《粵語填詞嘅幾點簡單隨想》

本港時間四月三號朝「卑詩大學粵語流行文化大師班講座」──《流行文化與粵語教學》引起有啲聽眾喺呢兩日對粵語填詞嘅討論。我亦都畀呢啲討論勾起一啲簡單諗法。喺度記錄一下，當做兩個月後新一篇文章。

【借鑑傳統，另闢依字行腔以外蹊徑？】

根據維基所引，聲調語言佔70%。唔係全部都要依字行腔；比較講究啱音嘅語言包括廣東話、苗語 Hmong、泰文、越南話、Tommo So、Xhosa等等。

對追求廣東話填詞自由嘅「叛才」嚟講，舊式翻譯嘅教會歌以外，仲有另一種「福音」。有一種歌謠「曲種」並唔係咁講究合樂，就係珠三角一帶嘅（水上）嘆歌 / 漁歌 / 鹹水歌 / 蜑家歌（「蜑家」含貶義）。嘆歌本身並唔着重旋律要有起伏，而係越平、越少起伏先為之「嘆」得越好。

嘆唱設上句、下句，以嘆唱對象開始同作結。詞句中間有大量虛詞或者襯字（「又」、「喇」、「得個」等等）用作流暢過渡。亦都容許對答，輪流唱出一對對上下句。我相信各地山歌同嘆歌幾相近，有自己嘅格律，亦有對答嘅情境。

傳承嘆歌會唔會因為噉而多咗新角度呢？

【兒歌與時代】

而家兒歌少咗。

以前淨係卡通動畫歌曲都一大拃。遠至《大鐵人17》、《IQ博士》，近至《足球小將》、《多啦A夢》、《小丸子》嘅《問題天天都多》、《超人迪加》嘅《超人的主題曲》、《超級小黑咪》……多不勝數。

舊時仲有《世界真細小》、《小飛俠Peter Pan》、《跳飛機》、《刷牙歌》、《小太陽》之類。內容同語言都係簡樸淺白。呢樣應該係兒歌所需要嘅特點。

當然學似我哋啲90後，將《鋼煉》嘅《不死傳說》或者Twins嘅《戀愛大過天》之類當兒歌聽大，都冇話唔得嘅。只係咁早畀細路認清「大人世界沒有不吐不快」（《青春快門》），似乎殘忍咗啲。

撇除主題曲，近年有冇取材自生活嘅純樸兒歌？當然有韋然、志安哥哥、熊熊兒童合唱團等等啦，但都係唔夠多……屋漏兼逢連夜雨，而家小朋友睇少咗卡通動畫，兒童節目做唔住，相關節目歌曲又少咗。而家係最需要兒歌嘅年代。

「兒童」概念係工業革命蓬勃起嚟，先至開始重視。由童工問題，延伸到有明確意識認為兒童身心未成熟，要同青少年起打後嘅人區隔對待，繼而保障兒童權益，包括玩樂權。兒歌缺貨，未充足照顧到佢哋嘅認知發展、心理需要，看似回潮。仔細一諗，新時代直升機苦媽興起，唔代表舊人冇呢一套，再者填鴨未變，歷久不衰，不免有啲諷刺。

（再賣廣告：我嘅嘗試）

郊野樂（暫名）──調寄《滄海一聲笑》
曲、原詞：黃霑
青蛙呱呱叫 魚都有六條
池塘荷葉蝦毛少
雞公唂唂叫 馬騮尾又搖
牛羊同埋白兔都鍾意笑
https://www.facebook.com/bullsword/photos/a.357840654410050/1396655387195233/

【陳少琪嘅粵語歌詞】

有朋友提到粵文為主甚至全粵文歌詞嘅話題。之前拙文收集咗啲曲目，我都想補充。
https://medium.com/語絲論叢/擴闊對粵語填詞嘅想像-2b63111622f

留意到鄭中基新歌《玩咗先至瞓》，即係佢嚟緊演唱會主題曲。撇除「一起」、「那位」嘅「那」，首歌正正就係粵文填詞，由陳少琪填詞。
https://youtu.be/LANNLmdIlbU

（順手調寄副歌）

大眾情人成就亢奮
金口一開撲飛冇笨
期內限定業內先河
海邊揸車吹風 fan屎爽到震

城內亢奮 開show驅使阿姐過問
場地戶外創造可能
好想幫班觀眾解解鋪戲癮
有工開解下癮

繼而發現除咗list上面嘅鄭融《你諗咗去邊》，莊冬昕幾首作品都係陳少琪詞作。

放諸今時今日，《食軟雪糕》絕對值得平反，而且已經有人平反，指出首歌描述緊在職貧窮、貧富階層喺財產同欲望上嘅差距。甚至乎曲風都值得平反。慶幸而家係分眾、多元嘅時代。

https://theinitium.com/article/20170101-culture-column-glocal-pop/

https://www.youtube.com/watch?v=eLFQpyplOZU