《「粵語兒童的語言發展」講座——記月中兩場語言學講座（上）》

可能我唔講大家唔知，「科大人文新語」講座系列已經喺香港歷史博物館演講廳舉辦咗好幾年喇。講座逢星期日下午舉行，同公眾分享人文學術發展。讀友有睇過方潤嘅網誌，甚至呢篇拙作嘅話，就應該唔會陌生。
https://medium.com/@tseyatliu/%E6%97%A9%E6%9C%9F%E7%B2%B5%E8%AA%9E%E7%A0%94%E7%A9%B6-%E8%AC%9B%E5%BA%A7-c8a5fe5113cd

主辦方咁樣簡介：
隨著香港社會專上及持續教育的普及，學術知識越來越成為公眾知情權的重要內容。學術知識貴在創新，但新知自應造福人群。人文學科美於人情，而話語豈宜黌宮獨唱。香港科技大學人文學部因此與香港歷史博物館合設科大人文新語講座系列，期與公眾共享文史哲等多元領域的人文學術研究成果。

而今次嘅講座就係第128場，日期係9月9日。講者係李嘉欣博士，同「我真係恭喜你啊」嘅「大美人」同名同姓。（佢個姓串做Lei，我思疑佢有澳門背景。）（講座摘要及講座簡介 (http://huma.ust.hk/cgi-bin/event/detail.php?event_id=608)）

講者期間除咗列出所得統計數據，亦都有播放實驗影音節錄，去講解以下四個方面：
1. 研究香港粵語兒童早期語言發展嘅原因：有助了解佢哋認知發展嘅過程
2. 粵語兒童語言發展嘅特點
3. 箇中發展點樣反映母語特點
4. 相關嘅材料及資源

由於第一方面嘅重點一句仔就講完，下文都係集中講跟住嗰三個方面嘅要點。

第一語言習得，掌握嘅不外乎係詞彙、語法同語音（次序依講解先後）。其實幼童係可以掌握得相當之快，並且接近成人程度。

//詞彙//

譬如，某啲研究發現，普遍而言，2–5歲嘅小朋友已經識得
- 名詞：超過60個
- 動詞：包括 [a] 大約50個及物動詞、[b] 多過10個不及物動詞、[c] 6個指向動詞、仲有 [d] 雙賓動詞／授與動詞（dative verbs）（例如「畀錢（直接賓語）你（間接賓語）」、「畀你（間接賓語）一件蛋糕（直接賓語）」¹嘅「畀」）；
- 形容詞：描述形狀、數量等；
- 虛詞²：緊、咗；
- 量詞：約莫10個；
- 副詞：都、仲／重；
- （句末語氣）助詞：多過15個

//語法//

同樣，語法方面嘅習得亦都追貼成人。句子結構上，識得「主語—謂語（喺度一般指動詞）—賓語」（Subject-Verb-Object）語序，亦都識得連動句，連用動詞詞組（又稱短語），好似「食住花生||等睇戲」³之類。過程中難免犯錯，包括否定詞「唔」同量詞（「唔杯」實際係指「唔要呢杯」）連用、量名詞錯配。但即使犯錯，都錯得有條理可尋。

全稱量詞⁴「晒」係講者嘅一大重點。大部份3-4歲幼童都能夠當握對賓語同主語嘅量化，前者稍微熟過後者。超過七成能夠了解到表動作、事件完成嘅「完」乃至表過去、完結嘅「咗」無法表達全部義。（「佢食完啲蛋糕。」 VS 「佢食晒啲蛋。」；「啲綿羊瞓晒覺。」 VS 「啲綿羊瞓完覺。」）喺度仲發揮埋同官話嘅跨語言比較。賓語量化方面，動詞後面仲可以用「光」（「他吃光了蛋糕。」），主語量化就唔得。用把字句將賓語移前，動詞之前用「全」，就兩者都適用——唔似得「晒」用喺後面。

//語音//

簡短嚟講，研究顥示10個月幼童已經識分高平同中平調，而2-5歲期間對降調分得越嚟越熟，由於大多數聲調實際上到收尾會向下降，換言之幼兒對音高同聲調嘅掌握亦越嚟越純熟。

//評估//
《香港兒童口語（粵語）能力量表》
https://www.dhcas.gov.hk/tc/colas.html
《香港粵語發音測試》
https://www.dhcas.gov.hk/tc/cat.html

最後嘅問答環節，我今次懶得記錄喇。填問卷都表達咗啲意見，例如話想知道雙母語（粵語及另一母語）家庭嘅情況。