(beta 公測版本)
< 返回

《鼓聲嘅牽引:《逆流大叔》觀後感》

作者:牛刀
日期:2018年10月25日

我好遲先去睇《逆流大叔》,係趁中秋(24/9)早收,飯前睇返場。電影暑假上映之後好評如潮,檔期過埋中秋同十.一假期都仲有上映,更加估唔到去到今朝仲有一場。

初初睇預告,心諗個名仲唔食正大叔風?仲有「逆流」呢,本身都正能量㗎喇,再加埋逆乜逆物,自然聯想到《逆權大狀》、《逆權司機》啲friend,勵志味十足。事後睇,呢個戲名至少喺市場推廣上高明過江湖味濃嘅《萬水千山縱橫》。係吖嘛,「萬水千山縱橫,豈懼風急雨翻?豪氣吞吐風雷,飲下霜杯雪盞……」吓?即係點呀?未必係老土嘅,只係江湖味太過亂入啫。再講,故事四大男主角面對各自煩惱,都唔係一開波就大俠上身,灑脫過人啦。正如陳龍同黃淑儀扒龍舟一樣,開初淨係逃避,試都未試過面對,繼而係對自己甚至喺人前承認問題,最後下定決心正視,為尊嚴同幸福盡力而為。四位一啲掙扎都冇嘅話,就冇呢齣戲做啦,逆乜流唧。

https://www.youtube.com/watch?v=yLrHKW-Cwj4

不過坦白講,四位角色背景鋪墊失重,唔能夠交代晒咁多個角色嘅困境係點樣形成,例如觀眾其實唔太了解泰哥婚姻失敗嘅原因。呢一點大家都公認係電影嘅硬傷。必須承認嘅係,點樣喺有限嘅時間內交代清楚,係一門藝術。正如先前睇《小偷家族》,我都好想知道當初呢頭家係點樣組成,例如「婆婆」同埋「家姐」,等我可以更加說服自己,佢哋點解肯投放咁多感情去凝聚。無奈,電影需要作主次輕重嘅取捨。或者開頭動畫簡單畫出MK陳龍由揸電單車、貨車,到到而家揸寬頻貨van撈埋Uber,就反映到邊啲主角更加主要。正如最後「九點半,大會堂」,搶新娘變讓愛嘅長長一段,係偏心㗎喇。開頭咁開宗明義,已經畀咗心理準備我,所以我只係覺得係輕微嘅硬傷,而未去到致命傷嘅地步,唔似得《小偷家族》嘅「事」猶未盡。我認我都有啲偏心。

【青春頌下嘅殘酷 反勵志撫心自問】

橙同藍係電影嘅主色。未聽美術總監嘅睇法之前,我仲以為係因為戲中男子組嘅公司「天馬寬頻」影射緊香港寬頻。無可否認,兩隻色夾埋幾有活力,仲令我諗起青政同本民前呢兩個新生年輕政團。我諗橙藍組合同青春唔會偏離得太遠。而Dorothy教練青春可人,喺大男人為主流嘅龍舟世界中為理想堅持,勉勵同啟發中坑,形與神都係青春嘅另一代表。佢固然調和咗中坑嘅陽剛同麻甩,仲引起淑儀嘅遐想(好好笑,不愧係潘燦良),不過亦絕唔係得個樣同長腿嘅花樽。余香凝嘅演繹亦對得住劇本設定嘅用心。

https://www.youtube.com/watch?v=w1OgQ_XXgP8

但係青春係咪咁美好呢?係咪一鼓作氣,一往直前,最緊要理想,心口掛住個勇字就無敵呢?似乎唔係。我哋對年輕人寬容,明白佢哋經驗少易出錯,仲需要歷練。從而有一種觀感,就係後生似乎就係輸得起,甚至爛口啲咁講,猛柒乃青春常事,青春係戇鳩嘅代名詞。其實青春唔係大晒,現實嘅高牆難以撼動,挫折在所難免。開頭聯署罷工,新仔陳自豪簽真名而被秋後算帳,就顯得難能可貴,亦顯得特別傻仔。而老油條等到人走咗先嚟懺悔,將無能包裝成無能為力,雖然唔夠骨氣,話唔定舊日磨滅唔晒佢哋嘅熱血本心。

我好欣賞成齣戲唔係為勵志而勵志,而係反勵志 (https://medium.com/%E6%88%91%E4%B8%8D%E6%98%AF%E8%B2%93/%E9%80%86%E6%B5%81%E5%A4%A7%E5%8F%94-%E5%85%B6%E5%AF%A6%E6%98%AF%E5%8F%8D%E5%8B%B5%E5%BF%97%E9%9B%BB%E5%BD%B1-eb17d63ec1e3) ,甚至想知道劇本初版嘅結局有幾「悲情」。戲中嘅香港就係香港:抗爭想搭順風車,不勞而獲,聲大大hea畫龜縮沙又有,甩底唔去扒住龍舟罷工又有,而唔係自己爭氣,攞返自己嘅尊嚴,團結一致;總有僱主話栽員就栽員,有錢就自己賺,唔會同勞方分享成果;集體談判權被廢除之後,工人難以維護權益;2013年貨櫃碼頭工潮爭取到加薪,但係工作環境改善唔多,又係咪真係成功?樓宇密密麻麻,有條罅睇到海景都偷笑,更加唔使講日照。破浪前行,急流奮進,都係唔包生仔,唔包掂檔。結果冇清楚交代,交代咗嘅都係成功少失敗多:陳龍喺「殘酷遊戲」成全到底進化成情聖;黃淑儀高呼完鼓起勇氣改善屋企關係;泰哥挽救到婚姻;威廉重拾理想,但我哋唔知女友介唔介恴佢追夢;全隊因為失誤冇坐亞望冠。之不過,置諸人生就正常得多;畢竟電影嘅結局係編排好嘅,人生嘅結局呢,係要等我哋自己開創嘅。我哋側重過程,講求我哋嘅心、我哋嘅人生觀。每當迷失,我哋撫心自問,尋覓「鼓聲」;鼓聲並非外求,而係要靠自己內省,追隨自己嘅節奏。為咗呢種實質更加理想、崇高嘅勵志精神,編劇不惜借「天馬龍」解散後四人坐van仔嗰陣播緊嘅電台節目嚟說教,爭取話語權及詮釋權,重新定義獅子山精神。

https://www.youtube.com/watch?v=7yFAE3ezUaQ

當然,出動到說教,未免係敗筆嚟。如果唔係鼓聲呢個咁獨特嘅特徵,其實都唔太扣連到龍舟運動同埋電影主旨,分分鐘仲多一重敗筆添。所以地產舖出面嗰一幕,扯到去所謂龍舟嘅啟示,我始終覺得有啲突兀。電影應該要說服觀眾,點解龍舟係主角,否則用威廉退役前打嘅乒乓球都得啦。

【團隊嘅重要】

譬如話,龍舟呢項團體運動所着重嘅團體精神。隊友嘅團結同默契,係一步步建立返嚟,先至扒到節奏一致,開心到又衝上浮台又潑水,鼓勵陳龍搶新娘,齊心咁「九點半,大會堂」,到佢衰咗就藉調侃嚟舒緩佢嘅愁緒。呢樣就係坐埋同一條船嘅感情。

講到團隊,要多謝電影團隊台前幕後仝人。例如係,RubberBand嘅原創音樂匹配得嚟又可以獨當一面,有如ToNick有機會憑歌曲《長相廝守》同電影《救殭清道夫》營造到嘅加乘效應。吳鎮宇義演,同飾演泰嫂嘅莊思敏做埋出品人,都係有心人。亦都要多謝陳詠燊導演。

https://www.youtube.com/watch?v=l437aFu-29g
https://www.youtube.com/watch?v=sOkKNEYOE30

最後提多一樣:《逆流大叔》係香港首套自選口述影像電影。而且我知有組織喺十一月都會舉辦口述影像放映會。

https://www.youtube.com/watch?v=1HZnZveEvBQ
堅扒!中間仲有「萬水千山縱橫」!XD

https://www.youtube.com/watch?v=t1y5kYCy-rk
https://www.youtube.com/watch?v=xMxuuTL2YS0
https://www.facebook.com/film.menonthedragon/photos/a.1418090418222084/2031875210176932/?type=3
https://www.facebook.com/film.menonthedragon/photos/a.1418090418222084/1991251704239283/?type=3

全文 1841 字 (唔計英文、空格、標點)