《從禁穿越宮鬥情節抑制懷舊與諷今：歷史作為當下嘅產物》

https://www.facebook.com/rose.yanger/posts/2324031720949424

文本開放，詮釋多元，本身就同箝制多多嘅環境格格不入。講到尾，只有明抑或暗、嚴抑或鬆、多抑或少之分。

莫講話穿越時空呢種手段帶嚟改變係「膽大包天」，淨係背後嘅懷舊精神，就經已「其心可誅」。懷舊，就代表今不如昔；只憑感覺，無關事實——就算過去未必真係咁美好，想像中亦只有美好。唔好笑啊，政治嚟講，香港有啲人咪又係咁。

只係，講到禁宮鬥嘅原因，我有啲質疑，係咪真係有咁多觀眾單單從衣着打扮就一葉知秋。

//甚至連滿人不裹小腳、戴耳環必須一耳三鉗這種細節都跑出來，擺明說了大清國不是跟漢人一路的，是只把漢人當奴僕的外族帝國。//

打個譬喻，就算打邊爐係文化一部份，斷估冇乜人夠膽而又有「資格」話自己觀察一下打邊爐就當堂洞悉文化底蘊、深層價值啩。再者，對我嚟講，相比起表面工夫，將「喳」糾正做「嗻」先係更加着重細節——ja係「平」（價廉，peng4）咁解，je先係應答詞。

畀我嘅話，我會吹佢有借古諷今之嫌。方丈份人好小器，小熊維尼都唔畀你。《延禧攻略》、《如懿傳》都係以乾隆帝做主角，《經濟學人》又key過後清天朝「元首」個頭落乾隆肖像度，仲唔係將「元首」同朝內中衰嘅「十全老人」相比，諷刺其人好大喜功，大行霸道，實行大國崛起，向外「開拓」（exploit），帝國殖民，詛咒新時代中國特色社會主義此路不通，招致滅亡？

點都好，其實不外乎怕以史為鑑，重溫、再發掘之後，考驗同挑戰固有中國國族史觀啫。傻豬嚟嘅，怕都冇用㗎。保存落嚟嘅歷史事實先至一成不變㗎啫，歷史有史見史觀，自有公論，同當下互動加嘛。