《搭地鐵唔敢坐嘅香港人，點解會走去同輪椅人爭𨋢搭？》

月台度成日見到一大班冇事冇幹嘅人霸住晒部𨋢，唔去搭扶手電梯，然後後面可能係一條超長BB車龍，要等三四轉先至上到地面。明明地鐵嘅「關愛座」同月台部𨋢（lift）都貼住「優先使用」嘅標誌，點解個個都咁驚死唔坐關愛座，但係部𨋢就冚世界狗衝去搭？
喺地鐵坐低，見到老人家唔彈起讓座隨時會俾人問候祖宗十八代，但係好少聽到人會話「你有手有腳就唔好搭𨋢」喎。
點解大家嘅行為會有咁大分歧？
真正有需要搭𨋢上落嘅人：輪椅人、推BB車嘅人，冇位坐一樣可以搭到地鐵；但係入唔到𨋢，就上唔到大堂，要嘥多好多時間。計仆街嚟講，唔使搭𨋢但係走去搭𨋢，係仆街十萬倍。
係咪因為「關愛座」改咗個好名，大家有所避忌？
如果部𨋢叫做「關愛𨋢」，大家係咪就唔夠膽搭？
定係因為鬧人鬧到有位坐嗰啲，個個都龍精虎猛根本唔使搭𨋢？