(beta 公測版本)
< 返回

《唔知點評衰又衰唔晒嘅《逆向誘拐》 於是借題發揮》

作者:牛刀
日期:2018年11月23日

之前兩篇影評嘅「掌聲」都踏入200大關,反應比我想像中好,仲好過平日大多數嘅文(即係垃圾啦、趕客啦、唔夠爆啦、冇感觸可言啦、冇嘢入袋啦……喂,再數就飛流直下三千尺,疑是銀河落九天㗎喇!)。不才唔係咩大戶,已經好欣慰,實在多謝各位厚愛錯愛。

鼓勵就唔嫌多嘅。未睇嘅朋友,不妨隨心、隨量。
https://medium.com/@tseyatliu/men-on-the-dragon-film-b09c6f63860f
https://medium.com/@tseyatliu/distinction-fei-tung-fan-heung-movie-9dc9418efaa1

兩套都收得,就更加欣慰。《逆流大叔》一鼓作氣上足三個幾月,冇耐先落畫(好似上星期三14/11?),呢期又出埋書,點一炮而紅法唔使多講啦。《非同凡響》成就非凡啊,迴響超乎預期,嚟緊仲會喺台灣上映添。希望可以同步過冬,過埋出年啦。話時話,某戲院24、25號嘅放映分享會都會分別以呢兩齣電影做主題㗎,即係仲有機會喺戲院度睇《逆流大叔》!——如果你之前報咗名嘅話。

https://www.facebook.com/MiniMovieCompetition/videos/496460484184808/
導演陳詠燊細數拍攝《逆流大叔》遇到嘅困難,又借最近執導嘅《百年樹木》MV,講解點樣喺現實局限之下運用技巧(偷雞),好正。

---

言歸正傳。有like《非同凡響》嘅專頁嘅話,其實都好易留意到專頁有時都會宣傳同為高先發行嘅《逆向誘拐》,仲設計埋crossover小劇場添。該戲演員岑珈其、陳曾寧亦都喺《逆向誘拐》飾演商業罪案調查科嘅後生警員仔。與此同時,《逆向誘拐》同《逆流大叔》又有啲拉掕噃,事關導演陳詠燊都有份編《逆向誘拐》。電影宣傳都實行出動「雙逆齊飛」牌頭,甚至憑《逆流大叔》飛尾有折咁話。

宣傳嘅另一重點,就係「燒腦」。港產推理片,無疑係幾吸引嘅。所以8號第一日公映就入場去睇。結果……失望就梗㗎喇,但係恕我眼拙,又睇唔出佢爛到貼地。

論推理。點解要sell燒腦呢?唔知原著本身係咪已經有缺陷。

- Whodunit(邊個係內鬼)
出晒面,幾多煙幕都無補於事。

- Howdunit(條橋——*小心劇透*)
服務式住宅(service apartment)「密室」當綁架,雙重逆向(明A暗B、機密文件從未上載所以根本冇構成「失竊」)。弊就弊在更絕,懸疑都唔夠強。另一方面,電影winner takes all嘅設定一定可行同美好過現實嘅。食住兵仔阿植嘅情愫,梗難唔到女神啦;網絡動員到小輪示威者亦只不過係順水推舟;再借埋牧野過橋,都係些少花式啫。但係要公司、client、植家幾方都白癡,跟手算到或者知道高級督察唐輔一貫戇探發揮兼兵仔性格,特登捉老鼠同班手下入米缸,又要隻老鼠蠢到head住睇個樣就知做得嘢嘅Ashley(蔣祖曼飾演),卒之白癡埋一份,呢下主角光環同巧妙平衡先難。神科人神咁款嘅操作,其實多得極大量豬咁款嘅對手大大力配合。唔係邊得嚟千秋萬世,一統江湖吖。另一part理應燒到腦嘅,係原著入面嘅金融概念,但係電影兼顧唔嚟吖嘛,最多咪借唐輔把口去數Irene佢哋交代不詳不實,矇騙小股東好冇品。又如何?

- Whydunnit
咁所以,背後訊息做晒重心,既係導演嘅用意,亦係推理鋪墊上唯一比較實際可行之處。於是你知道導演同編劇用心良苦,的確將劇情移植到落去香港嘅環境,寫返順佢,唔係齋靠經典景色當係草草搭個台就算。既然漏夜拍鐵路場景得唔到幾多配合,就等天星小輪成為貨真價實嘅圖騰,仲食正填海議題,貼身到不得之了。大數據時代嘅監控預言令人諗起Minority Report——而且仲可以加埋crimethink添。另一方面,「仍然要相信,這裡會有想像」,要決定由得科技監察異見者乃至公民,定係用作監察政府嘅工具,繼而令到資訊操於政府之手而封閉,定係公開透明,化作尚方寶劍、護國神器。

目的講fun講理想,唔為短期私利,聽落真係似未瞓醒,青春(又名戇鳩)到未受「大人」作風渲染,難怪係napping kid。偏偏社會就係最需要呢種赤子之心流熱血嘅人——有血、有汗、有淚、有氣、有力、有性、有童真、有激情、有理想嘅活生生嘅人——去做出色過「大人」嘅大人。又偏偏「大人」殺子「殺得性起」,將世代之爭放大到勁過電影嘅層次。「大人」唔只自私,仲擇「愚」固執、扮開明、零體諒。怪獸家長催谷小朋友高壓競爭,似乎樂此不疲。唔少舊電池明知制度破產,眼見畫皮撕爛咗,仲妄想為「民主回歸」美夢還魂續命,不惜閹割思想,自我設限「DQ」自己,賴後生冷感屌晒票咁款,仲搬龍門踩返自己昔日endorse過嘅所作所為;對「美帝」陳情呢,依然苦情家嫂上身,小罵大幫忙。試問心胸思想肯包容嘅大人如李怡者,又有幾多?莫講話好似七十後Zachery做到同八九十後嘅橋樑吖 ,淨係講好似仲肯聽人講嘅六十後唐輔咁嘅,又有幾多?細路無辜辜畀時代揀中,後生並唔係挑起世代之爭嘅罪魁禍首,更加唔係原罪,反而深知道群同此心,先集到氣揭竿而起,發動跨越世代嘅時代革命。「呢個世界唔應該係咁。」希望異口同聲,跨代同感。身為九十後,仲想問一個問題:點連繫零零後呢?

---

好啦。相信各位讀友都會明白,我唔係指套戲差到我唔知點評好,而係我諗唔到啲咩新觀點新角度去評啫。

眼見正負評參半。若然入過場,愛之深,責之切嘅話,又無可厚非嘅。

(真係想睇先撳啦,01嚟。)
//港產片近年成為新導演的發圍基地,不過這種說法也不能不停販賣,就陳詠燊是當中的「既得利益者」,也覺得有問題︰「在普羅大眾心目中,港產片已包裝成新導演的勵志故事,但我覺得需要大家更多支持,不想仍然停留在消費奮鬥故事,電影應該只有分成好睇和不好睇。」//

總之,唔知邊一邊先能夠笑到最後,只知留到片尾有彩蛋。循例分享啲花絮、花邊……花乜都好啦。

//自己欣賞嘅影評//
https://medium.com/movies-on-my-shelf/nappingk-6f3453dc04c7
https://medium.com/@Altia/%E9%81%B2%E5%88%B0%E7%9A%84-%E9%80%86%E5%90%91%E8%AA%98%E6%8B%90-57af56e16249

//有心人嘅導賞團後記//
https://www.facebook.com/groups/filmpilgrimage/permalink/1967615446656967/
https://www.facebook.com/groups/filmpilgrimage/permalink/1968083456610166/
https://www.facebook.com/groups/filmpilgrimage/permalink/1969188689832976/
https://www.facebook.com/groups/filmpilgrimage/permalink/1970462723038906/
https://www.facebook.com/groups/filmpilgrimage/permalink/1971741906244321/
https://www.facebook.com/groups/filmpilgrimage/permalink/1974191745999337/

//配樂//
我未睇製作日記 (https://blog.hkmovie6.com/%E9%9B%BB%E5%BD%B1%E7%86%B1%E8%A9%B1/%E9%80%86%E5%90%91%E8%AA%98%E6%8B%90%E9%9B%BB%E5%BD%B1%E8%A3%BD%E4%BD%9C%E6%97%A5%E8%A8%98%E4%B8%80/) ,但係我感受到導演喺好多方面都好努力。其中一樣努力完而有成效嘅,係配樂。

- 改編
《差一點我們會飛》、《The Best is Yet to Come》,同埋最得我心嘅《Made Of》

- 原創音樂
呢篇講晒,作者仲好有心核實歌詞:https://medium.com/@daisymarisfung/%E9%80%86%E5%90%91%E8%AA%98%E6%8B%90-%E4%B8%89%E9%A6%96%E5%8E%9F%E5%89%B5%E6%AD%8C%E6%9B%B2%E5%90%84%E5%85%B7%E9%A2%A8%E6%A0%BC-b5dbbbe79789
欣賞導演黃浩然粵語入詞嘅嘗試。其實兩首主題曲都劇透得好緊要——唔計牛屎蚊香啦。 LOL
Dear Jane《壞》bridge有句「你太壞(kwaai4)我變壞」,一頭霧水嘅朋友睇完解釋應該會明晒。 :)
https://words.hk/zidin/%E5%A3%9E

//原著//
文善嘅原著小說好搶手,大學圖書館同公共圖書館都畀人借咗或者預約咗。據聞小說會着墨喺金融概念,不至於好似電影咁為咗顧全主線而被犧牲。唔知燒唔燒到腦呢?

全文 1930 字 (唔計英文、空格、標點)