(beta 公測版本)
< 返回

《點樣學廣東話?》

作者:擇言
日期:2015年11月19日

我係廣東話[1]教師,我諗我應該有資格講兩句。不過我唔係諗住寫「學廣東話」嘅方法,而係以香港人嘅角度,去答呢個問題。
 
學語言,我嘅主張係一定要根據學生語言背景、歲數、環境去判斷,唔會有一套萬能方法。而第二語言教學/外語教學係一個專門學問,唔係個個識講廣東話嘅人,求其噏兩句就會教得識對方。
 
喺我繼續廢噏之前,考下大家:「食飯喇」同「食咗飯喇」兩句都用「喇 (laa3)」去收尾,究竟加個「喇」有咩用?[2]
 
講起「點樣學」一樣嘢,大家嘅答案其實可以分做三類:
① 點樣提升學習意欲
② 點樣增加吸收
③ 點樣學識聽講讀寫/用廣東話去交流
 
大家嘅答案其實離唔開①同②兩種:例如「識女朋友/男朋友」「搵老公/搵老婆」「搬去香港住」呢啲都係令到「學廣東話」變得迫切嘅方法,並係對學習本身嘅建議;仲有啲人會話可以「睇TVB」「睇戲」「聽歌」「開住個收音機瘋狂聽」,呢啲方法都唔係學習本身,而係令你多咗渠道接收。
 
對於一個完全唔識廣東話嘅人而言,呢啲答案係完全冇幫助嘅。識學習嘅人自然會用盡一切辦法提升自己嘅意欲,或者增加接觸嘅機會。但係有接觸同有學習係兩件事。
 
③嘅建議先係最實在嘅嘢,但係未教過粵語嘅人好難俾到意見。
要學聽講讀寫,主要都離唔開兩個途徑:搵人教,自己學。如果你話到俾人聽邊度有得學,或者用咩教材,其實已經幫到好大忙。
 
學粵語嘅教材,本身冇中文基礎嘅,要靠英文學。初級嘅多,之後一跳就係中至高級教材[3]。網上字典都會好幫到手。識漢字嘅可以睇《粵典》,唔識嘅可以用 CantoDict。另外有一啲另類啲嘅,係靠聽嘅,好似 Pimsleur 同 Glossika,可以配合教科書一齊用。如果唔係特別自律嘅人,去上堂啦。

好多人問點樣學廣東話,可能有個心態係想速成,想一兩個月就學識。對於客語人、閩語人、贛語人嚟講絕對冇問題。其他地區嘅人,未必得,要好俾心機。學語言冇乜捷徑,你係真係要一步一步,生詞、語法、語句,逐步逐步去儲去學㗎。明白咗呢啲,係成功嘅基礎嚟。
 
如果你身為粵語人,好想俾下意見,你就要記住呢兩點:
(A) 除非對方對耳有完美模仿能力,否則一定要學拼音。耶魯又好、LSHK粵拼都好。唔識拼音=用唔到詞典/用唔到教科書/要靠耳仔記發音。正常人冇可能做到。
 
(B) 記住廣東話有語法,不過未接受過訓練嘅人,未必識答啲太深嘅語法問題。如果你想自己學識粵語嘅語法,可以睇鄧思穎嘅《粵語語法講義》同埋 Stephen Matthews and Virginia Yip 嘅 A comprehensive Cantonese grammar。睇完先好開始教人。
 
你見到無師自通、睇劇學得識、娶咗個老婆無啦啦就識講呢啲,一係你無視咗人哋嘅努力,一係就佢本身資質過人。喺香港呢個,人人都以為廣東話冇得學,連最基本廣東話嘅語法都唔識嘅地方,學得識嘅係萬中無一。如果你唔知點答呢條問題,以前我會叫你留俾專家答,而家希望你睇完之後,可以俾到多啲有用嘅建議對方啦。
 
----
[1] 得喇,我知道又會有人話廣東話要包括廣東粵客潮三區,正名係廣州話乜乜物物。但係香港係噉叫吖嘛。你鍾意可以叫返「廣州話」「白話」「香港粵語」「市區粵語」「標準粵語」

[2] 如果你識答,即係你真係學過些少粵語語法,恭喜你先。加「喇」係用嚟表示「同而家呢刻有關」,代表呢句嘢係用嚟連結返去而家嘅狀況。所以動詞唔變化嘅形態,加「喇」就會表示而家呢刻應該、準備做嘅嘢。動詞完成態加「喇」,就係表示一件事喺呢一刻已經完成,而「完成咗」呢個狀態持續到家下。所以「佢琴日返咗嚟喇」呢句,「返咗嚟」要同呢一刻嘅狀態有關,如果後面加「跟住今朝走咗。」就唔啱語法,但係加「跟住瞓到隻豬噉。」就OK。

[3] (書單唔寫住,你哋得閒就自己整理啦)

全文 1187 字 (唔計英文、空格、標點)