《數學有咩用？》

有時啲人會問我做咩成日諗啲數學嘢，食食下飯會無啦啦計啲唔知咩數咁，又問我學埋啲數除咗返工有咩用。嗱，我隨便舉個例，喺日常生活成日會發生嘅，等大家參考下。

假設你有日行街離遠見到前面有個好似幾可愛嘅女仔，於是打算尾行佢。為咗縮短距離，當然要加速追上去啦。但去到咁上下近 (e.g. 5m) ，就要放返慢步伐同佢保持適當距離。而你又唔可以狗衝得太明顯，所以 acceleration 嘅 absolute value 唔可以超過某個值。喺呢啲條件之下，你最想知道嘅，當然係最快可以幾多秒之內追到個女仔最近啦。呢個時候 calculus 幫到你。

幾經辛苦追上咗，你 keep 住喺個女仔身後 5m 前進。但好景不常， 20m 前面有紅綠燈。你擔心個女仔過到去，但你就太慢食紅燈，唯有加快腳步愈行愈近。同上，你唔可以行得太快，但你真好驚好無助。好彩，你熟嗰頭，知道綠燈全長係 30 秒，但衰在唔知依家剩低幾多秒。心急如焚嘅你，到底最慢可以 keep 住幾慢，都依然有 80% 機會唔會跟甩呢？呢個時候 probability 幫到你。

過咗馬路，入咗個商場，個女仔入咗女廁。同犯罪無緣嘅你，當然唔會跟埋入廁所啦，唯有乖乖喺女廁門口等佢出嚟。但係，男人老狗企正喺女廁門口（通常喺後樓梯附近），除咗會俾路人望幾眼，最慘可能會俾個女仔發現你跟緊佢。於是你就想行遠少少等。但係呢，行到鬼死咁遠又怕佢出咗嚟行咗去第二度見唔到。所以，你要搵一個最遠嘅 choke point （或者監視到呢個 choke point 嘅地方）等佢出嚟時經過。呢個時候 graph theory 幫到你。

睇到啦，是但搵個例子都牽涉到咁多數學。唔好再話數學無用啦。