《高低彳亍全途上，上下徘徊半步間──從《半步詞》論粵語聲調曲調互動以及粵文前景（粵文版）》

《半步詞──由音樂劇到跨媒介的填詞進路》，係資深填詞人岑偉宗嘅著作，年頭出版咗喇。好開心見到詞人自道嘅書越嚟越多，有得觀摩。

唔少要訣出自經驗之談，例如宜填「人話」，忌「非人話」，唔會為咗遷就旋律而減卻詞嘅親切，先可以等聽嘅人字字皆曉。試問份詞唔易明，又點可以打動人心，動之以情，感人肺腑？呢層就更加考驗詞人功力同匠心喇；平白自然其實都要幾番磨練，準備絕不可免，同「台上三分鐘，台下十年功」嘅道理如出一轍。

至於字詞浪漫值嘅主張，聽落新穎；極重語感，恕難成理論，不過都係可觀嘅經驗嚟嘅。而背後所講嘅，無非都係實物印象、文化聯想啫，唔算艱深。比喻 [1]、意象，自古有之，沿用者多。脫離既有材料創作，係冇可能㗎；創作構思不外乎兩式，以李天命字眼嚟闡明，就係組合式（加加減減）、轉換式。有謂破而後立，就要有嘢破得先。人同此心，有相似情感、共同課題，而能夠有所共鳴。浪漫值都唔例外。呢樣或者可以係語用學、符號學嘅研究課題。

不過，呢啲技巧並非文中探究嘅主題；實際上本文主旨係簡單討論歌詞聲調同曲樂音調嘅關係，以及粵語入文嘅一啲議題。

粵音歌曲獨有「平仄」：「三四零二」

初初聽到「三四零二」嘅數字填詞法，係得益自「粵語填詞法」網站，後來先知呢個方法源於黃志華先生嘅《粵語歌詞創作談》。數字填詞法利用粵語數字聲調多嘅特點，將音符轉化成聲調，方便咗唔熟悉樂理嘅人，包括區區。喺探討節拍、音程等等方面嘅細律之前，姑且容許區區介紹下粵語聲調先。

一般嚟講，粵語總共有六調，亦都有人講成九聲。呢個分野係基於角度唔一樣：九聲指九個調值，而調值取決於音高同音長；至於六調，即係六個音高，入聲雖然短，但係音高同其他聲調有重疊之處，所以音高總共有六個。粵語聲調亦都有十聲嘅講法，將高降調（調值53）視為第十聲，以往有辨義作用，而家同高平調（調值55）不分 [2]，所以本文就唔採用嘞，變調喺度都唔講咁多。

跟住分別從傳統分法（平仄）同現代語言學知識表述、分辨各個聲調。

傳統分法依循如下兩項：一、平仄（上去入）四聲；二、陰陽。入聲短促急收藏，音長已經幫我哋將四聲分咗做兩堆先：頭六聲係平上去聲，最後三聲就係入聲。非入聲裏面頭三個係陰（高音啲），尾三個係陽（低音啲），按次序就係陰平、陰上、陰去、陽平、陽上、陽去。入聲之所以短促急收藏，乃-p, -t, -k塞音韻尾所致；三個入聲音高分別同陰平、陰去、陽去相同，分別係上陰入（高啲，亦都叫陰入）、下陰入（低啲，亦都叫中入）、陽入。

現代語言學呢，就描述聲調輪廓。非入聲調型按次序就係高平（55）、高升（35）、中平（33）、低降（21）、低升（13/23）、低平（22）；入聲音長仲短，調值分別係5、3、2。當然啦，呢個係有如教科書嘅描述，香港當代粵語唔見得係咁。亦都有以線條變化顯示音高變化嘅方法，叫做五度標音法，一般會認為由趙元任提出。

附表說明，一目了然 [3]。掕埋以下音例：
一、 平上去聲：詩史試時市事、番茄醬牛腩麵、三碗細牛腩麵（走茄醬版）、歡喜到流眼淚（開心版）、傷感到流馬尿（傷心版）、叁玖肆零伍貳（呢句關乎下文「三四零二」填詞數字訣）
二、 入聲（-ip韻）：喼、摺、葉

「三四零二」就係利用粵語聲調特徵而提出。數字訣唔睇音長，表裏面入聲數字唔會考慮。想填入聲，應該視乎拍子音長。數字訣重聲調輪廓嘅「終點」而非「起點」，所以「三九四零五二」可以精簡，「三」（55）「九」（35）、「四」（33）「五」（13/23）兩組殊途同歸相同「終點」，各自可以歸為同類。於是「三四零二」就成為通則，取決於音程，相對咁對應數字聲調。有時亦都考慮節拍（輕重拍、連音、快慢）、（常用而）唔同調嘅歧義字等等；此外，正如書入面所講（頁223），既可以低八度，亦可以高八度。呢啲係「三四零二」嘅細律嘞。重拍避填虛字、斷句同意義單位順應旋律脈絡（節奏），書入面都有講到（頁55）。其他細節喺呢處下面闡明：

一、「四三」音係快拍音符嘅話，可以用「九」代替（35），運用佢嘅高升輪廓特性，由於「起點」同「四」一樣而終點同「三」一樣，快速滑過仍然不失順暢。「四三」連音可以拆，可以用單字「九」。

二、「三四」連音大可以當「三」處理，亦可以拆。

三、有時前面粒音係「三」，後面「二二」或者可以當「零零」，呢樣就係音程嘅尷尬位嘞。故此所謂一字一音嘅絕對刻板印象絕不適用。

四、歧義字同樣唔可以忽略。常用嗰啲，可以令聽者令聽者先入為主。《高山低谷》副歌「我努力去生存」呢句嘅「生存」應該係「三四」而唔係「三零」，所以「生存」係唔啱音㗎，但係由於冇sang1 cyun3（「生串」）嘅有意義配搭，仍然無礙理解。即使原本隻字啱音，亦都因為有更加常用嘅異調聲音配搭而令聽嘅人聯想到另一字詞。《唉依家啲情侶》 [4] 副歌「原來我是」嘅「我是」（「四二」）同「故事」、「意義」、「幼稚」、「美麗」、「約誓」都合律，然則我哋好容易會聽成「屙屎」。廣東話係聲調語言，聲調唔同就自然有歧義。呢樣係雙刃劍嚟，皆因可以反其道而行，解決冇咁啱音嘅問題。

五、順帶一提一個取自黃志華先生Facebook討論嘅特例 [5]。粵樂《平湖秋月》開始三個音係mi mi so，照理「二二四」最啱音，但係一直以嚟詞人填嘅係「零零零」或者「零～零」，有如將「聞聞渠」唱成「問問佢」，聽起嚟同「麥麥送」、「望白雪」、「落大雨」、「十六歲」、「又夜瞓」、「扮上菜」、「掉垃圾」一樣。音程相近，「二」「零」尚且唔算太拗，仲可以用歌唱技巧搭救，但係最後「四」就難以接受。偏偏填成「零零零」或者「零～零」就似乎變成咗傳統，全部照跟，無一例外。

其他範疇，譬如黃志華先生Facebook上面談論嘅難譜詞／易譜詞，尚待探究，聲調同音調關係嘅語言學研究成果，亦非區區所長，就講住咁多先，告一段落嘞。無論如何，「三四零二」除咗為冇樂理知識嘅人大開方便之門，仲大大減低咗先詞後曲嘅難度。先詞後曲嘅新平仄，令到作曲填詞者喺「『無曲』與『有曲』之間」之間遊走，正如新詩格律派（頁225）喺框框之中開闢自由空間，實在係大有可為。先詞後曲的確唔係新鮮事。咁樣就舉一個即席為歌詞譜曲嘅實例 [6]，等咁多位感受一下「無曲」同「有曲」嘅過渡，亦可以試下從「三四零二」嘅角度去睇。

當時係一九八一年，作曲家顧嘉煇第二次赴美深造在即，群星同佢餞別，顧氏獲邀即席譜曲。鄭國江、鄧偉雄、黃霑三位，都係響噹噹嘅大詞人。鄭黃同盧國沾七十年代「三分天下」。至於鄧偉雄，用例子答你：《楚留香》正正出自佢同黃霑兩位手筆，「千山我獨行不必相送」真心型到震，瀟灑到一個點，簡直就係火腩飯潮文結尾嘅寫照。

好喇，睇睇歌詞先：
「為你我獻上心韻，似清風吹遍，令世界再現優美，像春到大自然， 為你我創作佳韻，好歌家家響遍，旋律細訴百樣情懷，誠意始終不變， 寫出那綿綿意，動人肺腑，胸襟中傾出光芒萬千， 譜出那人情暖，在人世間，嘉煇名傳萬世，將心聲獻。」

轉換成數字，就係：
2444434 43334 2444234 234220 2444434 333334 02444200 043334 334004 2043 333333023 334004 2043 330024 3334

咁快作到，一半歸功於顧許，一半歸功於詞人。此話何解？留意，每行頭兩句，兩行一對咁睇、咁讀，會發現聲調近乎一樣，咁樣各自音樂先可以重覆。詞人心目中早就有大致嘅旋律，重覆樂句，方便顧氏「估」返出嚟。三位果然名不虛傳。

了解過後，睇嚟都會認同「三四零二」係能夠準確解釋以至預測旋律走向嘅詞壇理論。作者岑偉宗亦都喺書裏面分享應用經驗。期望有更多實踐，亦希望理論可以再完善啲。

思而後行：普及粵語入文嘅絕妙試驗場

最後嘅部份，唔涉及技巧層面，而係轉而從歌詞放眼粵語寫作（又稱為粵語書寫）嘅前景。

粵語寫作，殊非最近嘅事，傳統可以追溯到明末木魚書，其來有自。歌曲嚟講，粵謳、粵曲固然傳承已久，粵語流行曲「史前史」[7]亦都唔缺乏呢啲作品，就好似《唔嫁》（頁64-65）；其後許冠傑、黎彼得嘅經典名曲，以及黃霑等人嘅努力，亦係有目共睹。奈何聽眾對於粵語流行曲全口語化反應極差，黃霑本人亦都就此罷休，不求主動推動 [8]。二零零二年，黃偉文、伍樂城嘅「新廣東歌運動」，迴響唔係咁理想。之後粵文填詞作品數量喺主流明顯大減，就算冇間斷，都係得好少，《你講你愛我》、《男子組》、《覺醒字幕組》、《樂壇風雲》、《Allegro, Opus 3.3 am》、《大殉情》電台宣傳歌（頁234-5）、《帶子麻甩》（頁271）等等，堪比零零丁丁小貓三四隻。近年嘅非主流、地下音樂喺悲觀形勢之中反而冇妄自菲薄，ToNick、神奇膠、《喜愛射毛》、《你老闆》等等，總算留低幾抹異彩。更多例子可以睇拙文〈擴闊對粵語填詞嘅想像〉（原載於《振翅22.4》，之後有修訂）[9]。

其實拙文早就提倡過粵語入詞，亦都指出咗某啲誤解係源於錯覺。有見書中提出一啲相關嘅內容，正好藉此澄清一啲概念，鞏固先前嘅睇法。譬如書裏面嘅用語「語感分層」（雅妙趣俗鄙），其實就係風格（style），文字嚟講可以叫做文體，至於語感，只係（第一）語言用者嘅感覺啫。更加重要嘅係，認為某啲「語感」（風格）專屬口語（粵語），某啲專屬書面（官話白話文／華文／中文），係好奇怪嘅諗法。背景、場合、語域（register），先至係風格所對照。長話短說，索性搬出先前拙文立法會會議嘅例證嚟說明：發言，以議題為本，運用有規範嘅、表現出教養嘅、為上流接受嘅用語表述，風格就因為咁而趨於莊重、得體，並冇因為口語性質而有絲毫牴觸。

本字考據舉證要嚴謹 通用粵字開創新時代

另外，岑先生對於本字或者「正字」推崇備至，區區係不以為然嘅。高舉所謂「正」字，捨棄描述主義，貶損日常生活通用嘅忠實表現，固然不利辨識使用而不切實際（譬如相信係源於客家話嘅「啲」唔能夠藉本字「滴」反映粵音，「D」反為仲接近過佢），亦都將粵字規範化繩於略帶虛妄嘅標準，無視歷經民間自發爭鳴嘅傳統（粵劇劇本就係咁，稱之為傳統，有根有據）。

同漢語系近親語言嘅大量共通詞、長年嘅華文教育、便利嘅造字用字方法，促使粵文書寫系統採用漢字做主流形式 [10]，但係漢字並非萬能：粵語有大量高頻率基本詞並冇傳統漢字寫法，多數係百越底層所致；外語（潮、客、英語等）借詞在地化程度各自有別；漢字淨係愛嚟表音，甚至連漢字都唔用，直接用外語字。Robert Bauer包睿舜對漢字嘅感情、淨係以漢字寫粵語嘅建議，講得好聽啲就情有獨鍾啫，恐怕係昧於執迷喎。

實務嚟講，本字嘅學術考據之中，嚴謹嘅少，稍為可信好似陳伯煇嗰啲唔多。源頭訛誤多唔多姑且唔討論，大體嚟講，彭志銘依從詹憲慈《廣州語本字》、孔仲南《廣東俗語考》，曾焯文依從魯、孔、彭、潘（永強），一味靠抄、照單全收，最多都係採集者，冇乜考證，更加有以訛而訛之虞。譬如「呢（ni1或nei1）／依（ji1）」廣泛存在喺壯侗語族、苗瑤語族等各種語言，語法功能冇分別；因為「爾」嘅中古漢語唐音讀做/njiɛ̌/而推「爾」為本字，只見牽強。

不過，如果有廣為接納、逐漸成為主流嘅字，基於描述主義嘅觀點，唔應該排拒。「攰」嘅寫法，係林佐瀚喺電視節目《每日一字》宣揚之後普及起嚟，已經成為定式，先前《廣州話字典》記載嘅「癐」，今日未必多人知。

總言之，本字適宜留返畀學術，粵語字以通用字（「俗字」）為本，先至適合。寄望香港人能夠堂堂正正寫粵文，風格多樣，使用領域廣泛，直抒胸臆，開創粵語書寫嘅新時代。

亟待入詞復興推廣粵文 民族立本文化內強外揚

最後，謹此感謝岑偉宗先生大方表述心得。拜讀大作，受益匪淺，而且喺思索上文問題屢受啟發，使到迅即彙整議題，理順思路，寫成呢篇文章。尤其受「回歸本土」（頁213）四字觸動，冒昧拋磚，但求感召同道，復興粵語填詞，一來推廣粵文，破除「唔寫得」、「登唔到大雅之堂」嘅迷思，二來鞏固文化認同，滋養我香港國族之本，弘揚文化魅力。都算係獻畀萌芽初長嘅香港文化─公民民族主義[11]嘅少少心意啦。