《見習無限耆》

睇完《見習無限耆》[1]，再睇咗翼翼 [2] 嘅影評 [3]，⋯⋯
　
　
－－－有劇透－－－
　
　
認為套戲太貪心浪費咗好題材：傳統－科技、老員工－後生老闆／同事，可以表現到好多矛盾，但係故事入面發生嘅事表現唔到呢啲矛盾，劇情幾件事（公司搵CEO、女主角send錯email俾阿媽、女主角老公外遇），亦都冇顯出老intern嘅經驗可以點樣幫到手。
有呢種期望其實好合理，一嚟好多電影嘅套路都係噉，想有take home message，想有啟發，二嚟好多人想睇啲緊湊、刺激嘅故仔。呢套戲冇乜，所以對故事要求高嘅人會唔開心，但係想輕輕鬆鬆，唔用腦睇戲嘅人會覺得好舒服。
呢種舒服嘅感覺同劇情或者有關。主角好似做嘅嘢冇乜特別，只係好「observant」：話頭醒尾，唔會立亂講嘢，只係做啲好平凡嘅嘢就好似幫到好多手噉。或者我哋都好渴望可以有呢種叔叔／伯伯喺身邊。可以做啲幫下手，適當時候俾下意見，但係唔會用經驗撻人，唔會一句食鹽多過食米就否定你嘅睇法。呢種老人家可遇不可求，淨係呢個人物設定令觀眾好舒暢，就算配合真情式劇情，我都冇乜所謂，甚至係咁樣仲好。反而如果佢成套戲充滿張力，噉我不如就去睇The Walk，睇火星任務，睇返啲真係用緊湊做賣點嘅戲好過。
要睇得舒服，或多或少會有啲犧牲。中段開始，多咗唔少估佢唔到嘅劇情發展，令人有種唔知主線係乜嘅感覺。似乎噉做係想刻意模糊，唔想行荷里活小品片嗰種「人物描寫＞小事兩則＞大件事＞主角神威迎刃而解＞齊歡唱式開心結局」嘅八股，想做到用多啲「小事」去刻劃人物性格，刻意唔安排太多高潮，等大家可以享受呢種小故事。
成套戲就好似你入一間餐廳，初時你以為有啲粉麵飯，臨走發現食咗好多前菜、小食、甜品噉。唔多晾肚，但係我好滿足 [4]。
[1] The Intern (http://www.imdb.com/title/tt2361509/)
[2] 唔係 張翼 ，係 翼雙飛
[3] http://style.vjmedia.com.hk/2015/09/29/10800
[4] 滿足還滿足，劇情同對白都有唔少沙石，要將就下