《【短炒】粵文同粵白嘅分別》

粵文同粵白嘅分別，查實本人同好多朋友都喺Facebook講過下。只係啱先暢遊Medium，撳入去「粵文」hashtag之後，睇到某啲文有種賣羊頭掛狗肉嘅感覺，忍唔住唚氣短炒一篇啫。

對話用粵語寫出嚟，稱為「粵白」。同口供逐字稿、劇本對白同類，都係以書面忠實記錄口語。粵白之所以係粵白而非粵文，係因為佢僅止於對話，通篇敘述依然都係官話白話文，亦即係今時今日至少喺書面上畀佢所壟斷又好、代表又好嘅「中文」。

《海上花列傳》係蘇白小說而唔係蘇文或者吳語小說，亦同此理。

相反，《小男人週記》就係粵文小說、粵語小說嘅典型例子。

題外話

你咪話吖，流行曲情形都係咁上下之嘛。早前黃志華先生寫過篇文，提出「真粵語歌」同「假粵語歌」，名目率直到傷透某啲人嘅玻璃心，但係的而且確一語中的㗎噃。用粵音唱出官話詞，真係唔係採用粵語詞彙語句、粵語語法所填所寫嘅粵語歌吖嘛。咁當然，不才就叫開後者為粵音歌嘅。