《失敗嘅早熟關係 - Juno新歌》

Juno新碟用三首歌講一個故事，加上林夕填詞，又係佳作。作曲係澤日生，編曲係王雙駿。故事講一個十七歲天真、樂觀而勇悍嘅後生仔，認識到現實、遭遇到失敗之後，到三十四歲變成一個疲倦、受傷而暴烈嘅青年。主線係講失敗嘅愛情 － 十七歲女友末婚懷孕入大學，覺得浪漫激情。後來面對現實好似困獸一樣，因為責任而無法脫身。被困嘅兩人被世界不斷磨蝕，最後淨低嘅就係互相傷害同猜忌，同埋一個抌唔低嘅包袱（個仔）。而且《困獸· 28》首歌嘅內容我諗生活喺香港嘅打工仔都會有另一番強烈感受 － 工作同關係兩者本來就不可割裂，互為影響。

每首歌最後一句都直接對應下首歌嘅第一句（廣東歌歷史上有冇類似例子？）。編曲亦都好有心思。第一首《勇悍 · 17》歌用輕鬆、樸素同浪漫嘅結他同弦樂，第二首《困獸 · 28》編曲由開頭簡單嘅木結他發展至後來較迷幻嘅風格，用電子琴同勁大reverb嘅電結他聲去表達。啲chord progression亦冇《勇悍 · 17》咁簡單平淡。首歌以鋼琴作結，因為要駁落去最後一首《暴烈・34》，亦都係三首入面我最鍾意嘅一首。《暴烈・34》主要係以鋼琴伴琴，到中段基本上靠大力敲擊琴鍵同埋琴音翻飛疾走去表達瘋狂同憤怒，有啲似Chopin Ballade No.1 最後嗰段，或者係Liszt 首Mazeppa (Transcendental Étude No. 4)。總之係好似想暴走打爛晒啲嘢一樣。另外三首歌係有啲音樂上嘅Theme同Motif貫穿其中。

十七歲時：
「為何才十八歲要計較八十幾歲回望
要報答世界大多數期望
襯托你我這極少數 活得猖狂
能痛快釐定對錯要儘早變大人那樣 別人便肯鬆綁」

十七年後：
「最初要自由但卻未能自保
玩具熊殘舊
縫了再補
婚戒像頑石完好
誰又肯走上陌路
難道成熟得太早」

其實係勁有教育意義囉。 😂

btw, 唔知Juno幾時會出隻碟係十首歌講一個故事，好似啲rock opera噉。