《動物森友會玩法解說 正確標題係有可愛動物陪伴嘅西西弗斯體驗記》

遊戲世界入面，每個玩家都有個無人島。一開頭你得一個帳幕，你要慢慢喺度揾錢改善自己嘅生活。

(1) 記住你嘅人生目標就係起大屋
(2) 起咗屋你可以整靚佢（起大間啲、買傢俬、種樹）
(3) 起嘢買嘢要錢
(4) 揾錢可以做三樣主要嘅嘢：捉蟲、捉魚、摘果實
(5) 蟲魚果可以賣錢
(6) 有咗錢就可以還返俾銀行
(7 供完層樓，負責人狸嘉誠會即刻借錢俾你，起另一間屋
(8) 起屋一闊三大，返去 (1)

有人問
日日供樓換屋供樓換屋，有咩好玩？

超，你人生咪又係差唔多。買件衫又一日，養吓魚又一日，執屋又一日，一世人好快過㗎咋。
好在，呢個遊戲會幫你揾出人生意義。人生意義喺遊戲入面量化咗做「哩數」。你跟住指示去捉魚捉蟲行街識人，你就會有一堆經驗值。呢啲經驗值可以擴闊視野，方式係「換特價機票，去另一個無人島思考人生」。

思考人生係要消耗哩數，但係思考嗰時你會換到蟲魚果返屋企。

方程式係
時間＋意義 → 金錢

恭喜你，而家你可以返返去 (1) 喇。