《千篇一律是庸才，一律千篇是大師》

有一個好有堅持嘅朋友，每日都寫一篇文。

一般寫文嘅人，通常會試好多唔同題材、唔同文體嘅。例如今日講下時事，聽日寫下家庭，後日寫下飲食，大後日寫下人生觀噉。但係佢好得意，佢話喎，「啲人始亂終棄，有乜可能一個題材寫一次就放棄㗎！」所以佢每日，係每日，都寫同一個題材，男女關係。

寫男女關係嘅人周圍都係，但係佢係一個特別有堅持嘅人。佢永遠淨係寫一種文體：短篇小說；永遠唔玩弄文字、唔修飾語句，當然唔會查咩工具書呀典故呢啲。據講係因為佢鄙視工具。係嘅，用工具嘅人一定係心術不正，我細細個就聽過。

令我覺得最詫異嘅地方，係佢將寫作視為行為藝術。佢每次寫，都一定係寫九十分鐘，每次寫都係八百字。而且每篇入面男女主角、故事情節、段落鋪排、甚至係結尾，都幾乎一樣嘅。做法好似日本嘅傳統壽司舖，食客食嘅唔單只係壽司，而係嗰種對形式嘅堅持。

堅持寫作只係作家基本，正如日日煮嘢食，係做廚嘅基本要求。將自己做嘅嘢限喺一個範圍，做十年、廿年、五十年，你先至可以變做大師。喺我呢個朋友身上，我見到呢種堅持。

我深信過五十年、過一百年、一千年，大家都會記得香港嘅文學大師：葉念琛。

#同屋住請放心 #連戲是我本份 #十年磨千劍 #葉念琛 #愛情片大師 #名留青史