《《醉美的一課》短評》

可能係唔熟悉丹麥文化，自問未領略出《醉美的一課》有咩深邃奧義。唔知係咪太多人好耐冇試過把酒狂歡，又或者冇得出門、旅行，淪為時空嘅奴隸，心靈活虛，所以忽然覺得活在當下呢一課重要之至。

雖然我冇睇過同樣圍繞婚姻問題、教學問題嘅《男人四十》，但係我覺得用佢嚟比擬呢齣本年奧斯卡最佳外語片，並唔符合後者嘅格調。反而1999年嘅《寂寞的男人》（都係張學友）仲多啲共通點，例如詞中主角有事業，有機會有女伴──只係心靈空虛寂寞。

（以下含劇透）

除咗Tommy，四位老師主角都不至於太失敗。Nikolaj 40歲生日，四個老友約埋食飯，佢自己曬命話家庭美滿，湊緊三隻化骨龍，老婆有錢。Peter未遇到蜜運，但未至於運滯。最重要嘅主角Martin就算生活冇熱誠，假假哋都有家庭。佢教學同家庭生活更枯萎、枯燥，唔代表佢對呢啲問題毫無感覺。從佢喺生日聚會酒後流淚，可以睇得出佢未完全心死。又不過，唔代表Martin教書應該頹廢成噉，認真好唔專業同敬業。其他人都仲會關心學生。當中Tommy同四眼仔好有愛。

而且佢哋有酒精實驗做轉捩點。喺禁酒嘅校園偷偷摸摸淺酌之後，佢哋喺事業同家庭都明顯自信倍增，放膽咗好多。只係好景不常，加碼加得太多，終於爛醉而瘋癲，點火點到玩火自焚，失晒控而得不償失。對酒精嘅依賴反映出佢哋逐漸與一般酗酒者無異，不符最初自以為理智嘅控制感，呢點本身已經係問題。

酒能怡情，亦能亂性。我諗起尼采視酒神戴奧尼索斯（Dionysus）為混沌與情感之神，以之同太陽神演繹佢嘅哲學。混沌同時帶嚟種種可能；情感豐富可以兜過理智主宰嘅思考模式，帶嚟啟發（音樂老師Peter拉窗簾叫合唱學生專注喺彼此聲音，將歌聲融合埋一齊），亦可以衝破理智嘅關口而失衡。主角正正就係唔識得拿捏，直至到最後先學識寶貴一課。

Tommy一貫飾演Martin嘅對照者。兩人婚姻關係有別：Martin同老婆最多都係冷淡，Tommy嘅伴侶就早已離佢而去。爛醉嘅Martin喺大仔送佢返到去之後，受老婆一句刺激，大鬧屋企，搞到拆散頭家。但佢再傷心，都冇再飲酒。Tommy就已經放pea自己，飲到貓晒喺校長、同事面前自揭其短之後仲係放唔低酒精，甚至淪落至死，因為生無可戀而出海了結生命。更加凸顯對照嘅一幕係兩人嘅最後一面。Martin照顧完Tommy，臨離開Tommy屋企嗰刻，反而係Tommy安慰失意嘅Martin，語重心長噉寄語佢挽回婚姻，表示向來覺得佢兩夫婦天生一對。結果去到後面，兩人各自選擇去路：Tommy「離場」，Martin有轉機。

Tommy同畢業生又有小對照。去到結局，學生嘅畢業帽似水手帽，佢哋甚至真係乘帆遊船河。同Tommy一樣都係出海，同樣象徵完結、過渡與新開始。我諗，一個可以孕育作家安徒生美人魚傳說嘅國度，對於海都會有獨特嘅價值觀。呢層有待發掘。

貫穿全片嘅仲有四個主人翁嘅背景。首先係教授嘅學科。Martin分享歷史人物嘅例子，除咗令課堂生動咗，亦都藉人板推翻飲酒者冇成就嘅刻板形象。另一方面，既然以史為鏡，我哋都需要汲取過往酗酒者嘅教訓。Nikolaj教心理學，電影着重於發起酒精實驗多過佢教學。佢嘅設定最大嘅作用就係帶出挪威哲學家兼精神科醫生芬恩．史考魯德（Finn Skarderud）嘅理論，作為酒精實驗嘅引子。教學情節亦有目的：佢所幫嘅係想考醫科嘅學生，學生重考嘅試題亦都呼應學生本身嘅問題──焦慮。而醫科亦可以係呼應精神科醫生呢一點。唔講太多教學都好嘅，等我唔使太羨慕丹麥嘅學校教育。

全片亦離唔開酒神嘅藝術──音樂同舞蹈。音樂堂自然有音樂啦。佢哋飲酒會播音樂，醉意多咗就會扭動身體。體育堂Tommy叫同學仔唱國歌，後來同學仔出席Tommy喪禮，唱返國歌向Tommy致敬。最後畢業嘉年華狂歡，直頭大獻歌舞，Martin連腰痛都唔記得，跳返佢拿手嘅舞蹈。

大概冇咩大道理，又嚟don’t try to understand it, feel it — and enjoy it。就好似重考學生學識放鬆先發揮自如。中心思想不外乎都係放開胸襟，收放自如，及時行樂。好簡單，但有時就係聽落簡單，知易行難。

呢篇影評同樣簡簡單單，就此作結。

（事實係：呢篇文係噚晚睇完之後，今日又聽住FoCaL，又趕住出門睇港產片而寫成嘅。唔理喇～）