《日出別話——《日出前讓戀愛終結》歌詞擴寫》

話咁快就日出喇。呢次係我最後一次喺度揸車走。

成晚你瞓得特別稔，冇皺到眉，有時仲嘟起個嘴，個樣始終都係咁得意，稚氣未改。如果唔係因為我，你面上肯定毫無煩憂，仲會笑得好甜，就好似初相識嗰時咁，足以喺我腦海留低烙印，俘虜我嘅魂魄，將脈脈溫情注入我嘅心田，為我嘅生命添上色彩。

或者呢一刻就係最好嘅時機，咁樣你先捨得我走，如果唔係你就唔似得我一樣肯捨得離開你。不過我又何嘗捨得睇到你喊呢？其實我鼓唔起勇氣留低。我想你珍重，放低對我嘅期望；我唔想望到你醒咗之後見唔到我，淨係睇到枱頭擺低咗我最後為你寫嘅字條，忍唔住痛哭，傷心欲絕個樣。我喊住咁諗：相見不如不見吖嘛。靜靜咁望你一眼，輕輕咁轉身而去，從此唔再出現喺你嘅人生中，係我最後可以為你做嘅事。我知我應承過你，我會喺你醒咗之後，第一時間出現喺你眼前，陪住你渡過每一個朝早，但係我而家做唔到喇。諗到呢度，我忍唔住苦笑，個心揦住揦住，繼續為你默默垂淚。

我由行出你屋企門口，到到上車，都仲未收拾到心情。話咁快就日出喇，落寞嘅面孔消融其中，熱淚不止，淚痕依然，索性開車向目標進發。淚眼只見前路一片光明，前塵畀日出掩蓋。