(beta 公測版本)
< 返回

《俾鬼壓?真係會㗎?吹水咋嘛?》

作者:cx
日期:2018年8月15日

警告:此非迷信文,想驅鬼辟邪嘅人請按上一頁。

俾鬼壓,書面叫「鬼壓床」,有人會叫「夢魘」,相信未試過都會聽過。簡單嚟講,即係瞓瞓下覺,個人醒咗,但係全身郁唔到,想叫又叫唔到,好似俾「嘢」壓住咁,硬晒。以前啲人唔知咩事就以為有鬼,但係家陣科學昌明,連登陸太陽同衛星炮都做到,區區俾鬼壓又點會解釋唔到?讀過下書上過下網嘅人可能都知道有樣叫「睡眠癱瘓」嘅嘢就係俾鬼壓嘅科學解釋。當然,有啲人唔信科學嘅,點都覺得自己係撞咗邪,咁我幫你唔到。我唔打算解釋俾鬼壓嘅成因或者原理(因為我都唔知),淨係會稍為講下俾鬼壓會發生咩事。

我唔肯定幾多人有俾鬼壓嘅經歷。問過下身邊啲人,好似都唔多人試過,就算有都可能得一次半次。最近見到有人 status 話自己俾鬼壓,雖然知道唔係鬼,但都嚇餐死。咁我有無經驗?有,仲經驗豐富添,我俾鬼壓無一百都有八十次,無吹水。由第一次俾鬼壓有少少淆底,到依家趁住俾鬼壓做各種實驗,都算係一種唔係人人有得經歷嘅體驗。咁啱早兩日先壓完一次,難得有興致,寫篇嘢分享下都好,等未試過嘅人知道下俾鬼壓係咩一回事,萬一以後遇到,都唔會嚇到瀨尿。留意返,呢篇文寫嘅全部只係我嘅個人體驗,而人人俾鬼壓嘅具體情況未必一樣嘅。

幾時會俾鬼壓?

我大約廿三、四歲左右開始俾鬼壓,差唔多都有十年。頻度大概一個月一次左右﹐有時會密啲,一晚四五次都試過。最離譜係連壓,即係瞓著俾鬼壓,掙扎醒咗,定定驚之後再瞓過,又即刻壓多次。根據我自己嘅觀察,通常忙到精神差嘅日子會特別容易俾鬼壓。尤其瞓晏覺嗰陣,係極容易發生,可能因為我通常都係超攰先會瞓晏覺啦。
俾鬼壓嗰陣係清醒定發夢?

對於俾鬼壓,大家聽最多嘅科學解釋有兩種。第一種係啱啱瞓醒嗰陣肌肉短暫性僵硬所以郁唔到,第二種係個人根本就未醒,只係發夢夢見自己喺床度郁唔到。我試過嘅情況都係後者,而前者個解釋我連係咪真都唔肯定。問題係,我究竟係點判斷自己發緊夢?其實只係簡單嘅實驗。

人生第一次俾鬼壓嘅時候,真係有啲心寒,因為係有幻覺嗰隻(後面再講)。第二次,無咁驚,但都係想盡快整醒自己,搏命掙扎。第三次開始,已經習慣咗,就開始做各種各樣嘅實驗,睇下自己係處於咩狀態。第一件事,當然係判斷自己係清醒定發緊夢。話說我俾鬼壓嘅時候通常係打開眼嘅,睇到嘢,但視線完全唔可以移動,即係連眼球都郁唔到。有一次俾鬼壓嘅時候,我望住窗簾,就趁機數數上面嘅花紋橫向重覆咗幾多次。掙扎一輪,醒嘅時候我係望住窗簾嘅反方向,於是我即刻拎床頭部電話記低我數到嘅答案,然後回頭一望……係啱嘅。嗰一刻,我以為自己俾鬼壓嗰陣係清醒嘅,但馬上就發現矛盾——當時係半夜,間房黑到根本睇唔到窗簾嘅花紋,我對答案都係要拎部電話照一照先勉強數到。結果呢次實驗無咩結論。

後來有一次,瞓晏覺嗰陣中招,間房夠光,而且戴住眼鏡,連書架上面啲書都望到。然後我隨便揀咗六、七本,好努力咁背咗佢哋嘅順序。雖然我從來無留意過我啲書係點擺,但係由於有窗簾嘅經驗,可能我嘅潛意識(?)記低咗臨瞓前嘅畫面,所以呢一次我再揀多咗啲細節去記,例如電腦螢幕上面嘅嘢、枱上面雜物嘅擺位之類。結果係,雖然啲書嘅順序係記啱咗(都真係幾神奇),但係啲細節就有微妙嘅出入,所以我認為我發夢嘅。再之後我又做過好多次實驗(例如放個鐘喺床頭對時間),時不時都同現實有出入,有時甚至錯得好離譜,所以我確信我俾鬼壓嗰陣其實係未醒。

俾鬼壓嗰陣會發生咩事?

郁唔到。呢樣係最基本嘅。多數連視線都郁唔到,有時甚至連望到嘅世界都係靜止(鐘都唔郁)。間唔中會係合埋眼嘅狀態,想開眼都開唔到。同埋就算好想叫,都係叫唔出聲。

幻視、幻聽。唔係次次有,但都好常見。中招嗰陣會聽到有唔應該有嘅聲音,例如街邊嘅車聲、雷聲、音樂、幾個人喺房外面傾偈等等。最恐怖嘅,莫過於係有人喺你耳邊講嘢,勁近,好似吹氣入你耳仔咁,仲要係男人,仲要係男人,仲要係男人,但你又郁唔到,唯有硬食……就算我試過好幾次,都會有啲毛管凍,盡快逼醒自己。至於幻視,我最常見係黑影或者怪光飛嚟飛去。好彩我暫時未見過「人」嘅幻視……人形嘅黑影就見過。

出竅。即係「靈魂」離開咗自己嘅肉體。我試過嘅唔算太誇張,唔會飛到去街外面,頂到盡都係升到上天花板咁上下,然後望到自己嘅肉體攤喺床上面。不過通常都望唔到自己,而係被逼望住間房其他地方。而且都唔可以自由咁飛,亦都無所謂「返回肉身」呢一幕。我嘅「出竅」通常都係俾鬼壓咗一段時間之後,就嚟醒嘅時候,視角會突然之間升咗上去,然後維持一段短時間。可能因為現實裏面無試過「天花視角」,所以出竅嘅時間見到嘅嘢會怪怪哋,多數會伴隨住幻覺。

幻肢。即係感覺到自己啲手腳郁得到,但係視覺上無郁過。算係元神出竅嘅弱化版。「幻肢」呢個詞原本唔係咁解嘅(自己去查啦),不過現象上有啲似,我就借用一下。中咗呢招嗰陣,我望到自己隻手(我習慣側睡嘅),然後試下郁……我感覺到隻手郁咗,可以摸到身體其他部位,但視覺上隻手紋絲不動。甚至我可以踢走張被,亦都感覺到張被俾我踢走咗個狀態,但係視覺上張被仲喺我身上。簡單嚟講,就好似 VR 個畫面 freeze 咗咁款。

假醒。即係醒咗,之後發現原來仲喺夢入面,好似 Inception 咁。假醒唔係俾鬼壓嘅專利,但係我多數假醒都係喺俾鬼壓嘅時候。假醒嘅例子:有次我醒咗之後,爬起身,去廁所痾個尿,洗埋手,先覺得周圍有啲朦朧,而且廁所比平時遠咗,心諗:「咦唔通發緊夢?」過咗幾秒就真係醒咗。唔好以為假醒好平常唔恐怖,如果你好似我咁曾經試過四層假醒先真係醒到……我仲記得最後醒嗰陣係出晒冷汗,個心跳到勁快。

睇完篇嘢俾鬼壓,點算好?

首先,我真係恭喜你呀。然後,如果你好似我咁想盡情享受下俾鬼壓,你可以好似我咁做實驗,尤其如果你入咗「幻肢」或者「出竅」嘅狀態,嗰種感覺都幾奇妙。根據我嘅經驗,俾鬼壓嘅時候,就算知道自己發緊夢,都唔會咁易醒嘅(應該話係想醒都醒唔到),所以就放開懷抱去慢慢試啦。

相反,如果你好很驚,想快啲醒嘅,可以試下逼醒自己。基本上,我逼醒自己得一個方法,就係「用盡奶力」。可以係用力咁擺動四肢(即係掙扎),可以係用力大叫「醒呀醒呀醒呀!!」咁。通常十秒之內就會醒。醒咗之後可能會心有餘悸,最好開燈抖順條氣,去個廁所(如果你怕半夜去廁所就免啦),確認自己係咪真係醒咗。如果想翻瞓,我建議等心情平伏返先,如果唔係隨時一瞓著就壓多次……

結語

我諗其實大部份人都唔想俾鬼壓。就算好似我咁試過上百次,都唔會特別想去再試。所以我最後都係祝大家發個春夢算啦,早抖。

全文 2292 字 (唔計英文、空格、標點)