《撐粵語嘅愛與誠》

出完冇耐，仲想講兩句抒下情。我冇乜擺個人情感落上篇㗎，原諒我喋喋不休。

年頭浸大普通話豁免試風波久未平息，四月尾東華三院甲寅年總理中學又嚟單所謂「歧視」指控，跟住就爆埋呢單。呢幾個月爭議發生得零舍密集。

矛盾經年，逐漸覺得，與其歸咎於中國「推普」國策，以及搞到你「方言」/地方語言死死下再撥資源「保育」嘅方針，不如反躬自省。傀儡政權背負政治任務，固然可恨。退一萬步，我當冇呢回事嘞，唔通坊間就純潔到一啲功利心都冇咩？唔通坊間一啲忘本、捨本而逐末嘅心態都冇？

迷思二：以學習英語和普通話為先
因殖民地的背景，不少香港人也會有「重英輕中」的觀念。而香港回歸以
後，中港交流頻繁，普通話在香港的重要程度大幅提升。因此，一些家長也會希望幼兒的語言學習以英語和普通話為先。事實上，幼兒的語言學習，應以孩子的家庭語言為先，因為家庭語言是孩子最常接觸和使用的。孩子需要先掌握自己的家庭語言，才可應付日常生活中溝通交流的需要。如果孩子學習的語言與家庭語言無關，孩子使用語言的機會便大大減少，不但令孩子無法與身邊的親友同伴溝通，更會降低孩子對語言的熟悉程度，影響使用語言的信心。
故此，語言學習的先後次序應以孩子的家庭語言為先，然後才伸展至其他
語言。

（出自謝錫金《香港幼兒口語發展》第二版頁6。呢本書上篇都有提到，有興趣者可以預覽 (https://www.hkupress.hku.hk/pro/con/219.pdf) 內容節錄。）

另一方面，太悲觀，未去到懷憂喪志，但依然妄自菲薄。明明有人有燈咁有生命力，海內外咁多人使用、咁多社群賴以交流，文藝創作魅力仲幅射得廣而深，跨代傳承未斷，書寫秉承明朝木魚書以降嘅傳統仲不斷壯大緊，簡直好過晒某啲真係高危瀕死嘅語言多多聲，偏偏咁都可以講到垂死咁款，做咩唧？咁落去，唔「滅粵」都假啦，唔慌冇自我實現預言喇。既然本身唔只維持守勢，本身經已活生生，就唔使下下「守護」、「活化」㗎喇。想廣東話好，好簡單。母語係生活、生命嘅一部份；好似平時呼吸、飲水、食飯、瞓覺咁，照樣生活落去吧啦。真係想揼多啲石仔，可以幫手寫辭典，整字幕，搞創作，了解粵語發展，學語法、語音等方面嘅知識，實有行動嘅。

「我感到憂慮的，不是香港的自主權會被北京剝奪，而是這項權利會一點一滴地斷送在香港某些人手裏。」
“My anxiety is this: not that this community’s autonomy would be usurped by Peking, but that it could be given away bit by bit by some people in Hong Kong.”

扯遠少少，尖銳啲咁講：同「彭定康.jpg」擺埋一齊嚟睇，不難發現Hong Kong mentality 自卑自輕自賤自侮嘅傾向。甚至描述、構建「香港民族」心理層面嘅時候，唔少得呢層負面標籤。

唔緊要㗎，咪改進囉、變好囉、自新囉。取「包容」（胡適講嘅「忍耐」）精神寬大為懷嘅一面，「恆久忍耐，又有恩慈」，唔好縱容、姑息自己嘅不足、不是。

同理，我哋唔係咁功利，只顧自己語言有幾叻、有幾把炮、有幾傳古、有幾正統、有幾華夏。母語有如母親，可敬可親可愛，即使醜樣都唔嫌棄。愛係毋須理由㗎。

嬲普通話、憎普通話，我相信事關社經政治因素；我理解仇恨步步進逼嘅殖民者係人之常情，亦冇打算叫大家做聖人壓抑。但係唔好火燒心而本末倒置，為仇恨而踩低人哋，吹捧粵語，聽信謠言，累埋無辜嘅其他語言，例如滿語。語言唔應該有高低之分。呢層另話。

//延伸閱讀//

https://medium.com/@tseyatliu/manju-gisun-%E7%82%BA%E6%BB%BF%E8%AA%9E%E7%A0%B4%E8%AC%AC%E4%B8%A6%E5%93%80-febff1a9f0b

http://uegu.blogspot.hk/2015/02/mandarin.html

以前廢噏嘅一小段：

係㗎，市區粵語唔見得好有資格㗎咋。推上位壓倒客家話等本土語言，驅使講客語、潮語等嘅人放棄傳承，都係戰後先明顯發生嘅事。市區粵語做咗好多非粵語人後代嘅第一語言，親過本身嘅「母語」，過九成人口講，喺呢幾十年成為社區語；香港口音隨住文化產業宣揚嘅文化魅力，變咗做香港甚至粵語區嘅標準。係，佢只可以做香港人身份嘅充份條件，而做唔到必要條件：「香港語」用喺倪匡呢啲講得唔準嘅人、用喺英語人口，唔算太準。之不過，界，始終都要劃，而且社區語嘅事實冇得唔尊重。
守住廣東話，對於非母語者嘅作用，就係在於，若然連頗為強勢嘅廣州話都頂唔住，弱勢嘅其他本土語言只會更加難生存。己所不欲勿施於人，等到大局定咗，母語者經歷過呢一役，體會到保衛母語箇中艱辛，贖罪都會誠心誠意好多。

---

擇總兩篇文：

https://www.facebook.com/notes/ch%C4%81aak-lingvisten/%E4%BF%9D%E8%AD%B7%E5%BB%A3%E6%9D%B1%E8%A9%B1%E5%94%94%E4%BD%BF%E8%AC%9B%E5%8E%9F%E5%9B%A0/1397826987142986

https://www.chaak.net/if-i-were-hakka/

---

再補：話口未完，見到十九才子呢個咁嘅post (https://www.facebook.com/tokit.channel/posts/1934742469931600) ，入面啲謬論謠言都好齊下。