《牛刀詞評偶拾：《歡樂今宵》》

#我到底講緊乜 #開頭咪好地地

古巨基嘅歌當中最鍾意嘅一首+1，仲要係飲歌，所以之前先惡搞得咁輕鬆。
https://www.facebook.com/bullsword/posts/384523418408440:0

冇記錯好似話佢嗰排感冒，用假音唱，首歌紅咗之後，佢就保持呢個特色。假音氣比較虛，幾襯「虛無縹緲」吖。成份詞，由不捨到終須要捨，從實到虛，意境淒美，實在係K場掃興必備良曲。曲式簡單，樂句重覆，係唔錯嘅小品。淒美編曲加分，尤其是段小提琴間奏。

整體結構冇咩好講。講返稍為熟些少嘅詞技。

（一）啱音

副歌有兩度地方，可以睇睇。佢哋都係音程短而填咗同調字。

1. 「猶如」（d-r）
我略嫌佢比起「零二」、「四三」（正如惡搞嘅「醉貓」）冇咁啱音。但係未至於完全理解唔到，淨係load到「猶遇」或者「幼於」。咁當然，配搭夠常用，都幫到好大忙。

2. 「無人」、「談情」（m-s）
「無人」呢下都危危哋，會「冒印」（「二四」）。「談情」好啲，taam6（應該）冇字，方便「聯想」去「談」。呢層就輪到音節、聲調同語素嘅關係。
再論節拍。呢度可以借用「一頓一世界」嘅講法。如果d-r-m-s中間冇停頓，緊接埋r’-d’，甚或拍子快些少，就真係兩個世界，難啲走盞。用多個例，延伸去睇節拍同音程嘅關係吖：同樣都係d-r-m-s，但係「零時十分」尾有停頓，少咗項條件，而後面冇高過s嘅樂音，s就配到「三」嘞。

其實無非想指出「三四二零/尖亢下沉」以外都容許些少彈性。而且要考慮埋【配搭常用度】、【節拍密疏】，視野先至夠完整。好啦，以上重點其實寫過……不過最近黃志華、韋然兩位前輩嘅討論，都應該同上面有啲關係。

佢哋第一項好似爭論緊「九」嘅角色，當中見得最多嘅例就係d-r-m，咁啱上面有些少拉掕。我贊同黃氏嘅睇法：「九」喺特殊情況加以搭救，但係未至於值得喺「平仄」另外分出嚟，變做「零二四九三」「五音」填詞法（用返「梳化鹿粵語五音簡易曲詞寫作法」嘅字眼），填補所謂缺憾。其中一點，就係未睇張群顯之前，我都已經同張群顯一樣觀察到調值有升（降）者，「起點」唔重要，「終站」先關鍵。「五」夠係調值上揚啦，咁點解「歸入」「四」又冇爭議呢？冇「零二五四九三」呢支歌仔唱㗎噃。

第二項就係對「粵詞平仄」「例外」態度之嚴寬。從上面啲例子，大概都睇得出，我認為寬鬆有理，毋須守墨，亦無鐵律可言。我同黃氏立場都係一致。喺度就無謂多講嘞。

（二）用韻

仲加冇嘢好講。有啲人例如岑偉宗（2016）認為韻腳有助凸顯所表達嘅情感種類。我填得唔多，歸納唔出咩經驗之談，而且呢家嘢太主觀。咁當然吹一段都得啦，吹之嘛，實得𠺝：

-in, -yun 差在有冇圓唇，可以當做同一個韻部，同樣有-n輔音尾。副歌押-iu韻，韻尾變，變做雙元音，氣流無阻，襯返捨棄放手嗰種感覺。整體呼應緊從實到虛嘅改變。