《捏造歷史要公開譴責 （關於滿州話同普通話）》

關於嗰篇文 [1]，瞓唔着講兩句。
講語言問題嘅時候，貶低其他語言，係態度嘅問題，我唔鍾意但係我唔干涉。
不過捏造一堆歷史去做自己嘅論據，噉嘅自high方式，品味差劣到極點，因此要公開譴責。
金啟孮係滿文、女真文專家，我唔信佢會講咩「北京話係吳語」、「普通話是蹩腳的漢語」、「滿州人導致官話失去入聲」呢啲咁冇常識嘅嘢。點睇嗰篇網上流傳嘅文都係偽託之作。(不過我冇佢啲書喺手，冇得大大聲噉講。)
我淨係講基本嘢：
1) 滿州話同官話語法差十萬九千里，唔係同一隻語言
2) 官話入聲消失嘅格局，喺中原音韻嘅體系已經成形，自己查下成書年份
3) 滿州話對官話嘅影響極微，要搵滿州話借詞，就算喺北京話入面都唔多 (肯定少過粵語啲百越詞)，相反滿州話借用咗大量漢語，清末滿語受到嚴重漢語影響
4) 滿州話有閉音節㗎。有M尾有B尾有P尾有S尾。反而係北方漢人讀唔到滿州話啲尾音。你點可以屈人哋讀唔到入聲？
5) 明末嘅官話，真係唔係吳語… 唔信嘅自己睇一次利瑪竇啲手稿啦。佢描述嘅官話，同普通話九成相似，肯定可以互相對話。
對自己嘅語言要有自信。切忌依賴呢啲外來嘅精神鴉片。
下次有人SHARE啲鬧普通話嘅飛機文，你就推返呢個post上嚟啦。
（我知道好多人會覺得真假冇所謂，總之對粵語有利就可以分享。不過咁都要自high，影衰晒。大佬，同路人唔等於朋友呀，我接受唔到嗰陣，我會割席。)
[1] 篇文大意內容係指普通話係滿州人講到甩甩卡卡嘅漢語，首先講一堆想當然嘅語言發展史，再用 一) 蒙人學官話易、南人學官話難， 二) 北京話入面有阿爾泰成份 呢啲論點去 「證明」自己嘅論述。