬如「枯枝瘦葉」、「花團錦簇」呢啲係咪官話白話,定係其實唔可以咁樣分?就好似寫白話文嗰陣,都會間唔中寫啲文言語句入去。譬如「自相矛盾」本來就係文言度出嚟,(魏書.卷八十八.良吏傳.明亮傳:「辭勇及武,自相矛盾。」),但係官話白話亦都會用「自相矛盾」呢組字,當係四字成語咁用。咁當我地寫廣東書面語,究竟可以混入幾多其他嘢,但係都仍然算係廣東書面語?又或者甚至話,點樣吸納其他嘢去提升廣東書面語嘅水平?我諗呢啲都係要慢慢摸索。

大家睇落又有咩感覺?

順帶一提,我係到而家先知李廣田係喺文革入面被迫害,最後投河自殺,好悲慘。
----
廣東意譯:

  昆明有個圓通寺。寺後就係圓通山。從前係一座荒山,而家係一個公園,就叫做圓通公園。

  公園喺山上面。有亭,有台,有池,有榭,有花,有樹,有鳥,有獸。後山沿路,有一大片海棠,平時枯枝瘦葉,並唔引人注意,一到三四月間,真係花團錦簇,變成一個花世界。

  呢幾日天氣特別好,花又開得啱啱好,所以睇花嘅人亦都係最多。「紫陌紅塵拂面來,無人不道看花回」,喺辦公室入面、餐廳入面、晚會上、街上,經常都聽到有啲人問有啲人答:「你去咗睇海棠未?」「我去咗喇。」或者話:「我啱啱想去。」到咗星期日,喺街撞到,通常都係爭住講圓通山海棠嘅消息。一時之間,幾乎形成咗一種空氣,甚至係一種壓力、一種誘惑,如果邊個冇去到圓通山賞花,就好似係一大憾事咁,唔可以唔擠啲時間出嚟去湊吓熱鬧。

  星期日,我地都去睇花。冇錯,一路上一齊去睇花嘅人都真係幾多㗎。入咗公園門口,步步登山,接踵摩肩,人就更多嘞。向住高處望,隔住密密層層嘅綠蔭,淨係見到一片紅雲,望唔到盡頭,真係「寺門尚遠花光來,漫天錦繡連雲開。」呢個時候咩蒼松啊、咩翠柏啊、咩碧梧啊、咩修竹啊…都留唔住啲遊客。大家都一口氣攀到最高峰,淹沒喺海棠花嘅紅海入面。後山一條大路,兩旁、四周圍都係海棠。啲人坐喺花下面,喺路上面行,既望唔到花外嘅藍天,亦睇唔見花外仲有另一個世界。花喺度盛放,嚟早咗嘅話,佢仲未開好,嚟遲咗嘅話,佢就已經開完。「千朵萬朵壓枝低」,每棵樹都炫耀𡁵自己嘅鼎盛時代,每一朵花都喺微風之中、喺枝頭之上顫抖住咁講出自己嘅喜悅。「噴雲吹霧花無數,一條錦繡遊人路」,係嘅,係一條花巷,係一條花街,上天下地都係花,可以話係花天花地。但係呢啲講法都唔掂,唔足以講出花嘅動態。「四廂花影怒於潮」、「四山花影下如潮」,都係「花潮」好。古人寫詩真係冇得頂,好識得講出個重點、講出花嘅氣勢。你試吓唔好亂咁走,靜低落嚟,睇吓嗰一片一望無際嘅花,「如錢塘潮夜澎湃」,有風,花喺度郁,冇風,花都好似潮水咁郁動,喺陽光嘅照射底下,每一塊花瓣都有佢自己嘅陰影,仿佛好似唔知幾多波浪喺海面上翻騰一樣,你越睇得出神,你就越感覺到呢片花潮正喺度向天空向住四面八方咁伸展,就好似有一種生命力喺度不斷擴展咁。而且你仲可以聽到潮水嘅聲音㖭,話唔埋㗎!可能係花下傾計嘅人講𡁵嘢嘅聲,可能係花叢入面蜜蜂嘅嗡嗡聲,可能係唔知邊度有隻黃鶯嘅歌聲,仲有唔知邊度傳嚟睇花嘅人嘅琴聲、歌聲、笑聲……。呢一切交織埋一齊,再加上風聲,天籟人籟,同海上午夜嘅潮聲差唔多。大家都係嚟睇花,但係花應該點睇好呢?有人行到攰,揀個最好嘅地方坐低睇,隔一陣,又覺得呢度唔夠好,可能第二度會好啲掛,於是企起身,既依依不舍,又滿懷向往,慢慢移動去另一度。多數人都係喺花下走嚟走去,喺呢棵樹下面睇一睇,好,喺嗰棵樹下面又睇一睇,都好,企定定喺另一棵樹下面仔細咁睇一輪,更加好。睇一睇,諗一諗,再睇一睇,再諗一諗。有啲人好大方嘅,只係企喺度觀賞;有啲人比較貪心,伸隻手掹枝花過嚟搖兩搖,或者直頭伸個鼻出去聞一聞,再聞一聞,甚至聞三下咁多。「天公鬥巧乃如此,令人一步千徘」。大家面對呢個咁绮麗嘅風光,都真係冇晒符喇。

  啲老人家睇花,一面睇,一面自言自語,或者把口喺度吟吟沉沉。老婆婆睇花,扶住拐杖,拖住個孫,好珍惜咁折斷一朵花,簪喺自己嘅發髻上。後生仔就著得整整齊齊,乾乾淨淨,好似參加啲咩盛會咁,唔少人已經著咗白𠽌𠽌嘅恤衫,有啲甚至係絲質恤衫,有啲甚至已經係短袖恤衫,好似夏天已經降臨咗喺佢地身上咁,東張,西望,既睇花,又睇人,好容光煥發。啲後生女,亦都打扮得乾淨利落。好多人都著住花衣花裙,好似要同啲花鬥靚咁。有啲人搽咗少少胭脂、少少唇膏,睇落去好突出,不過喺呢個花世界入面,又令人覺得冇乜所謂嚕。好自然咁諗起龔自珍《西郊落花歌》入面所講嘅,「如八萬四千天女洗臉罷,齊向此地傾胭脂」,真係形容得有啲過分,反而變到冇乜真實感。啲小學生,圍住條幾好睇嘅紅頸巾,帶咗彈弓嚟,但係佢地冇用佢嚟射擊,即使有雀仔喺度,佢都唔射喇,比呢一片講唔出原因嘅花海嚇窒咗。啲畫家啱啱校好咗顔色,準備對住啲花寫生;睇花嘅人又圍住嗰個畫花嘅,出晒神咁睇畫家畫花。鐘意影相嘅人,抱住部相機跑嚟跑去,都唔知係影花,定係影人,係怕人遮住啲花,定係怕花遮住咗人,定係要揀個最好嘅鏡頭,令到好似花一樣咁靚嘅人永遠伴住最靚嘅花。有人喺花下面飲茶.有人喺花下面彈琴,有人喺花下面捉象棋,有人喺花下面玩橋牌。昆明四季如春,四季都有花,但係無論山茶又好,報春又好,梅花又好,杜鵑都好,都冇海棠咁好彩,有咁多人、咁熱鬧咁去探佢、嚟睇佢,咁興致勃勃咁趕上呢個開花嘅季節。仲有類似桃花之類嘅,其實而家仲開𡁵花;同埋就喺呢度附近,其實都仲有幾棵碧桃樹開𡁵花,「猩紅鸚綠天人姿,回首夭桃惝失色」,佢地好似冷冷清清咁喺度發𡁵吽哣,冇乜人去理。喺呢個圓通山山頂,可以睇到西山同埋滇池,可以睇到平林同埋原野,不過呢一刻,大家都係睇𡁵花,咩都理唔到嚕。

  睇吓睇吓,都真係有啲攰,搵個位坐低唞唞嘞。邊度冇人呢?周圍都係人。坐咗喺一班睇花嘅人隔離,無意中聽到人地嘅談論,估計佢地大概係某間學校嘅老師啩。佢地正喺度吟詩、喺度傾𡁵詩:

一個喺度吟:「淚眼問花花不語,亂紅飛過鞦韆去。」

一個話:「呢個唔好,邊度嚟嘅眼淚啊!」

另一個又吟:「一片花飛減卻春,風飄萬點正愁人。」

又一個話:「都係唔好,雖然係詩聖嘅佳句,都係唔好。」

一個後生嘅搶住講:「『繁枝容易紛紛落,嫩蕊商量細細開』,都係杜詩喎,好唔好?」

有個人答話:「幾好,幾好,思想健康,講嘅係新陳代謝。」

一個人等都等唔切就講嘞:「好係好,但係都唔及得上龔定盦嘅『落紅不是無情物,化作春泥更護花』,有辯證觀點同埋樂觀精神。」

  有一個人一直都冇講嘢,有人問佢,佢就話:「天何言哉,四時興焉,萬物生焉,天何言哉。桃李無言,下自成蹊。你地睇吓,海棠都冇講過嘢,但係大家都比佢吸引咗嚟喇。」

  我都冇講嘢。諗起喺泰山高處有人喺懸崖上面刻咗四隻大字:「予欲無言」,其實都幾無謂。

翻屋企嘅路上,都仲聽到好多人議論紛紛。

有人話:「今年嘅花比上年好,上年比前年好。」

有人話:「今日睇花好,今晚訓覺好,聽日翻工好。」

有人話:「聽日作文堂,要幫學生出題目,又有計喇。」

有人話:「最好朝早嚟睇花,迎風帶露嘅花仲更加嬌美。」

有人話:「雨天嚟睇花仲好,「海棠看雨胭脂透」,當然唔係大雨滂沱啦,而係斜風細雨。」

有人話:「或者喺月光底下嚟睇花仲好,將會係花氣氤氳。」

有人話:「下星期再嚟睇花,唔嚟嘅話佢就完喇。」

有人話:「不怕花落去,明年花更好。」

好一句「明年花更好」。我一面行、一面睇、一面聽住人講,而自己心裡面都默念𡁵呢兩句:

  春光似海,

  盛世如花。

----
原文:
http://evchk.wikia.com/wiki/花潮
(太長唔直接放喺度喇)

全文 2712 字 (唔計英文、空格、標點)