《粵文今後路向》
《學苑》最新一期，提出香港新文學論，大概意思係香港發展文學應該跳出書面中文嘅框框，可以改用香港話——真正屬於香港人嘅語言文字——去寫作。雖然內文並冇明言乜嘢係香港話，但係今期每一篇都以漢字書寫，詞彙句式均符合粵語習慣，可以睇得出《學苑》一眾編輯心目中嘅香港話，就係呢隻以粵語為基礎發展出嚟嘅語言。用粵語書寫並唔係新事物，清末已經有傳教士用粵語寫故仔，民初亦有用純粵語嘅報紙，1947年嘅方言文學運動亦有一大堆粵語作品，1980年代打後，亦有一啲用類似文體嘅袋裝書。呢啲例子似乎會令人覺得，粵語嘅書寫從無間斷，近年嘅書寫體亦都只係以往粵語書寫嘅回帶，未必睇得出2013年打後呢粵文風氣嘅創新之處。其中一點，就係我哋冇可能改變過去，但係仲可以改寫未來。藉住《學苑》帶起嘅思潮，我想喺度回應三個問題，希望會俾到少少方向大家。
（一）名不正則言不順？ —— 再論定義問題
我哋日講夜講嘅語言，點樣叫好？細個有一個經常用嘅爛gag，就係有人聽唔清楚，問「咩話？」嗰陣，大家會答「廣東話」。到近期，作家有心無默寫故，都仲有人問佢「點解寫廣東話」。點解叫「廣東話」係一個可以講幾日幾夜嘅課題。我記得有前輩話過，「廣東」唔準確，因為廣東省境內有粵、客、閩三大方言區，抬舉一隻話做廣東話就係鄙視其他兩隻；今期嘅芻議亦都強調正名，叫香港歌而唔係廣東歌，叫香港話唔再叫廣東話。但係「名」呢樣嘢就係咁得意，有好多特性，好似：① 「名」好多時係人哋俾嘅，你哋有邊個一出世個名係自己改嘅？ ② 一個名可以指好多樣嘢 ③ 就算知道以上兩點，大家都係會鍾意自己個名。語言嘅名同人名類似，大家對叫開嘅名硬係有啲歸屬感。而香港人聽慣對自己語言嘅叫法呢？除咗「廣東話」之外，就係「粵語」。除咗呢兩個名之外，其他咩「廣州話」「廣府話」「白話」「粵文」「香港話」都係大家唔習慣嘅名。用咩名係大家嘅選擇，正如人大咗，有時會幫自己改名，呢方面絕對自由。不過拗改名好無謂：與其改變一個名，不如試吓改變大家嘅書寫習慣吖？
（二）書寫規範？
傳承係其中一個推動香港人採用粵語嘅理據，而要傳承大家心目中肯定有一套想傳承嘅對象。有朋友向我提過，覺得1930之後，粵語受到各地語言污染，唔再純潔，所以想追求大家用民初嘅粵語，或者喺粵地一啲鄉下地方收集古舊用法，嚟突出粵語同普通話嘅差異。亦有一啲朋友認為粵語嘅口語全部都寫得出，都有本來嘅漢字，所以要搵返原本嘅字去書寫，以示粵語嘅雅言地位。每個人保護粵語嘅心態都唔同，但係希望大家喺「規範」上面，無論係寫法、用詞，都放寬少少。粵語係東亞語言入面相對幸運嘅一支，一百個詞有九十九個都有慣用寫法。粵語字／香港字頂多會一字有兩個寫法，但係未至於要硬性規定標準先至溝通得到。而一個半個非粵語嘅詞，英語、日語、韓語，甚至係普通話借入都好，都唔會影響粵語嘅主體。大家試諗吓，喺莎士比亞嘅年代，英語好多詞嘅串法仲未定落嚟，但係並冇阻礙佢寫英語嘅戲劇。如果大家要出書，要用咩字，出版社嘅編輯會幫大家執㗎喇。一般人接受咩文字、詞彙，唔接受咩寫法，唔使一個權威出嚟講，大家都應該清楚。唔清楚嘅話，大家又點會成日喺度「牙你老母」，「挽你條命」，叫啲用非主流寫法嘅人返5p呢？總之，慣用嘅詞，唔好標奇立異；冇慣用寫法，用合理嘅假借或者參考其他人做法，已經係最好嘅規範。
（三）我要做啲乜？
呢樣係我寫呢篇文嘅主要目的。芻議重貼幾多次都好，變唔到行動嘅就係一紙空文，而行動唔係靠一個人，要有群眾嘅支援。推廣粵語呢三年，我最感受到嘅就係群眾嘅力量：唔係成班人企喺同一個地方食風會chok到必殺技，而係一班人，抱住同樣理念，各有各做可以發揮無窮威力。粵文唔缺標準，又唔缺理念，缺嘅係作品。三年嚟我睇過好多個用粵文寫嘅作品，當然冇可能篇篇都曠古爍今，但係佳作都唔少。之但係作品嘅量，連攝牙罅都未夠。如果我一個人可以掃晒一次用粵文寫嘅小說，你都諗到大家寫得幾咁少。呢度我有一個具體，而且可以量度（measureable）嘅提案：
1. 以出版為目標，大量創作或者翻譯
2016年用粵文（而唔係淨係對白用粵語）出版嘅書可能少過十本（《史詩式愛情》《香港語文—聽陳蕾士嘅秘密》《西營盤》《絕命上映》仲有冇？）。2017年，起碼已經有本（《小王子廣東話版》），如果可以出版到50本，相信已經係一個創舉，你出到一本書，就幫大家完成咗 2% 喇。
2. 小說以外，挑戰其他文體
有好多人出過粵文嘅小說、舞台劇，不過故仔唔係個個識寫。如果唔慣寫故仔嘅朋友，不妨寫吓其他文體，例如教材、筆記、議論文、實用文、描寫文、抒情文。呢啲路冇乜人行過，唔易行。不過我知道路係人行出嚟嘅。（出開小說嘅好應該繼續寫，唔好停。）
3. 畫公仔，寫童書
世界上啲好少人講嘅語言，好多時都會有童書、繪本。因為細路仔聽唔明啲複雜嘅語言，大條道理用貼近口語啲嘅文字書寫。但係居然，你搵勻晒全香港嘅繪本，都淨係得啲用書面中文寫嘅。你讀書面中文嘅繪本，細路都聽唔明，以為聽緊外星話，又點會有興趣呢？翻譯又好，畫新嘢都好，只要係粵文，就幫到香港嘅細路。