《Inside Out 2 觀後感》

1）上集同今集最大嘅分別係：今次睇​唔再係將自己代入主角度，係將個仔代入去。會不斷諗阿仔嘅成長係點&會係點。

2）開頭多啲感觸位，特別會諗起自己做父母嘅責任。喺Riley未踏入青春期時，佢建立左一套積極但primitive嘅core belief system。做父母基本上都係想幫小朋友建立到呢啲core beliefs：「父母以我為榮」、「我係個善良嘅人」、「我好勇敢堅強」、「我係個好好嘅朋友」。

3）而另一個感觸位係，上面講嘅積極嘅core belief system始終係primitive同唔全面嘅。Riley到咗青春期時，環境冇再咁簡單，要同唔同嘅人交流，多咗抉擇要做。劇情發展話因為Riley要應付新嘅困境，所以拋棄咗以前嘅core belief system，做咗好多「唔係自己」(i.e. 唔符合primitive core belief system)嘅決定。

我相信呢點亦係做父母必然要面對同體會嘅結果嚟。幫小朋友建立幾多積極嘅primitive core belief都好，到一個位都可以全面或局部崩塌，因為重生出嚟嘅先係真正屬於佢嘅成熟core belief system。懷疑core belief係認識同建立自己嘅一大步嚟。

「唔係自己」同時都係代表佢成為緊「唔係父母所建立自己嘅自己」，係一種成長嚟。阿焦話同阿樂講話Riley唔係自己唔緊要，因為阿焦睇嘅係將來更好嘅Riley，雖然呢句對白本來只係好似阿焦嘅藉口，但其實都好有意思。

而且正因為呢種成長已經唔係父母所能插手，做父母嘅只能夠從旁支持、鼓勵、有限嘅提議同接納。父母冇得掌控到仔女最終嘅core belief system。

4）side track一點。戲入面嘅Core belief systems 主要係由記憶同情感所組成。但我覺得faith, desire, knowledge同rational thinking之類都係重要嘅組件嚟，但未必同故事咁有關所以唔探討都係可以理解。

5）再side track一點，我成日覺得我教嗰兩科就係想畀同學一個機會直接去觸及同交流core belief systems。而唔係教同學學多啲知識、讀多啲書、提高語文水平之類。

6）小朋友嘅意識一夜之間複雜左呢種情況我相信好多父母都會體會過。戲入面講Riley訓一覺就突然多左好多新情感，雖然現實未至於咁極端，但小朋友呢種跳躍式嘅增長係好明顯嘅，每隔一排就會突然有：「佢真係突然間大個仔咗」嘅感嘆。

7）羨慕、尷尬、焦慮同厭煩呢四種新情緒雖然似乎係令到Riley產生panic attack嘅元兇，最後要靠阿樂阿愁呢啲原始情緒去save the day。但其實當Riley去到新環境要面對青少年之間人際關係時，反而係呢四種情緒先最直接幫到佢應付各種情境。

羨慕、尷尬、焦慮同漠不關心嘅「唔原始」之處係佢地考慮自身此情此景以外嘅嘢 - 羨慕睇嘅係其他人嘅特質、尷尬睇嘅係社交禮儀習俗同埋他人對自己嘅睇法、焦慮睇嘅係將來嘅可能性同他人嘅反應、漠不關心係保護自己免受他人意見嘅影響。

如果得原始嗰五種情緒，Riley好大機會更加無法融入訓練營嘅環境，因為佢會顯得更幼稚更唔識做人。

羨慕畀到Riley憧憬嘅嘅對象同進步嘅動力，尷尬畀佢知幾時做得奇怪咗或over咗，焦慮畀佢識得預先做計劃甚至預判他人嘅反應、漠不關心畀佢有方法去迎合他人（而唔係赤裸噉表達自己）同保護隱藏自己。雖然Riley最後做嘅野都依然係幼稚同kam，但起碼唔係嗰啲活喺自己世界、得罪人都唔自知嘅小朋友。

羨慕、尷尬、焦慮同漠不關心令Riley other-conscious時亦激發自己嘅self-consciousness。而且開頭阿焦話唔再需要primitve嘅情感時亦不無道理。因為primitive情感喺社交場合好多時係需要隱藏嘅（所以要"bottled-up"），反而需要嘅係other-oriented嘅情緒。

8）阿焦同阿樂兩個角色嘅對比同「時間」有關。阿焦睇將來，阿樂睇現在同過去。故事入面講阿樂唔多識做計劃，而事實上當Riley面對好多唔同嘅處境時，阿樂好多時都係被動畀反應，而阿焦則係主動去思考之後嘅可能性去判斷當刻點做好。

阿焦好代表到人係會向前forward-looking嘅主體嘅特性，亦可以睇到人嘅delayed gratification。

9）阿焦旋風式（甚至殘影式）噉控制個console係其中一幕我幾鐘意嘅，因為好表達到嗰種焦慮嘅感覺。

10）brainstorm, sar-chasm呢啲你話點譯好....真係唔容易。

11）最後阿樂控制返Riley打比賽嗰段都有意思。故事開頭講阿樂所控制嘅係有住純真、稚嫰、積極core belief system嘅Riley。呢種core belief system係由阿樂積極建造嘅，因為佢揀走曬啲唔好嘅記憶，淨係留返啲好野喺個belief system度。

去到故事尾聲，Riley都係交返畀阿樂控制，但嗰陣Riley嘅core belief已經係由五味雜陳、有好有壞有對有錯嘅組件所組成，但Riley仍然以樂觀正面嘅態度去面對自己。呢種「快樂」係高一層次嘅快樂嚟。

12）而且阿樂同阿焦最後嘅合作亦有意思。Riley最後得到左「樂觀面對未知」嘅能力。阿焦幫手思考將來可能性，但思考將來唔一定導至panic attack；諗左啲可能性後，阿樂會幫手令Riley可以樂觀噉接受事情總有機會變好變壞，而且可以分析邊啲結果可以控制到，邊啲控制唔到。呢種態度突破咗阿樂只睇現在、阿焦只睇負面嘅限制。