《廣東歌101+》

《廣東歌101》係陳詠謙同Sunny Idea嘅音樂企劃（22/4-1/7）。第一期展覽《100首不能不聽的廣東歌》正舉行，邀請眾多音樂人乃至其他組織分享佢哋心目100首唔聽唔得嘅廣東歌──近期聯播YouTube頻道之一「小薯茄」都有份。

精選係殘忍嘅。1980年代至2010年代，每個年代25首，絕對唔夠，正如無綫都識得將《流行經典50強》改做《流行經典50年》。每個年代分期展出，大眾每期可以投選嗰個年代嘅三首代表作。

我比較遲先喺黃志華老師嘅Facebook得知呢個活動。月頭去參觀嗰時，已經輪到90年代，反正我早就同80年代失之交臂。至於90年代嘅歌好多都係過咗先聽返。

從工作人員手中接過三粒珠之後，我就開始十五十六，記低啲歌名，反覆來回，甚至哼住嚟揀，真係天人交戰，好難落手。唔係首首都識，都唔知值唔值得慶幸。一開波就見到王菲同張學友，有《償還》、《每天愛你多一些》同《分手總要在雨天》。情感近乎一面倒之際，睇真啲，見到大熱得咁犀利，就決心濟弱扶傾，捨棄學友。

就算個人對《願》、《甘心替代你》、《情深說話未曾講》、《Crystal》、《愛的呼喚》冇咩感覺，都起碼唔會反感入選。友誼代表作《友共情》、男女合唱代表作《相逢何必曾相識》就更加添啦。舊天王喺當時魅力非凡，黃霑喺博士論文甚至斷言樂壇成也天王，敗也天王。但樂壇唔見得停滯不前，有如一潭徹底嘅死水。江山代有人才出，主唱《天下無雙》嘅新血都上咗神台。

《海闊天空》嘅熱度結合咗家駒最後作同社運聖歌嘅魅力，只係月盈則虧，水滿則溢。首歌本身係失意出走日本，「懷着冷卻了的心窩飄遠方」之後作嘅。用喺社運未免意興闌珊，成為社運金曲更加匪夷所思，費解程度僅次於慨嘆命運無法自主而要妥協嘅《年少無知》（即係《一生不可自決》？）。再講，當年咩歌都係可以玩到爛嘅，一句「今天我」應運而生。後家駒嘅《想你》冇牽涉到呢啲瓜葛，面世之時未到拆夥階段，顯得純淨得多。偏偏，得一自然想二──係咪爭一首《十八》呢？（註：當刻我冇諗起《抗戰二十年》，況且佢係喺00年代先出現。）

權衡輕重，最後揀咗勸君惜取歡愛時嘅《春光乍洩》、律動一新時人耳目嘅《冷戰》同埋具重大時代意義嘅熱門《皇后大道東》。

音樂人同民間組織揀歌之餘，亦揀出廣東歌專屬回憶嘅物品。例如Tim Lui 呂甜揀咗佢讀中學嗰時嘅歌詞簿，上面抄錄咗啲歌詞。唔知係咪要鍾情至此先叫鍾意填詞呢？陳詠謙就有張填詞嘅靈感紙，圍繞住IT狗返工故事，應該唔係《老細我撇先》。

回望過去之餘，企劃亦希望未來有所突破，期待第101首以及更多新作。音樂人交流、作曲填詞工作坊正正為此探討同裝備。呢個場合亦有同耳機品牌、音樂平台嘅合作，例如安排入場觀眾戴無線耳機聽歌手獻唱，開「試音房」享用JOOX app VIP功能。

我抱住唱K嘅心情入咗去玩，話晒好耐冇唱過K喇。K房又瀕死，呢種危機貨真價實過「樂壇已死」。

「樂壇已死」嘅論調絕非新鮮。李純恩2013年踩過填詞人：「香港樂壇之死，就是因為歌詞都死了，感動不了人。」不過作曲人陳輝陽2016年有此論，係緣於佢唔認同《CHOK》值得攞金曲金獎，不齒小圈子豬肉獎，難以相提並論。再者，陳輝陽本人仲有小額作曲，足以證明佢冇心死。

此一時彼一時，當年已成歷史。而家分眾嘅趨勢更加明顯，易啲接受百花齊放，話唔埋Swing都會彈返起。鍾唔鍾意樂壇新氣象都好，一日仲有人討論，仲有人做音樂，香港樂壇就肯定仲有影響力，點都唔會死。將心力擺喺點樣做好佢，點樣繼往開來，點樣超越101，意義會大好多。