(beta 公測版本)
< 返回

《牛刀詞評偶拾:《驗傷》》

作者:牛刀
日期:2017年12月18日

https://www.youtube.com/watch?v=NGHLVq1Qu18

唔知林夕係咪真係有條自虐傻女路線畀開衛蘭啦。單睇呢首《驗傷》,其實不過不失。出返大路愛情K歌都要畀人插,仲要冇道理 (https://lihkg.com/thread/74345/page/2),一於申冤。做架両要扮下死忠先,唔使焗住畀人屈。

主角聲稱「未夠重傷」,因為「刀鋒不夠尖」,「只可惜傷害不見切口 製造藉口能叫我守候」。咁傷勢係點呢?

//我痛恨你分得太早走得冷酷
我更恨我體諒人會愛新厭舊
恨我那麼頑強
偏不夠殘存力氣放開手
要是還未受夠 也許創傷未霉爛到透//

傷得真係輕?講笑咩。

畀人傷都算,(自以為兼)恃住傷得輕,加埋自虐先攞命。「想識你女朋友」,恨(堅係雙關)到「想敲穿你門口」驗傷啊。想敲穿嘅,係心扉;穿咗,心死,就唔會痛。驗傷精細到要人哋閃光喺面前「展覽」,連頭髮都唔放過,仲好幼稚咁鬥氣,拿拿臨「我也要染金 明日便去剪」。「任我亂檢」,而唔係「撿」,唔知夕爺係咪感染埋主角嘅心亂而寫咗別字;不過又可以解讀成錯有錯着,意指檢查、檢討、檢驗,凸顯出主角有幾鉅細無遺,對自己有幾苛刻,有幾放唔低呢段已逝嘅感情。搵原因說服自己「心死得更透」,先可以成為死因。

傻女好傻豬,有動力「起了身」都係為咗驗傷。有心機「招惹別人」,名義係慶生,實質係「與你有連繫令我動心」,借佢哋做觀眾。係啊,捉埋佢哋驗傷,望真啲,究竟「我喝到半死 誰活在我心」,仲以為同另結新歡happy緊嘅前度玩施壓會有用,就好似用示弱嘅力度去示威咁。心病嘅魔力,就正如主角所講,令到主角自暴自棄,自尊盡失,「我未怕獻醜」,係差在未開追悼會咋。

主角係處於極大嘅矛盾入面,呢樣可以分兩點去講。首先拆解下「我尚有對手 這雙腿會走」。係人都知行路靠腳啦,喂咁主角家陣傷緊加嘛,唔係正常人嚟加嘛。特登提「這雙腿」,對腳喺主角心中,擺明唔係自己嘅一部份,不由自主啦。得返對手真係自己咋,仲要慶幸「尚有對手」添啊。仲有啊,主角一方面唔想沉溺喺痛苦之中,想了斷、解脫(用「自由」英文free去睇,就係free from the injury 免於傷患),仲安慰自己「寂寞多自由 不需再顧慮濃或淡妝 你不接受」;另一方面,一直都想搵「博你問候」嘅藉口「惹你內疚」,情意結揮之不去,博咩望咩心照啦,點會唔想箍煲啊?

呢個「愛新‧覺傻」嘅故事,真係明先話hea、鳩,得,我尊重,否則唔好話無厘頭、九唔搭八。其實唔難,夕爺咪又係細微處入手,肯抌個心去代入就得,唔鬼該你啦。咁簡單都唔肯領略,專貪啲高深複雜嘢。我睇死班濕鳩友咪又係handle唔到《潑墨》,玩吖,玩吖。

至於主角,我暫且以《長痛短痛》(https://www.youtube.com/watch?v=Xhk8LWdXCgg)回應,希望佢終有一日會痊癒。

01又引幾句幾句有爭議嘅夕爺手筆,又可以講兩句。有啲好似《今期流行》(https://medium.com/@tseyatliu/%E4%BA%8B%E6%81%92%E4%B9%85%E9%81%A0-%E4%B8%80%E9%A6%96%E6%B0%B8%E6%B5%81%E5%82%B3-%E4%BB%8A%E6%9C%9F%E6%B5%81%E8%A1%8C-13dc73e06a65)、《眼紅紅》,就算係鳩,睇返又明佢意思嘅。椎名林檎,可以係諧音「追命林琴」,對應返可能索到冇得彈但係偏偏索命嘅「索命鋼琴」。「愛到入城大也分開」,就唔好執意推敲點解係城大喇,搵間啱音啫,都未有「恆大」;亦都唔使拗咩「愛到入城/大也分開」喇,節拍唔啱,音步唔啱啊。藍窗簾咪藍窗簾囉,由佢啦。

最後再share返幾年前share過嘅〈林夕教你寫作文 (http://dev.qipost.com/lin-xi-teach-you-write-articles/) 〉,等大家輕輕鬆鬆又袋到嘢。

(寫於20170115,趁年尾重溫年頭嘅歌。略有編輯。)

歡迎like page :)
https://www.facebook.com/bullsword/

全文 1019 字 (唔計英文、空格、標點)