《香港旅遊賣乜好 — — 商場、街舖、生態及風俗嘅粗淺面面觀》

台灣某啲眷村嘅卡通彩繪，反而冇乜凸顯自身特色，吸引唔到我入去睇。但係人哋畫卡通人物都唔會齋畫一個吖，邊似得香港商場倒模咁款啊？自問商場行得少，都覺得厭，有時重打埋喊路。屋邨商場唔死都七勞八傷，已經無謂提，「士紳化」呢啲根本係鬼話，邊忽似士紳？（睇香港購物商場的歷史與論述 (https://www.facebook.com/ShoppingMalls.hk/) 先冇咁灰咋。）

據我觀察，冇倒模嗰啲，有兩種。第一種多數都係啲稍為噏耷嘅細商場，咁先冇高檔嘢、貴價嘢、名牌嘢，如今買少見少，賣小大有可為。《老子》「失道而後德，失德而後仁，失仁而後義，失義而後禮」呢句真係萬能key，放落expectation management都得。沙田某間都OK，葵廣次之，荃灣大窩口嗰間勉強，美居就貪佢間M記啫，深之城就真係廿八座大王——冇人識佢喎，蒜狗掃把啦狸。另一種就有特色。黃金高登專賣電子嘢唔在講。西九「蘋果商場」啲格仔舖，分租畀細商戶，的式舖仔賣的式嘢，都吸到啲客源㗎（有冇學生妹睇呢就冇研究過 XD），重有每層車仔舖都未同你計。南豐啲舖都夠多元，揀禮物又得，未出路德圍已經餓你唔死，再唔係去商業大廈嗰邊搭lift上「我的書房」囉（之後搬咗去太子嗰頭。可以睇下低舊文。）。
https://medium.com/@tseyatliu/%E7%86%B1%E6%83%85%E6%9C%AA%E6%AE%86%E7%9B%A1-37504c53ce47

租貴就遭殃。咪話商場啦，街都係啦，都唔係路嘅。唔講鬧市，珠仔街街尾近年少咗布疋舖，多咗啲食肆，有啲好似X洋重要係連鎖；藥材舖請埋中醫睇症幫補，都頂唔順加租執咗，輾轉租嚟賣鞋、賣菜。邊係路啊？

呢啲唔係粗放型經濟咩？多快好省搞咩生態遊吖？Eco-tourism? Econ-touri$m 咋。《四分之三的香港：行山。穿村。遇見風水林》介紹嚟把鬼咩？搞咩文化遊、歷史遊吖？懷咩舊吖？情咩懷吖？「為兩餐乜都肯制前世」啊，知冇？

唔係睇長洲太平清醮、大澳遊涌、大坑舞火龍呢啲特別啲嘅節慶活動嘅話，其實睇神誕就區區都有嘅，離島風情多選擇，廟宇遊都遊餐飽。當然承受力係另一個問題啦，長洲、青衣有板睇。平時少行山嘅我都唔想撞到成村遊客，寧願自私行。不過點都唔夠畀出面定晒型咁慘（例如日本旅行社啲離地介紹 (http://forum14.hkgolden.com/view.aspx?type=CA&message=6358436&page=1)……睇香港魂(https://www.facebook.com/hongkongsoul/)好過啦）。賤啲講句，都係出賣色相啫，偏偏唔用懷舊、自然吊人癮。唔吊高嚟賣不特已，好哋哋貼埋大床畀人SM喎。你收錢就爽咋，擾亂晒社區啊，搞臭香港個朵啊。

（修改自2016年5月2日面書帖文。標題後加。呢輪又咁啱輪到土瓜灣同紅磡配套未完善就應付短途客潮，僧多粥少，擾民為患啝。）