(beta 公測版本)
< 返回

《沖繩縣立博物館・美術館》

日期:2019年5月26日

每次去旅行,最鐘意都係去博物館睇歷史。沖繩嘅「沖繩縣立博物館・美術館」設計得非常好,地方唔算大,但內容舖排得好,令我極為欣賞,睇到樂而忘返(之後再開post講。)

未踏足沖繩之前,覺得呢個地方係陽光與海灘,非常有朝氣。但睇真啲先發覺係個悲劇地方嚟。如果我係琉球人(沖繩人),心入面大概都有幾分舊恨同幾道傷痕。

如果香港係中西文化薈萃,噉沖繩就更勁,係日、美、中文化交匯。美其名係交匯,實情係身不由己,無可奈何,畀人舞來舞去。由古到今,琉球都係夾喺大國之間生存。而大國若遭逢巨變,或改朝換代,琉球國幾乎必受波及。

最初要向明朝進貢,十七世紀畀日本薩摩藩打敗之後就兩邊都要討好,又畀中國又畀薩摩。清滅明後又要換老細。到列強嚟到就迫住開港簽條約。之後到明治時代直頭畀人吞埋,國破家亡。吞嘅時候話要談判,但談判雙方係清政府同日本政府,琉球人有咩得揀?吞完之後就廢你琉球語,全部人要講日文。到一九三十年代美國大蕭條,距離好遠嘅沖繩人都一樣受影響,冇嘢食要食毒果(蘇鐵),慘到史稱「蘇鐵地獄」。打二戰時畀統治咗你七十年左右嘅日本推上前打仗,同美軍打咗場好慘烈嘅沖繩島戰役,十幾萬平民死亡,又被人強姦又被迫自殺。打完仗轉手畀美國統治,以為會有轉變,但人哋都係拎你過橋,純粹想用你做軍事基地,畀個名你叫Keystone of the Pacific,即係話你不過係戰略重地,而民生則唔係重要考慮嚟。後來人民怨聲載道話要復歸日本(其實復咩歸...),但當中嘅談判又係由美日主導,沖繩人都係冇乜say。一復歸後,一夕之間美元轉日元,道路方向一百八十度改變,又係引起混亂。而且啲美軍基地一直仲喺度,令沖繩經濟因過份依賴美軍基地而變得畸型(雖然近年好似好轉)。另外,沖繩人亦會認為同日本本土人格格不入,甚至覺得自己係二等公民。

有好多嘢積咗喺歷史度,我覺得係冇咁易消磨晒同失憶嘅。另外,作為香港人,有好多時去唔同地方睇到呢啲咁無可奈何嘅歷史(上次去愛爾蘭都一樣),會敏感少少,同多一分體會。

全文 706 字 (唔計英文、空格、標點)