(beta 公測版本)
< 返回

《坐「優先座」其實值得表揚㗎!》

作者:擇言
日期:2015年12月19日

如果成架車都係位,你係後生仔,有得揀你會坐一般座位,定係「優先座」?睇落揀一般座位先至係聽話嘅後生仔,事實上呢個係自私嘅行為嚟㗎。揀優先座,喺架車多咗人之後,大家會期待你去讓個位出嚟;而你坐其他位呢,呢個壓力就冇坐關愛座嗰個咁大。即係話你坐一般座位,考慮埋外在壓力,你可以享用個座位嘅平均時間係長啲㗎!

即係避開優先座只係利己行為,並唔係真係關心緊有需要嘅人。

最好嘅做法,其實反而係坐咗優先座先,讓返其他位出嚟,等真正有需要,又冇外在老弱傷殘特徵,又面皮過厚嘅人可以坐。噉樣做,就算你之後唔讓返個關愛座出去,你都係幫緊其他人承受不必要嘅精神壓力㗎。當一個車廂入面有一個人肯自認仆街,其他坐喺正常座位嘅人,就會自然會受到保護嘞。

所以,做個負責任嘅後生仔,坐地鐵,記得有理冇理,要霸咗關愛座佢呀!

全文 310 字 (唔計英文、空格、標點)