《傲嬌黨週年爛片巡禮：我的情敵女婿》

序：由兩年前開始，傲嬌黨開始咗一個傳統，就係每逢過年我哋都要睇一套爛片。今年已經係第三年（兩年開始，所以係第三年，我覺得一定有啲朋友會由呢句開始 challenge 我⋯⋯），繼賭城風雲3 （冇我份）、小男人週記3 之後，我哋今年終於唔係睇第三集，而係去咗睇《我的情敵女婿》。其實本來我提過要睇李居明嘅《大迷信 3》但係冇人理我，大家居然會揀一套咁主流嘅戲，同個爛字都扯唔埋欄。

不過我要好佩服決定買飛嘅人。呢套爛片真係爛到極點。

經過史兄嘅「爛片回顧」系列之後，我開始發現世上唔會有咩爛片可以挑戰到我。反而我會諗，究竟點樣可以 enjoy 到呢啲爛片。

我要強調只要心態正確，好多片爛得嚟，其實可以幾好睇。「爛」同「唔好睇」其實係兩個 dimension 嚟嘅，一套片可以唔爛但係唔好睇，都可以爛得嚟又好睇。呢個係一個期望管理嘅問題，有啲人睇戲係想入去聽一個結構完整嘅故事，但係你見棟篤笑有層次咩？東拉西扯傾完一兩個鐘，可能都係冇咩組織可言；好多動作片（無論同愛情有冇關），其實都係好簡單嘅故事，只係畫面取勝。所以齋欣賞畫面或者個別場景，好睇嘅、好笑嘅，大家就可以收貨。

不過呢套《我的情敵女婿》，比起一般爛片可能再爛少少。佢唔係人物設定唔合理、故事唔 make sense 咁簡單，而係個故事簡單到你聽完都唔知自己聽完。大家睇咗個簡介先：

//劏房大王梁華生(任達華 飾)為人市儈勢利，半生女伴無數，是個到處留情的不婚主義者，偏偏與嘉欣(衞詩雅 飾)在不打不相識的錯摸下，竟產生前所未有的強烈感覺，而對她展開熱烈的追求。其時嘉欣剛與負心男友分手，正接受當心理醫生的繼母(劉嘉玲 飾)所安排的特別心理治療，而在「重生」療程中，她與華生接連相遇，由鬥氣冤家，到漸生好感，終於在華生的接連感動下，二人不只發生戀情，甚至決定結婚。
嘉欣把華生帶回家中，華生赫然發現嘉欣的繼母，竟然是自己的初戀情人鍾嘉寶，二人事隔多年再次重逢，彷如隔世，但礙於身份的尷尬，彼此卻不相認。
嘉欣和華生的婚期日漸迫近，嘉寶和華生過去的種種感覺竟日漸湧現，一個曲折離奇，而耐人尋味的跨代戀情，現在才正式開始……//

一般嘅戲，個簡介應該係交待故事背景，但係你估錯咗，呢個簡介原來已經係成個故事嚟！成條故事線，exactly 就係個簡介！最後呢行嘅「才正式開始⋯⋯」後面嘅劇情，只得兩個分場。

（以下有劇透，但係劇透唔會阻礙觀賞。）

成套基本上只得三個主要人物：老母 Dr Bo（劉嘉玲飾）、細女 嘉欣（衛詩雅飾）同女婿 華生（任達華飾），同主線推進有關嘅分場有呢七場戲：
① 華生遇襲，嘉欣擊退施襲者
② 兩人去甜品buffet大食同訴苦
③ 第一次見家長，華生發現，嘉欣老母居然係係自己舊情人 Dr Bo
④ 老母約女婿出嚟傾偈，傾傾下遇襲所以逃走，逃走期間舊日感覺湧現
⑤ 去到海邊各自收到嘉欣電話，老母話以後唔會單獨見面
⑥ 團年飯老母質疑華生唔愛自己個女
（到呢度基本上都冇新資訊）
⑦ 一年後用對白交待華生嘉欣兩人已經分手

冇錯，係對白交待！故事咁短，但係最緊要嘅劇情，係全部用對白交待；爛gag、特技、客串，就好多時間。即係你可以用一分鐘去播呢個四哥同王菀之用CG特技洗啤牌，但係最關鍵嘅感情線可以用一兩句對白帶過。

我睇返我事後回憶寫出嚟嘅分場，同主線有關嘅，加埋應該唔到40分鐘。跟住佢將 69分鐘大量客串明星嘅片段剪碎再加落呢40分鐘入面，就好似睇睇下 YouTube，中間會加插一堆 YouTube 睇片嗰啲唔 skip 得嘅廣告。仲要入面真係有好多好多廣告，係犀利度可以賣完借錢廣告，再加句「咪俾錢中介」落去啲對白度，基本上係將廣告特輯同故事 blend 埋一齊。所以你成日都有啲位想問自己，究竟啱啱嗰十分鐘同齣戲有咩關係？跟住恍然大悟，「係喎，XXX要出一出場！」「哦，廣告嚟嘅！」

之前《玩轉極樂園 CoCo》上映嗰陣插咗個22分鐘嘅《魔雪奇緣 Frozen》短片喺前面，俾人鬧到飛起。我心諗，人哋至少係插喺片頭播吖。

爛片度：４－🍅🍅🍅🍅
好睇度：３ー⭐️⭐️⭐️（主要係因為衛詩雅）

利申：因為今朝一啲意外，我哋睇唔到一開頭嗰20分鐘。