《【翻譯練習】某個社會主義者 － 芥川龍之介》

【翻譯練習】 （日⇨粵）
（http://www.aozora.gr.jp/cards/000879/files/3827_27278.html）
某個社會主義者 － 芥川龍之介

　佢曾經係個後生嘅社會主義者。佢個做過吓官嘅老豆諗過同佢斷絕父子關係。但係，佢冇屈服到。呢層，係佢本身對呢樣嘢有團火之餘，仲有就係佢班朋友都有鼓勵佢。

　佢哋成立咗個團體，出吓啲十頁紙嘅小冊子呀、開吓演講會噉。佢哋嘅聚會，佢除咗次次出現之外，仲時時喺小冊子度發表自己嘅文章。佢嘅文章，除咗佢哋之外邊個都唔會點睇過。不過佢對入面其中一篇：「回憶李卜吉內西」，有多少自信。就算唔計入面嘅思索點樣緻密，都係熱情洋溢而富詩意嘅作品嚟。

　期間，佢畢業離開學校，去咗間雜誌社度做嘢。不過依然毫不間斷噉出席佢哋嘅聚會。佢哋依舊好熱心噉議論佢哋嘅問題。非但如此，甚至係好似地下水鑿穿石頭噉，一步一步噉準備緊去實踐嘅。

　佢老豆到呢刻都冇干涉到佢。佢就同個女人結婚，住咗喺間細屋。佢間屋真係幾細。但係，佢冇不滿，反而係覺得好幸福。老婆、狗仔、庭園前面嘅楊樹－－呢啲嘢喺佢嘅生活入面，俾到啲佢從未感受過嘅親切感佢。

　佢因為有咗自己嘅家庭，其中一樣就係喺爭分奪秒嘅職場上俾工作追趕，漸漸有偷懶，出席唔晒佢哋嘅聚會。不過佢嘅熱情絕對冇減退到。起碼佢仲相信而家同幾年前嘅佢冇改變過。但係，佢哋－－佢嘅同志並唔係好似佢噉諗。尤其係新加入佢哋團體嘅青年們，責難佢嘅怠惰呢件事一啲都唔留情面。

　不經不覺間，佢同佢哋嘅聚會難免會疏離多重。跟住佢做咗人老豆，越嚟越對家庭產生親切感。之不過佢嘅熱情都係喺社會主義度。佢捱夜喺電燈底下苦讀，全無偷懶。同時，對住以前寫落十幾篇文章，尤其係「回憶李卜吉內西」一篇，佢又覺得硬係爭噉啲。

　佢哋對佢更加冷淡。佢對佢哋而言已經唔係責難就夠喇。佢哋已經擗低咗佢－－或者係同佢咁上下嘅幾個人，如火如荼噉進行緊佢哋嘅工作。佢每次見返舊友，都會好似啱啱發覺噉同人呻。不過，其實佢自己都肯定有啲滿足於呢種凡人嘅平和感嘅。

　之後過多咗唔知幾年，佢喺間公司度返工，終於得到公司嘅大人物睇起。順理成章住咗間大過以前嘅屋，養多唔知幾多個細路。不過，佢團火去咗邊，真係問個天先至知喇。佢時時會坐落張籐椅度，嘆住卷煙，回想佢嘅青年時代。噉樣會冇可能唔會令佢嘅心變得憂鬱。之不過東洋嘅「放棄」次次都會將佢救返出嚟。

　佢確實係個落伍者。但係，佢嘅「回憶李卜吉內西」鼓動咗某個後生仔。係一個買股票，輸晒老豆剩低副身家嘅大阪青年。呢個後生仔睇咗佢嘅文章，機緣巧合下做咗個社會主義者。但係，呢啲嘢佢當然係完全唔知情啦。佢而家都仲係坐喺張籐椅度，嘆住卷煙，回想緊佢嘅青年時代，好人性化噉樣，非常而過份人性化噉樣。

（大正一五・一二・一〇）