《公允啲好：「陳詠謙之亂」多面睇》

作者：牛刀

日期：2019年4月14日

原文：https://medium.com/一多相即/fair-comment-about-abrahim-wing-him-chan-the-lyricist-b4e3d32829a0

陳詠謙本人未必係全城熱話；佢手詞呢，就肯定畀人插到遍體鱗傷。若然嫌連登巴絲成唔到氣候（十世冇上高登，唔知家下咩環境，更加唔好話膠登），咁逆嘶亭〈陳詠謙之亂〉、快活角落頭Happy Kongner嘅《文盲俠1999》首集，都彙整得幾詳盡下。

我唔係佢fans，只係稍稍留意過佢手筆。我覺得佢未夠資格攞填詞人大獎，莫講話攞咁多次；就算要防「兩個偉文」壟斷，都有林若寧等等人選。一月陳生得獎，話自己嗰幾個月好迷失，冇寫詞，我直情想引陳奕迅《漸漸》嗰句「我覺得迷失竟比醒覺好」嚟潤佢「get lost」。我認同出面某啲批評，覺得騎呢配搭尤其關鍵。

之不過，我又覺得都有幾多評論值得商榷，冇理由唔寫篇文討論。喺度，我無意亦無力為佢全面翻案，搵勻佢咁多首詞作，舉晒例逐一評析。只係由於我用意更在於帶出另外嘅觀察，引起方家高明喺文學、書寫語言方面嘅討論，而我自信憑三兩板斧就做到，所以我冇全面取樣。

至於點解隔幾個月先出，並唔係因為想過冷河。坦白講，佢咁嘅風頭，咁嘅火勢，有排都未歇息，一時無兩啦。只係醞釀咗一排，撞啱少人提嘅角度，有得攋落去一啲議題，跟住去到呢一刻又肯扚起心肝整理啫。喺呢個角度嚟講，我都要禮貌咁多謝陳生。

---

陳氏不斷獵奇插者不免獵巫

~ 市場為重直白歌詞當道 ~

入正題之前，講少少流行曲本身。流行曲歌詞係文本，可以用文學角度鑑賞，佳作更加足以入殿堂。不過，我哋亦要追循其本：整個行業係產業，流行曲係用嚟換錢嘅商品。在商言商，市場效益為先；要最容易贏得大眾支持，繼而賺錢，最好就係直白易明，一擊即中，林海峰喺《流行曲》已經演繹得淋漓盡致。另一方面，蘊藏詩意韻味嘅歌詞對鑑賞能力要求高，始終難紅，正如李克勤嘅《潑墨》雖然有夕爺幫手鋪到濃淡交替，可惜曲高和寡。審美期望同市場展望難以時刻並重。利誘之下，慢嚥輕嘗越嗒越有味嘅就會相對減產。至於直白詞作，無論係題材淺白定係文筆通俗，無論寫得好定差，都會佔主流，風格趨向單一。

依我之見，陳詠謙向來極少以哲理為題材。我好厭惡佢鳩借太宰治《人間失格》一題，扭曲「失格」嘅意思做前度賤格衰格，諗住將Yellow!《夫目前飯》（「夫目前犯」諧音）照辦煮碗同樣啱數。但係畢竟我冇期望過佢會寫到人嘅生存困境，亦能夠理解佢想食曾若華Jude嘅「文青」風（姑妄言之）條水，自然失望極有限。我相信大多數人對佢取材都冇乜意見嘅。

~ 遣詞修辭「愛奇」真係咁大罪？ ~

偏偏陳氏意圖喺遣詞用字別樹一格，既險且奇，有時甚至令人費解，行鋼線失晒平衡。陳氏配搭有幾牽強？輕微啲嘅有「我為何未懂得站立」（陳柏宇《別來無恙》），其實大可以填「獨立」或者「自立」，明確表達「為事情出錯了負責」嘅成熟態度。再畸形啲嘅，咪「被繁榮下載」囉（衛蘭《在月台上等你》）。我諗係咁意出兩個都證明到。

但其他方面，有啲指摘嘅人何嘗唔係都有咁上下位顯得牽強？

包括情理。上述嗰條片，係就係講得齊，但係我實在不盡同意。片中其中一度詬病「兩眼一黑」暈咗，冇辦法「然後失控」（Dear Jane《經過一些秋與冬》）。我質疑唔係真係毫無情理可言，事關含義都可以係：
- 短暫暈一暈，恢復返再情緒失控；或者
- 失去意識控制，而唔係情緒控制。

又包括修辭。連登仔狂踩陳奕迅《我們萬歲》，竊以為首歌都冇佢哋講得咁差啫。新奇又唔係時時都係大罪嚟嘅。我會將副歌頭嗰句「情人遊天地／日月換行李」理解成：懶對偶，意指「時光流逝，閱歷漸豐」又想扯埋「日月如梭」嘅新奇比喻。老老實實，日月時光之嘛，你估扯到日月華光咩？嗱，再進一步，恕我大膽，林敏驄式奇想何嘗唔係新奇？《愛的根源》嗰句「隕石旁的天際」（once upon a time）難道唔屬於忽發奇想？《無心睡眠》呢隻飛天馬直情證明奇思可以有妙想。「張開口」O晒嘴，詞人唔單只要形象化，仲要一不做二不休，似冬甩圈、呼拉圈都未夠喉，要去盡佢、煲大佢，「救生圈」先夠皮。你以為咁就夠晒無厘頭？欸（借住嚟表示ei2先），未算極限——「實驗雨的酸與甜」！九唔搭八，問你死未？

咁樣睇落，「吻停不知幾多歲的你」、「吻停你到下世紀」只係碎料。時間即使依然流逝，心中印象都可以封印永固，藉此進入「永恆時空」。如果咁都要話，咁英國詩人亨利．多臣（道布森）（Henry Austin Dobson）〈The Paradox of Time〉嘅妙句咪聽遭殃？心中感悟到一絲詩意嘅，都唔會大煞風景，去數詩句不符時間必然流逝嘅實相。

//Time goes, you stay? Ah, no!
Alas, time stays, we go.//
（大意）
時不你與？唉，
邊係吖！時光留得住，自己先至留唔住。

陳詠謙梗係冇咁高超啦，但假假哋都算得上「新詩式表達」嘅。咁嘅奇筆，並非新詩獨有。「愛奇」之心，非「香稻啄餘鸚鵡粒，碧梧棲老鳳凰枝」嘅「詩聖」杜甫獨有，更非區區陳詠謙獨有。早喺初唐，李善為《文選．哀傷》注解，就已經咁樣形容南朝嘅江淹。心水清嘅就知，江淹正正係成語「江郎才盡」嘅主角。江淹有寫賦。賦係半詩半文嘅混合文體，同我哋（多數）嘅歌詞一樣都係押韻。佢喺兩首賦中咁樣顛倒文句嘅語序：

//〈恨賦〉「或有孤臣危涕，孽子墜心。」
注：
「孟子曰：孤臣孽子，其操心也危，其慮患也深。登樓賦曰：涕橫墜而弗禁。字林曰：孽子，庶子也。然心當云危，涕當云墜。江氏愛奇，故互文以見義。」//

李善引經據典，指出原先係「危心」、「墜涕」，只係佢哋交換咗。

//〈別賦〉：「使人意奪神駭，心折骨驚。」
注：
「亦互文也。左氏傳，衛太子禱曰：無折骨。」//

按同樣原理，即係「心驚骨折」。呢度嘅「心折」唔係講緊「衷心佩服、折服」。

文學同日常運用可以有截距離，「奇文」喺文學領域會有多啲共賞空間。若然藝高人膽大，或者享負盛名之後而出「奇文」，獲得共賞嘅機會就大好多。陳詠謙係咪咁，見仁見智。佢有幾「愛奇」，要問佢本人先知。我唯一可以斷言嘅係，佢更怪都怪唔過上面上咗神枱嘅文人，偏偏已經面對過濫嘅批評。

語法概念凌亂及書寫語言觀怪象

部份批評者唔只喺語言運用層面對佢獵巫，仲多少滲透到語法同詞彙層面。佢哋未必充份掌握相關觀念，反為擺咗烏龍又或者喺概念上互不相容。

~ 語法層面 ~

句法成份嘅概念可謂重災區。一方面，對詞性及句法成份嘅定位過於狹窄，認為一類詞只可以充當同詞性顯著相關嘅句法成份，充當唔到其他。譬如上述條片提到「找到了拯救幾秒鐘」（Dear Jane《只知感覺失了蹤》）中，作為述語嘅動詞「拯救」做唔到賓語。其實就算唔計既係動詞又係名詞嘅兼類詞（「練習」），動詞都可以做賓語，例如「我鍾意跑步」、「佢識溜冰」、「表演跳舞」，不同於連動式。另一方面，佢哋以為主謂句係唯一嘅框架，兼且主語仲一定要係施事者（agent），結果困到實一實。條片指「明晨就是我的人」（林奕匡《難得一遇》）欠缺人物嚟充當主語唔妥當，咁係咪真係必然唔可以接受呢？其實首歌前文已經處於「我」同「你」呢對鴛侶嘅對話脈絡，情境上足以判斷，正如我哋唔會話「今晚打老虎」、「食咗飯未？」唔可以接受。（講係咁講，咁我都會諗：要人接觸過「分析語」甚至「主題優先語言」同「無主語語言」呢啲特性，可能強人所難咗啲……）

「當」字短句後置嘅所謂「歐化」句式，反為冇乜關注。《在月台上等你》「未見你在／當我轉入／成長的月台」仲令人聯想到《現代愛情故事》嘅「不必痛苦當憶起我」添。

~ 對粵官詞彙混用嘅含混態度 ~

絕大多數粵音歌以官話白話文寫成，就算間中夾雜粵語詞彙，使用官話冇同粵語共享到嘅詞彙，本身理應係好自然嘅事。啲人插《別來無恙》「做飯」，其實有啲無謂。我可以理解，唔用共通嘅「煮飯」，唔慣。問題係：Kolor首《時差》用「燒飯」㗎噃，仲要用「煮飯」都啱音㗎噃，我又睇唔到同等劣評嘅？嗱，好坦白，我純粹覺得「我現時自己肯做飯／悶極時自己可浪漫」衰內容平庸，嘥咗句hookline唧。上高咁樣雙重標準法，點解釋先？我就好戥佢唔抵嘅。話埋我一份我都係咁諗㗎嘞。

踩人場，唔畀對家同聲同氣，好嘢吖，高招到呢。好嘞，踩人場唔爭在班馬，混入粵語詞彙。簡簡單單，算係「香港中文」啦，未加文言玩「三及第」住。仲要一樣都係基本詞嚟㗎噃，即係「等我飲醉酒」（Dear Jane《永遠飛行模式》）「飲」唔用「喝」咁。冇咩吖，「從未跟你飲過冰」（王菲《償還》）、「說到終於飲醉酒」、「我也開心飲過酒」（陳奕迅《人來人往》）、「事先將／一枝酒飲掉」（何韻詩《做好準備》），前兩首林夕，最後嗰首佢師傅Wyman添，咪又係咁。OK，套路唔難明吖，咁陳生用「邋遢」唔用「（骯）髒」冇死啦？

個post (https://lihkg.com/thread/684343/page/12) 講緊《人間失格》。開名都費事。陳奕迅《蠢》都有用：「有個世界簡單可愛／俗語話係蠢／好彩不算邋遢」。

吖，你又唔likey？

//後「邋」多用於「邋遢」一語，指人行走之貌。《廣韻．盍韻》：「邋，邋遢，行皃。」王子一《誤入桃源》第一折：「眼見得路迢遙，芒鞋邋遢，抵多少古道西風鞭瘦馬。」或以為指行不正之義，《字彙．辵部》：「邋，邋遢，行歪貌。」又引申有不整潔、猥瑣之義，宋釋適之《金壺字考》：「邋遢，不整貌。」明郎瑛《七修類稿．辯證類．諺語解》：「邋遢，借為人鄙猥糊塗意也。」清潘榮陛《帝京歲時紀勝》：「諺云：『二十七，洗疚疾；二十八，洗邋遢。』」（漢語多功能字庫相關條目。但係官方現時唔會直接導向，會叫你重新搜尋。）//

- 文言有「飲」
打晒飛機。
- 宋朝已經將「邋遢」引申做唔整潔、猥瑣
嫌佢邋遢。

不如你教我black magic到底點玩吖。

---

寫陳詠謙太難

陳詠謙唔應該釘牌。佢唯一嘅武器，可能就係佢其實唔使搞咁多花臣，已經可以將感情寫到好細膩。唉。

//回望我在最初遇過甚麼
那時我簡單得多//

陳奕迅嘅《可一可再》，你可以話死者為大，因為盧凱彤而加感情分，於是唔計。IU嘅《長夜》，你可以話意境靚還靚，唔係原創，於是閂埋僅僅嘅「一扇窗」，唔畀陳詠謙過。佢同岑寧兒一班自己友——Charatay（「格勒底」嘅諧音）嘅主題曲《不枉我們張山十年》，你可以話「張山」（「囂張」諧音Hill Cheung嘅翻譯）、「chikinology」（自己攞嚟賤）呢啲見證住友誼嘅暗語好隱晦。嗯，越吹越似層層，「該事體莫須有」。

《寫妳太難》呢？佢喺收音機聽到李宗盛《你像個孩子》，畀「寫歌容易／寫你太難」感動到 (https://www.881903.com/Page/ZH-TW/featuredetail.aspx?itemid=821533&csid=801_3401) ，自創曲詞，唱出婚變男人嘅心路歷程。唔係王菲嘅《百年孤寂》，唔係因為「你那張舊CD／還偷偷轉動」而聽返嚟，亦同樣「多麼孤寂」。乜佢真係犯咗「死罪」咩？
https://www.youtube.com/watch?v=ysC2JrYly0s

我幫「奇而平平」、妄自「張山」嘅陳詠謙喊冤，絕非出於偏愛。怒潮叠起，翻滾百千浪。盲流、雜音同毒草混雜其中，咁嘅生態其實唔多健康，更加唔使話喺公共討論得益。個人雖則冇乜影響力，起碼公允評價會對得住自己。最好能夠觸及到文學語言、語言知識普及度呢啲議題，拋磚引玉，促進深入探討，咁陳氏都總算「死得其所」喇。

---