《荔月訪書亦訪人 書業行行重行行：記灣仔兩場書展及通用圖書開倉，插論香港書業》

喺有意無意之間，等到曲終人散先寫，等等下仲等到通用圖書開倉原定嘅最後一日，一次過出。
---

【兩場書展 思緒萬千】

我都估唔到今年會去貿易發展局假會展主辦嘅書展。須知道，散貨場都算係修羅場，「他人即地獄」，人山人海，接踵而來，點樣抵受得住，大哉問也。我由2010年去到2016年，每年越行越快，避書種避書店，冇行勻全場，免得眼冤心煩。直至上屆以「旅遊文學」為題，覺得冇賣點可言，當局推介嘅作家又唔係全然扣題，再冇動力趁墟。輪到今年，主題為「愛情文學」，似乎唔再跟「年度作家」只限一人嘅玩法，大雜燴亦溝唔出年代同派別上似樣嘅光譜，已經唔知做咩事。況且我根本素來唔好呢味嘢，所以又係冇意欲去。有啲朋友有免費飛甚至參展商證，我都冇問到佢哋。

突然轉軚，緣於星期五同班朋友提起「慢漫遊書世界 — — 香港獨立出版迷你書展」 (https://www.aco.hk/single-post/2018/07/21/慢漫遊書世界-香港獨立出版迷你書展) ，然後有兩位連埋我索性約翌日下晝，拜訪灣仔富德樓艺鵠書店觀展。咁我就諗嘞：嚟得灣仔，唔爭在順便去埋會展嗰邊啦。咁先打算下場入去。

富德樓唔難搵。我之前未上過呢間咁骨緻嘅書店，今次都係多得朋友編輯嘅文學雜誌《Sample 樣本》(https://www.facebook.com/samplemag.hk/)都有參展，宣傳過嚟。打下書釘，睇下明信片，涼下冷氣，行下坐下，靜靜雞傾兩句偈，一個鐘太快過。睇得最耐嘅，係2012–13年間出版嘅《棚屋上下》。呢本書以大澳棚屋為專題，可以配合介紹大澳風俗嘅書籍，最難得嘅係圖文記載到棚屋結構嘅演變。嗰度都有同電車小叮同系列嘅童書。

---

行完食咗啲嘢，其中一位另外有事走先，我同剩低嗰位喺四五點先入去灣仔會展捧場。今年書展，連埋5樓嘅運動消閒博覽一齊舉辦。我對運動消閒博覽興趣唔大，不過都陪朋友上到頂先，八一八、擸一擸啦。入面攀石、VR射箭遊戲都係針對小朋友嘅，睇個款都係想食住一眾家長條水。

分道揚鑣，各有各行，我就直落三樓，途中影張鳥瞰圖。

展覽我睇得唔多：主題相關嘅我置之不顧，湖北行、《國家地理》雜誌「絲路光影」兩大專展走馬看花，反而「文藝廊」以粵劇為題，私心覺得值得駐足，點都勝過今年主題。撇除行會宣傳，仲有伶伶仃仃「發配邊疆」嘅戲曲中心hidden agenda懶軟性宣傳，展覽不過不失，靠晒藏品穩住身價：阮兆輝、呂洪廣等大老倌借出戲服，八和會館亦展出劇本泥印本等，在公在私合製豉油雞；收藏家吳貴龍、岳清兩位珍藏更加居功至偉。明明大可介紹埋幕後種種，偏偏欠奉，令人費解；服飾、樂師不在話下，最起碼編劇都應該佔一兩塊展板吖。整體而言未至於冇得彈，但係我都怕冇得老調重彈，唔知來年何以為繼。

展覽廳內避開文儀用品、兒童專區同宗教專區，冇耐就行完。首先買穆琳醫師嘅《病床上的選擇權》。平日間唔時有睇佢嘅文章，筆觸送暖，不乏省思，而且有見過面，略有交情。搵書嘅時候，幸得台灣嚟嘅負責人指引。佢好和善。隨後落一樓，有得直入中門Hall 1C，對住明報，唔使經三中商先。

今年收穫冇乜新書，除咗《病床上的選擇權》，就只有鄧思穎教授嘅新作《語法分析》，乃繼《粵語語法講義》之作。喺城大出版社、花千樹同埋一啲標榜學術書籍嘅攤位執到平書，係意料之外。亦都買咗一套影攝食（盧建民）「睇住香港」嘅明信片，聊表心意——雖然有衝動寄信畀一眾靈魂高潔嘅囹圄中人，但係每次都唔知寫咩好。

行到次文化堂攤位，心情就開始曳。聽見某二人直播將箕子變「期指」、夫子劉銳紹宣傳自己啲書話「洗返年青人腦」，少少（淨係少少？）反感，都係小事。喺夫子面前揭開《香港粵語撐到底》，查下陶傑篇文嘅題目，一見到係先前五月嘅〈普通話是低端語言？〉，當堂「吖」咗聲走人！對正夫子同社長彭志銘喺度都咁話——我本來就對彭文抄公啲「正字」「考證」不以為然㗎啦。啱啱一查，見報紙話本書大賣添，死未？！「Unhealthy wind」之熾，無日無之。有時火火哋，真係寧願大眾高抬貴手，咪「撐」粵語好過，頂櫳買下週邊產品，好似當日左近擺賣嘅港語學「撐粵語」袋，咪算囉。

//陶傑喺《光明頂》同《蘋果日報》專欄傳謠播毒，繼自瀆潮文誤引偽託專家金啟孮所作嘅謬論。係咪我睇得書本同傳媒公器太重要呢？
歐陽偉豪博士話語言冇分高下只分輸贏。呢種係詭辯。我就話：人品有分高下，形勢有分輸贏，道理有分真假。諗深一層，其實認真一早就輸咗啦。//
https://medium.com/@tseyatliu/manju-gisun-%E7%82%BA%E6%BB%BF%E8%AA%9E%E7%A0%B4%E8%AC%AC%E4%B8%A6%E5%93%80-febff1a9f0b

繼續行程之後，聽到homo之後唔識讀、「劉以」跟住老作個音……都係算啦，鬱鬱寡歡又有何用？餘途仲遇到滄海遺珠，又偶遇新聞處攤位美女音容聲色雙全，算係咁啦。我諗而家佢應該冇作病，唔會再流鼻水嘅。順帶一讚攤位人員主動開口介紹書籍——對我嚟講，真係要撞正心情靚同觀感好先讚得落。

另外記其後嘅一件小事。去花千樹睇到《禪心劍氣相思骨——中國詩詞的道與法》，自問不工詩，更加唔熟詞，入咗本。冇耐經過救助兒童會攤位，聽到姐姐仔叫人簽名，留啲打氣說話畀患病嘅小朋友，睄過去嗰下，同姐姐仔四目交投。佢主動撩我傾偈，我應佢所邀，就學佢話齋整個「加油」心心，全程被動陪傾。大家都以為對方細過自己好多，佢估唔到我畢咗業做緊嘢，我冇諗過佢大我一年。講完本科，話題又攋到去我買咗咩書。我話樣樣都睇啲咁啦。嗰時仲拎住詩詞本書，未放入背囊，於是舉嚟做例，揚咗揚過佢睇。事後回想，貌似作狀。佢睇嚟有啲詫異於有人會睇詩詞呢類，反正此舉不離文科人嘅典型形象。佢接住問我點解鍾意睇書。我好行咁答想學多啲嘢，增廣見聞就算，陶冶性情都冇提，再講就唚㗎喇。我還返枝筆，佢應該會意，正好作結，祝願我有所得着。我一句「大家咁話」，報以微笑，轉身離去。

嘩，上面呢段真係同我個人一樣咁悶。性格問題撞正唔起勁，係咁㗎喇。

喺角落毛記兜返個靚彎返嚟，掃埋另一邊，去返明報，㨴呢兩本睇：Ben Sir《廣東話要我》（共兩集）同埋「無敵神駒」仇思達嘅《粵難粵愛》。

《廣東話要我》相信係見Ben Sir條片爆紅而乘勢推出，重印《撐廣東話》、《粵講粵法》為主，加若干新文。《粵難粵愛》分成「聲聲入耳」、「振振有詞」、「形形色色」、「烽煙四起」四章，講完讀音、聲調，講生動盞鬼嘅詞彙語句、得意過癮嘅語法特色之類，最後就係一啲評論，當中零零舍舍有一篇寫熱血時報收睇率篤數，同主題毫不相干。平心而論，正常發揮之處唔算少，例如愛母語不以優越高低論。難以費解嘅係，鞭撻「正字塔利班」嘅時候明明睇得通透，就算繼而由書面去到口頭，都係採近似角度，不齒何文匯「正音運動」拘泥宋代韻書《廣韻》，「攞明朝嘅劍斬清朝嘅官」，偏偏去到l-、n-不分嘅語音變遷趨勢就不以為然，對於語言演變嘅觀點忽然間唔適用咁款。姑勿論「懶音」呢種主觀睇法無法解釋漢語族其他語言l-變n-、-in變-ing嘅「繁化」現象（詳見張洪年《一切從語言開始》嘅闡述），原則上，對l- / n-、ng- / θ、-ng / -n、gw- / 二五調、三六調合流徵兆等等嘅語言演變未能夠一視同仁，咁只係變咗做冇咁誇張、冇咁「原教旨」嘅何文匯。歷史進程上，我哋又係咪以同一目光，排拒現時早已合流嘅語音特徵？高平、高降兩調，係咪要分返開？高元音[i]唔好分裂做[ei]？（「死」有時仲會讀「史」）舌尖、舌葉塞擦音同擦音唔應該合流啦下話？[ɔm]（紅磡、大磡、橫頭磡個「磡」"Hom" 同埋奄由個「奄」 “Om”）、[ɔp]（合豐鐵工廠、和合石、合心堂、合群街個「合」 "Hop"）係咪要好機械、好硬生生咁恢復返？（詳見片崗新〈“香港政府粵語拼音”：一個亂中有序的系統〉 (http://www.cuhk.edu.hk/ics/clrc/crcl_93_1/kataoka.pdf) 現象上，n-讀l-喺1960年代已經出現（可以參照教大語料庫啲粵語長片片段入面，演員係點樣講「你」），已經唔算係新出現嘅「趨勢」。唔使攻心為上、形而上、皇天在上、以下犯上，繼續乜上物上，都好易諗得通、睇得透啫，係咪？我另一樣好奇嘅，係神駒對粵文嘅睇法，可惜書中未有論及。我記得有次聽佢網上直播駁陳雲所謂香港「官話」說（陳雲好無厘頭咁攞咗Mandarin個名指涉「官方語言」"official language"），講到條文同習慣上都冇指明法定語言「中文」嘅口頭形式係邊隻，其後就好離奇咁話粵語唔寫得，只係口頭分支，仲硬套所謂「語言」同「語文」之分。但我惟恐記憶有誤，不慎有欠公允，加上冇咁好心機追返，喺度就唔長篇大論喇。

//語言流變方面，想速食嘅話，睇呢條片啦：https://www.youtube.com/watch?v=JgXn_ykJOaE//

行到三中商。三聯出咗兩本講字體嘅書，其中一本《霓虹黯色》，仲要係我朋友有份插畫。即使係咁，由於性質偏近工具書，而且視覺藝術非我所長所好，我尚且都可以忍手。但係思穎老師嘅新作，我冇辦法唔買。係啊，同上本一樣，都係商務出嘅，而我又唔等得，所以當場買咗。

https://www.facebook.com/beiweizansyu/posts/208535119813637?__xts__%5B0%5D=68.ARCuxzH8yOiS1n0wSWN9hLvuhL6aQXt3mLpcX6nzhOk0ASpPrIJCKm_EAOVqnQJZm3Kb1SVByL0_cIKUGiBoQtp0SndcP3amC8dlSXgGtU5Kd3hxQZYr5EORXSGA1TAtiQ_K_9g9AvO1OKpeNj6bXM86cHFyrN54Z3tjGdRMaHTcPRzuWsTFYfwWLf5ij72Masov7OpMTFWzb7VyX941NtdyuWCEh4CdhwnS3IV0PZoTsG1gucUPIOjtMrbLFg92iSdN9iLBAtfIm9o145Z5o4lR9x5508R_c9JQmgVmqs0BpwdMK4dOiFTi_ASMxCoEZ-WTs-Yb8MBVyZc338Uep2A&__tn__=-R
https://www.facebook.com/hongkongneonlights/videos/1761598823888024/
上年理大設計學院籌辦「字城」展覽，幫手插畫嘅朋友都有參與其中：https://medium.com/一多相即/小城故事-字城-展覽後記-5189541a3a7b

聯合出版集團勢力盤踞經年，更何況佢喺文教事業以外仲有大把油水路數，淨係印廁所板呢啲防務都夠做，國家級任務梗誇過世界華文嘅《明報》同翠明假期啦。言歸正傳，發行銷售呢一環，尚且可以去舖面淨打書釘唔幫襯。出版呢一環，就真係持久戰嘞。學術方面，聯合系單憑主打教科書嘅教育圖書，繼而搭上搭，要掌控住主要嘅學者網絡，等三中商、中和時不時出到啲學術書，其實唔難。臭味相投、「沆瀸一氣」者，更加大有人在；淨係歷史呢瓣啊，丁新豹、趙雨樂呢挺都唔少啦。唔計次文化堂、花千樹呢啲靠friend底老本（仲要只係有學者，未必係學術書），天窗系能夠有力凝聚到，其實都幾犀利。至於珍貴嘅獨立聲音，靠非主流出版社出版，反而係一種可塑嘅定位，亦一幸也。

有志向嘅出版社，值得鼓勵。市場需求就係最好嘅回響，課金就係最好嘅回報。早前 (https://medium.com/@tseyatliu/%E7%95%B0%E9%A1%9E%E4%B9%8B%E7%AE%A1%E8%A6%8B-54a7b71f7bdf)，釀字工房出版粵文小說《我係窮郵差，專門幫陰陽相隔嘅親人送信》，我已經介紹過，仲買咗本。當我六月見到呢間新秀出版無待堂主盧斯達嘅《我迷失在這場殖民遊戲》，書種有得闊落去，遊走埋文娛消閒之外，咁有潛力，我真係幾驚喜下。呢本書新鮮滾熱辣，連五月「粵語非母語」爭議嗰陣寫嘅文都有收錄。我六月就已經買咗。知道嗰日咁啱有作者簽名環節，我就帶埋本書嚟。觀展最後半粒鐘，就係邊㨴詩詞本書，邊等簽名環節。堂主差唔多時候就到場。我一路排隊等簽名，一路後悔點解咁衝動買咗先，冇得折多啲。不過差唔多輪到我嗰時，都係摒除雜念，專心會面，寒暄兩句。最後出去聽人獻唱（可惜唔記得表演者個名），聽咗陣就走人。

尋覓「香港書展」嘅意義，係相當民間自發、個人隨心嘅事嚟，譬如可以嘗試同人多啲交流——原來要包裝到咁正面都唔係好難啫。而文化機關缺席策展，旨意利潤掛帥嘅貿發局，其實係九唔搭八，一廂情願。單係財雄勢大、壟斷市場嘅集團，長年受惠於超穩定機制，攻佔入口位，意圖早着先機，飲頭啖湯，經已可見一斑。將貿發局難得做得好嘅地方當做書市客戶驚喜體驗，會開心得多。況且老老實實，喺當今形勢底下，政府插手文化界，唔慌冇人信冇乜好事發生。莫講話開設專屬嘅文化局吖，就算民政事務局叉隻腳埋嚟，都唔會得到信任㗎。難免有人會好現實咁認為，不如都係有得泵水，水喉長射，繼續「自由放任」、「無為而治」好過。身處會展呢個橋頭堡，雖然會為彼方小天地嘅清新可喜而欣慰，但係諗到隔住嘅鴻溝遠超一道鵝頸橋，不禁為香港書業興嘆。巨人當前，反勝雖不可即，又會否可望可期？至少要創作、譯作、文化活動不綴如星火燎原，團結到有如台灣同業，消費者、作者、評論人都有自覺先。

唔知各位有咩高見呢？於我輩而言，推廣粵文，喺市場定位上正正就係專攻粵語消費群，置諸香港書業，具備市場效益，不失為一條特色出路。本地為本位，自然先以香港為主，扣連本土情懷及視角，幅射遠揚則為後話。既然如此，好應細想點樣行多一步，滋養自己又同時奉獻大環境。呢樣理應係同道嘅抱負，出自真誠。戳力同心，何愁大事不成？

（利申返：提起朋友唔係想拉關係，只係我啲朋友都好叻。識到佢哋，三生有幸，亦樂見佢哋有所成。況且點都有趣過提我見到邊啲名人多多聲。）

---

【開倉尋寶 唔只地圖】

星期日同朋友行街食晏，輾轉九龍多個旺區，最後一站係尖沙咀誠品。我浸過散貨場嘅書海，經歷過書市嘅洗禮，唔似得朋友忍唔住手買書，購買慾又膨脹起嚟。搭地鐵嗰陣醒起通用圖書開倉，好彩仲去得切。

https://www.facebook.com/upmap/posts/2028251120605463?__xts__%5B0%5D=68.ARDXnt7Lpu2Z82sTF_psRVLk9Zv8Iyv-isPjQIBNDzZPDqUpUIKpd43lH2UIBChSUCJrSx_9GeHqAjiv_uax3c8K1dXUIUvhli7Aysm5qSZJnFYygiUaO0VinsCFiHaEXeDaVZ3mTyibxKdohjHrxPd4nApoPtAgSGp4HP3SlJUSqJuPodzE0g9fQ5XYxo3Sst0N9MbBlx6EJhVfJfQQJ32h54516QwEYw1tSAm-S85Ii8kHS6cWbb6oCTC-qb4pqccVcHTQIw_6x3MwEv2yYbHGQpJ7dS3xIGvCDcBvPFwnweQI9YpNFoMmpqyc3cpLe2SDL-gT27NROc4UI4i7KQ&__tn__=-R

行到樓下，見到：
行到樓下，先見到話延長。下附官網圖。

延長係好事嚟嘅。我仲可以多多推廣添。嗱，大家可以參詳下面啲相。另外仲有少量其他種類、唔係通用出版嘅二手書，例如有韓寒《他的國》港版。

https://www.facebook.com/upmap/posts/2046321362131772?__xts__%5B0%5D=68.ARACxWSf_iIAnkO69pZ0QKU68R8F2ZdSrM36-H0zBkB8zHxI7Ud1zjBxC6fuhkHY1s0uxxOiIdL2aH78M0oCgh0R6tF6zSYhIetJ1NPanNvzFxc0OfSs62_Auv04twUuPfMjD-10y2qcZIUF91224KJFNCTbLVjq9ocBedDgeUeMdGwei_3u0SOB5XRD0q4zmSkoe7xB78YsDIAB5UL9YgiHhTFdtjS-HR6-P3AiJEkisH6xWvL2lJqKQGJFR5YI1ohv_5bFsTcR7dTANkCzYHjnuLas4HyHy0pIPYUqc068FOvr_Hzy7pFJM88me05Yf7FSP9wRuLWbrqEWtHPS4QTpmm8lgNZSr_4RSmB_STa4dBZ3ExVkwlYxVI5Hp1WU2tDdRXe2PXhrBUsuELSU-RmjlVscTOlH0Okd4mMy_l6V0QV1iBHbB0xJMLlDzmXYvb9cpoJTUBBgsCZrc07p&__tn__=-R

我唔係地圖迷，結果買咗一本舊英文教科書、一張1996年製嘅五十年代港九地圖，仲有沈思先生編著嘅香港旅遊系列新界篇。喺舊英文書，我睇到更加全面嘅教法，着重埋讀音，會留心th等輔音喺唔同單字嘅讀法分別同埋-ough之類嘅「蠱惑」位，仲會真係見到顏色教埋mauve（粉紫）等等。舊地圖反映舊時地名英文拼寫同埋地貌，例如灣仔迪龍里嘅約略位置同長短。喺旅遊書可以睇到某啲名勝嘅舊時風貌，例如未擴建之前車公古廟嘅近相，喺公共圖書館多媒體資訊系統都好難搵到。抵收藏嘅。

---

【推薦書目】

最後額外加多一節，推薦新書。先旨聲明，我未買，仲等到吖嘛，唔使趕。諗起中學時期，我仲主張過出版界休業一年，趕時髦者例外。

《香港粵語大詞典》，張勵妍、倪列懷、潘禮美編著，天窗出版，又一功德。客套話唔多講。互相砥礪。
https://www.cosmosbooks.com.hk/index.php?route=product/product&product_id=988854706

淨係2010年代嘅粵文書籍，我都仲未下定決心儲齊佢。創造館（即係史兄合作開間出版社）就唔使多講啦，今年仲有一欄寫住「香港人至睇得明嘅粵文作品」，如此定位雖然妄自菲薄，但見粵文抬頭，自然可喜。「做金庸的男人」嘅小說，我都應該留意。

今年仲有粵語科普添啊！
卡通生物科技 香港中文翻譯版
譯自：Biotechnology in Cartoons (Springer International Publishing)
作者：任能博、白克菱
翻譯：麥嘉慧
插畫：周明輝
出版：Timmic Visualization Ltd
國際書號：978–988–77834–5–9
http://chkaren.wixsite.com/drkarenmak/cartoonbiotech

就算我係幾咁唔忠實嘅夕迷、幾咁三腳貓嘅詞人，都必然唔會錯過夕爺嘅《別人的歌》。有初生之犢嘅猛勁同憧憬，亦有放開懷抱嘅詞評。

訪問摘要：
//「還有，書中提及過不認為歌詞適合寫非常複雜的事。現在人長大了，更想透過歌詞寫人世間最複雜的事情，覺得天地萬物無一不可入歌詞。無論是最貼地的生活細節，或者上到天那麼高的生命探究，都可以成為擴闊歌詞題材的材料。」
「以前對歌詞要求彷彿有個共識，抒情就是要抒發一種情緒，哀傷就哀傷，哀而不傷太複雜了。人生哲理之類，提出了問題，就要給一個答案。今年很想填詞人可以扮演到建構大觀園的工程師，就是什麼人入去歌詞這大觀園裏，可以看到什麼就是什麼，全憑聽眾自己親自體驗。例如《任我行》，到今日仍然有人問，究竟我想說獨家村好還是跟大隊好，我的答案是：每種選擇都有收穫與代價，這才是真實的人生。歌詞可以像小說，好的小說永遠不會直接加入作者的標準答案。」//

書中收錄嘅舊文摘要：
//「所以，雖然填詞苦得尷尬得有如賣淫，我還是不敢妄自菲薄箇中的難度。希望把歌詞和其他文學形式看齊的人可以正視歌詞的特質和限制；也奢望鄙視歌詞的嚴肅文學創作人，接受甚至參與此等勾當，把音樂和文學結合的好處帶給更多平凡的人。
「通過被虐滿足私慾而娛樂他人，總是好的。」//
https://news.mingpao.com/pns/dailynews/web_tc/article/20180722/s00005/1532196973597

黃志華前輩回顧參賽嗰時嘅林夕同埋同代人：
//一路寫來，我們見到盧永強、梁偉文（林夕）、梁美薇（小美）、馮德基（馮正）、古倩雯（敏）、林志美、潘源良等等創作人的鋒芒初露。可見 1979–1982 年這四年間的歌詞創作比賽參賽者，真是臥虎藏龍，當然，這實在也說明了，粵語流行曲在七十年代中期振興後，是孕育和催生了不少歌詞創作人才！//
https://thestandnews.com/culture/80-%E5%B9%B4%E6%9E%97%E5%A4%95%E5%B7%B2%E7%A8%B1%E5%86%A0-%E8%A9%9E%E8%B3%BD%E8%A9%B1%E7%95%B6%E5%B9%B4/