《生日快樂？》

每一日都至少有一個我識嘅朋友生日，我習慣由每次 Facebook 彈出嚟提我，我就去講句生日快樂，變到就算識得嘅人生日我都好少主動講。喺個 wall 嗰度講一句生日快樂，其實同 Facebook 嘅篤手指（poke）功能冇咩分別，只不過係趁人哋生日嗰日，話俾人聽 ① 自己仲在生 ② 我仲記得你，或者係俾個機會大家用唔同語言、方式，去透過恭祝呢個行為發揮創意之類。

不過做嘢要諗諗原因。如果你係想用「講生日快樂」去維繫朋友之間嘅感情，噉你嘅策略真係非常之無效。如果你平時有同我傾偈、問我問題、或者只係 like 吓我啲 post，我都起碼知道你存在，你唔講生日快樂我都會記得你；相反如果平時你冇乜兩句，你係要揀我至多應酬嗰日先搵我，就算你去旺角裸跑幫我慶祝，我都未必有印象啦。

喺人哋個 wall 嗰度講咗生日快樂，又會引起另一堆「回禮」嘅問題。同送禮、做人情一樣，你今次送咗個　「🎂 生日快樂 🎁🎉 Happy Birthday！」 俾我，下次我回禮又要有返唔知幾多個 emoji，如果你整埋 meme ，改埋圖，用多國語言，我下次又要唔知做返幾多嘢。再唔係如果我同其他人講用咗公仔，同你淨係寫「HBD」，又驚你小器。你都知㗎啦，上得網多嘅人就一定小器嘅，做得唔足又俾人話冇禮貌、黑面、不和之類就廢事啦。

為咗避免咁多麻煩問題，我嘅做法就好簡單：話知你係邊個，總之我就一律唔會去 wall 度講呢啲咁肉麻嘅嘢嘅。我掛住大家嗰時，唔使等到生日，日日我都可以搵你。如果你覺得生日好緊要，我都唔會為咗禮貌累你要用全年最寶貴嘅時間覆我一句咁虛偽嘅祝福。

你係講生日當然每年喺個 wall 嗰度見到一大堆生日快樂 post 係有少少感動，知道有咁多人仲記得我。不過要講最令我感動嘅，肯肯定係平時幫手執吓詞條，每個禮拜用 15 分鐘，寫一個詞條就夠。 粵典 編輯組 words.hk editor group

（BTW 今日係秦沛嘅生日，又係荷蘭脫離神聖羅馬帝國嘅大日子，我真係恭喜你哋呀。資料又係由黃得森提供 :0) ）