(beta 公測版本)
< 返回

《程繫護理狂想曲》

作者:擇言
日期:2017年2月15日

二月十四號 晴

今日又係平淡嘅星期二。

上完演算法,心血來潮想去一去圖書館,搵一本關於理論嘅書。我決定用啱啱學完嘅底斯查演算法,喺心入面畫一幅中大地圖,地標化成節點,路化成線,搵出由賤標行去圖書館嘅最短路徑。習慣行斜路上樓梯嘅我,今日居然行咗上百萬大道。

月份、日子、星座、節日都係人類嘅發明,通通都係恣意嘅指派,我一直都唔多上心。上到百萬大道,日頭曬到路面有啲曚,或者係我二百磅嘅身軀太過沉重,我覺得瀝青好似波水噉流動。面前企咗一個着住 Nursing Tee 嘅女仔,左手拎住個籃,入面係一堆玫瑰花。見到呢個畫面,我先醒起,係喎,今日係情人節。我唔討厭情侶,亦都唔討厭異性,到而家都未有女朋友,只係因為二次元世界,並唔係我嘅身型或者外貌。

眼前呢個女仔,不停向周圍嘅人賣花,但係冇人理佢,唔係話冇女朋友,就係正眼都唔望掂行掂過。見住佢不斷俾人拒絕,都冇一絲氣餒,繼續保持住完美嘅笑容,佢嘅努力同汗水令我不期然有種想保護佢嘅心情。好多朋友鍾意AKB48之類偶像團體,嗰種心態我終於明白。於是我鼓起勇氣,行埋去。我決定買晒佢手上嘅花,等佢唔使再喺烈日暴曬。

「同學,有冇女朋友呀?不如買支花吖?」

喺我開口之前,佢居然主動開口。
「唔好意思,我仲未出pool呀。」

佢有少少失望噉講:「唔緊要,你一定會搵到另一半嘅。」

見到佢呢個樣,實在係我見猶憐。喺佢行開咗幾步之後,我過去拍一拍佢膊頭。
「唔該,我想買花呀。」

佢有少少驚訝。
「咦,你唔係冇女朋友嘅咩?」
面上有少少雀斑,但係都不減佢嘅甜美。

「係呀,你介唔介意做我兩分鐘女朋友?陪我行呢段百萬大道吖。」

佢冇出聲,岌一岌頭。

我袋入面只係得100蚊,所以買得兩支。我幫佢秤住個籃,拎起兩支花送俾佢,佢拎住兩住支玫瑰,怕怕醜醜噉講:「行咯?」

我哋冇拖手,慢慢行咗呢段百萬大道。我冇問佢嘢,我知道傾偈嘅話時間過得好快。我選擇慢慢跟喺佢後面,望住佢對腳嘅擺動,望住條馬尾嘅搖曳,好好享受我人生第一次由A0,變成O1。我嘅狀態係簡潔O1,但係我嘅心情無比複雜,可能已經係 O(n),吖,應該係 O(e^n) 嘅程度。行咗237步,我哋就到咗圖書館出面。迷戀好短,但係夠我一世回味。臨走我問佢攞咗電話,佢俾咗佢屋企電話我。

29283283

我唔知呢個電話係真定假。或者我應該打個電話去做一個圖靈測試,睇吓電話嘅另一端係真人定係機器。不過我知道我唔需要。就算係真人都好,觸摸唔到嘅,永遠係最美好嘅。

#程繫護理

全文 831 字 (唔計英文、空格、標點)