(beta 公測版本)
< 返回

《面都唔俾,即係拜拜都唔使講啦》

作者:擇言
日期:2017年4月1日

有一日喺大學某處,有人截住我做問卷。

當時我本身要參加某個 seminar,早到咗所以都唔介意做,當然我都明白十份問卷九份都係sell嘢。

問卷嘅左上角,係清楚嘅 Prudential 標誌,不過都話咗做,又咁有誠意,就做埋佢啦。大概都係問我有冇理財計劃呀,想唔想積累財富呀,點樣分佈資產呀之類。當時佢叫我去聽一個關於資產管理嘅講座,但係我真係冇乜興趣。就同佢講其實我冇興趣,自己都叫做有認識,婉拒咗。

(大佬,有咩好聽?由入U開始已經無限咁多朋友sell我,至於保險、資產管理要學嗰啲嘢,就算唔考牌,Google都搵到晒啦。)

之後我都有留低電話:你鍾意 whatsapp send 啲咩最新計劃俾我,如果我咁啱有需要,真係搵你買都唔出奇。

點知佢居然打電話過嚟。大家都知道呢個係打字嘅世代。WhatsApp 錄音都嬲啦,何苦要用電話呢?我習慣任何電話,有冇來電都聽嘅。點知打嚟都係約我聽資產管理講座。我⋯⋯真係冇興趣亦冇需要,你點講,都唔會變咗啲需要出嚟㗎。

跟住佢就問,可唔可以俾個面,食餐飯。大佬我四月真係排到密晒,有時間食飯都留返同屋企人,同朋友先。愛就係選擇嘛。時間都係資產,時間都要管理㗎。我唯有同佢講,「真係唔好意思,真係冇興趣同冇時間。」

跟住,佢講咗一句,正到我覺得要打出嚟嘅嘢。

「面都唔俾,即係拜拜都唔使講啦。」
「面都唔俾,即係拜拜都唔使講啦。」
「面都唔俾,即係拜拜都唔使講啦。」

(太震憾要打三次。)

之後,就收咗線喇。

(厚道,唔開名,唔開電話)

全文 486 字 (唔計英文、空格、標點)