《官話歌「的」di、de讀音規律初探——相對音程嘅影響》

//背景//

兩個幾禮拜前遇到一個問題：官話流行曲裏面嘅詞綴「的」（意思即係粵語嘅「嘅」），有冇得分幾時唱di、幾時唱de嘅呢？

呢個問題係源於《滾滾紅塵》裏面觀察所得，而且唱法嘅分歧喺其他官話歌都有出現。問題意識霎時間激發深思，可惜不才近乎零樂底，做唔到熟慮，仍然猶在夢中。不才不嫌翦陋，但求拋磚引玉；唔怕見笑於方家，還望有教於高明。

//研究方法//

喺正式開始之前，有幾項須知：

1. 歌曲揀選
Google問題關鍵詞，見到聽過嘅相關例子，從中揀《天路》同《大海》做額外兩首，咁啱一首小調、一首大調，嘗試同小調《滾滾紅塵》一齊討論。一晚時間有限（按：初稿用咗夜晚四五粒鐘），係自己攞嚟嘅，但係放工之後時間寶貴，又自問冇咁好心機逐啲逐啲磨完先出，所以以下討論未臻完善，難免粗疏。

2. 代表性局限
承上，咁做法代表性唔得廣泛。所以唔係首首都適用，甚至再保守啲，唔能夠保證滿足到某一首歌裏面嘅所有情況。

3. 音高同音程
- 音名、簡譜數字表示音高（值），係普及嘅做法，呢度自然唔例外。
- 為咗方便樂理基礎平平嘅人（包括不才），借鑑旋律同某啲聲調語言嘅聲調之間嘅匹配（tone-melody match，即係所謂「啱音」），施展逆向思維，藉聲調音高帶出旋律印象。
- 承上，工具有黃志華「三四二零」數字「類音階」同張群顯嘅術語「尖亢下沉」，兩者互相對應。「三四二零」食正數字齊晒粵語啲聲調；「尖亢下沉」夠形象化又暗合音高。（詳見拙文）必須強調嘅係，工具只係表達相對音程：同一個樂音因應同前後樂音嘅音程，對應嘅level都唔同，例如大調結尾do音通常係「四/亢」，未必代表喺樂句其他位置都係咁；位置冇變都好，前音粒音有咁上下高嘅話（例如so），do未必係「四/亢」（調寄廣東音樂《江邊草》、由尹光主唱嘅《黃飛鴻》不時重複嘅「ＸＸＸＸＸＸＸＸ黃飛鴻」）。下低討論會演示相對呢一點。
- 再承上，有啲朋友比較熟「三四二零」。為簡便計，用「三四二零」。
- 連音嘅處理好多款。喺度盡量用最少「類音階」去表達順耳嘅效果。

4. 考慮因素
本文唔認為節拍輕重（見討論中有關《天路》嘅部份）或者定語性質（見下文例子9-12）為現象帶嚟顯著影響。至於個人差異，由於需要從唔同歌手嘅風格、處理手法兩方面相比，暫且唔作討論，但都會喺討論另設一節，用鄧麗君同蘇打綠兩隻《我只在乎你》版本展示對比。

//討論//

《天路》
https://www.youtube.com/watch?v=6WdQKHpKcT0
總共有四句有「的」。衡量過前面樂音唔太影響分析，所以抽剩相關嘅定中詞組（modifier-head phrase）。從簡譜可見，即使「XX的」節拍一樣，「的」都同樣有de、di之分，可見節拍同現象冇乜關連。簡單起見，唔標示節拍，之後亦唔會用譜。
主歌嘅頭兩組出自重覆樂句：
1. 青青的牧場 m m s l-t-s-m m [二 二 四 三~ 二] ＞＞de
2. 高高的山崗 m m s l-t-s-m m [二 二 四 三~ 二] ＞＞de
副歌有兩組，高音過(1)/(2)：
3. 神奇的天路 l d’d’ r’-m’-d’ r’ [二 四 四 四~三~四 三] ＞＞de
4. 人間的溫暖 d’d’d’r’d’ [四 四 四 三 四] ＞＞di
類音階唔會一成不變，而係因應樂句音程，所以係相對嘅。或者可以當做唔同嘅區間。
呢度di傾向喺高啲嘅樂句出現，但趨勢並唔明顯。

---

《大海》

https://youtu.be/EXaLvBGqQww

層次會更加明顯，尤其是樂曲本身有模進，有結構美。為方便比較，今次出多幾句。
頭四句樂句為例：
5. 從那遙遠海邊 [零-二-四-四-四-四] s,l,dddd
6. 慢慢消失的你 [二-零-四-四-三-四] l,s,ddrd ＞＞de
— — — — — — — — — — — — — — — — — — — — — — — — — — — — — — —
7. 本來模糊的臉 [二-四-三-三-三-三] l,drrrr ＞＞di
8. 竟然漸漸清晰 [四-二-四-四-三-四] dl,rrmr
撇除「so,la,」、「la,do」呢對嘅輕微差異，(5)-(6)同(7)-(8)可謂近乎有模進，音程等距，整體高一度，隱然有區間（正如間線所示）。前者低些少，「的」係de；後者高啲啲，「的」係di。
跟住去到副歌。直接飛到有「的」嘅樂句先。(9)、(10)出自重覆樂句：
9. 喚回曾經的愛 [三-三-四-四-三-四] d’lssls ＞＞di
10. 帶走我的哀愁 [三-三-四-四-三-四] d’lssls ＞＞di
後四粒音程同(6)「消失的你」等距，整體高四度，屬於模進。若然齋睇(9)同(10)嘅定語性質，就只能夠睇到領屬與否都係同一隻唱法，未必理清關鍵。
然後後些少：
11a. 所有受過的傷 [三-三-四-四-二-四] mrddl,d ＞＞de
12. 所有流過的淚 [零-二-四-四-二-四] rmssms ＞＞di
(12)後四粒高(11a)後四粒四度，各自音程等距，同樣屬於模進。即使文句嘅結構相似，「的」字前面嘅定語同樣都係「所有V過」，「的」字依然有唔同唱法。由此可見，定語性質對「的」字唱法嘅作用唔大。
對比最後一段嘅「所有受過的傷」，「的」上咗去do，就變咗唱di：
11b. 所有受過的傷 [三-三-四-四-二-四] mrdddd ＞＞di
最後兩句，就幾次都係咁唱：
13. 我的愛 [二-四-三] msl ＞＞di
（正正係《世間始終你好》嘅「論武功」或者《打雀英雄傳》嘅「大相公」。）
14. 請全部帶走 [零-三-三-四-四] s,mrdd
呢度高四度，多過主歌嘅一度，音程亦都闊得多。我哋同樣可以採用「區間論」，得出更加明顯嘅規律。大體嚟講，主音do上下分做兩個區間，高區間嘅「的」傾向唱di，低區間嘅「的」傾向唱de。(13)完咗之後，(14)開頭落返去do以下，「類音階」重新洗牌，m對應唔同「類音階」，再次印證音程嘅相對特徵。

https://www.youtube.com/watch?v=wMQb6JHnqLA
（題外話：原來有粵音版。）

---

《滾滾紅塵》
https://www.youtube.com/watch?v=qVm3GdOd2P8
睇咗咁耐，大家可能會問：咁開頭提到嘅《滾滾紅塵》呢？有啲分別，但道理差唔多。
首先最易發現嘅係，全首最高嘅樂音係t，必然佔最高「三」嘅位置。
開初A段唱兩轉，第一次(15)-(19)，第二次(20)-(22)：
15. 起初不經意的你 [二 三 三 三 三 四 三] m l s f# m r m
16. 和少年不經世的我 [二 三 三 三 四 四 三 零] f# s f# m d r m l,
17. 紅塵中的情緣 [三 三 三 三 四 三] r r r r d r
18. 只因那生命匆匆不語的膠著 [二三三三四三三三四四三四] m l s f# m f# f# f# r m f m
19. 想是人世間的錯 [二 三 三 三 三 四 三] m l s f# m r m
20. 或前世流轉的因果 [二 三 三 三 四 四 三 零] f# s f# m d r m l,
21. 終生的所有 [三 三 三 四 三] r-r r r d r
22. 也不惜換取剎那陰陽的交流 [二三三三四三三三四四三四] m l s f# m f# f# f# r m f m
全部「的」都係de。
B段寥寥幾句，字數成「三三七」之比：
23. 來易來，去難去，數十載的人世遊 [三三三 三零三 三四二零二三四] lll tmt lsmrmls
24. 分易分，聚難聚，愛與恨的千古愁 [四四四 三零三 三三三零四零二] rrr ml,m rrrl,dl,t,
同樣全部「的」都係de。
留意返，上面「的」同前後樂音嘅音程都細。
跟住係A嘅變奏（A’），頭三句旋律同A頭三句，最後一句旋律走向整體走下坡，插水到谷底嘅s’，用l,埋尾。
25. 本應屬於你的心 [二 三 三 三 三 四 三] m l s f# m r m
(25)係第一句，旋律照跟，「的」照係de。要留意嘅係第四句：
26. 轉變的面孔後的翻雲覆雨手 [二三三三四三四三四三零二] m l s f# m f# r m d r s, l,
開頭六粒樂音明明一樣，但係前面「的」係di，後面「的」係de。略為牽強嘅解釋，就係前者處於大局，畀do同谷底so,、la,拉闊咗音程，而後者由於只受fa# re之間嘅音程影響，同上面差唔多。
重覆B段之後，到A’ 嘅第二次，第一、二、四句都有「的」：
27. 於是不願走的你 [二 三 三 三 三 四 三] m l s f# m r m
28. 要告別己不見的我 [二 三 三 三 四 四 三 零] f# s f# m d r m l,
29. 隱約的耳語／跟隨我倆的傳說 [二三三三四三四三四三零二] m l s f# m f# r m d r s, l,
(27)、(28)係de，不贅。(29)今次前後兩個都係di。前者尚且可以話(26)嘅di同理。而後者就關乎re同so,嘅音程大。
喺呢個例子，相對音程更加吃重。

---

個人差異不容忽視
即使本文唔打算探討個人差異嘅影響有幾大，都必須負責任咁指出，個人差異亦係不容忽視嘅因素。從《我只在乎你》原唱同翻唱版本，可見一斑。
《我只在乎你》入面有詞綴「的」嘅樂句，喺主歌有一句，喺副歌有兩句：
30a. 過着平凡的日子 [三三四四二三四] l l l s m(-r) l s
30b. 過着平凡的日子 [三三四四二三四] l l l s m l s
31. 心甘情願感染你的氣息 [二四三三四二三三二四三] d’ r’ m’ r’ d’ t d’ t m-s l
32. 失去生命的力量也不可惜 [零零三三三四三三三四三] llf’m’r’d’f’m’r’d’r’
https://www.youtube.com/watch?v=LE6vRCpcbb8
鄧麗君原唱：(30a)、(31)唱di；(32)唱de。
https://www.youtube.com/watch?v=gAqGekKqlDA
https://www.youtube.com/watch?v=DXriC1LoVIM
蘇打綠兩隻版本嘅翻唱：(30b)、(31)、(32)都唱de。
細心留意主歌嗰句嘅話，鄧麗君唱個「的」字係有隱約滑咗落嚟，亦即係(30a)中連住咗嘅re音，低一個全音。唔知係咪因為咁「托高」咗個「的」。退一萬步，姑且當呢句講得通先，剩低嘅暫時都未知係咩原因。所以個人差異嘅影響係值得探究落去嘅。

//結論//

本文作為初探，帶嚟兩項小小貢獻：

- 解釋音程嘅相對關係對發音嘅影響
相對音程就算唔係起決定性作用，最起碼都有顯著影響。「的」嘅發音原理就係：音程闊而顯得高音嘅就di，音程窄而顯得低音嘅就de。
- 開拓研究方向
藉住肯定個人差異嘅可能性，指引未來相關研究嘅方向。

期望「的」嘅現象能夠引嚟學術界更多關注，日後會出現更深入嘅探究，令到我哋得悉原理嘅全貌。

---

出唔出華文版，視乎反應而定。