《新年快樂！》

近年有個風氣，就係過年見面，要諗定一大堆四字詞，拋吓書包。

過年嘅祝賀說話好多：恭喜發財，生意興隆，豬籠入水，五福臨門，橫財就手，盆滿缽滿。你要數多幾多十個幾多百個，都唔成問題。不過遇着讀書人，尤其係受過華夏文化薰陶，中文特別叻嘅朋友，就要小心嘞：萬一講錯一句「新年快樂」，你喺對方心目中就難免倒扣二百分。事關祝賀嘅說話咁多，講「新年快樂」太表面、太膚淺，咁啱新年對New Year，快樂對Happy，自然唔係歐化中文，就係劣質語文，污染中文土壤，有辱華夏文明。彷彿你講「新年」就係冇文化，講「快樂」就係冇學識。

我唔鍾意新年，但係好在意自己快唔快樂，所以想喺度為「快樂」兩個字講返句公道說話。

「新年快樂」呢句係咪歐化？梗係歐化啦！錯嘅唔係文字，千錯萬錯係思想歐化。華夏文化一直都冇人真心想對方開心快樂：十句祝賀，七句講錢，兩句講生仔。睇漢詩有幾多首講「喜樂常在」「歡恩美滿」？開心從來都唔係華夏嘅中心價值。大家只係好似打機玩育成、玩大富翁一樣，想多啲人搵錢生仔，帶挈吓自己而已。時代變咗，我哋關心嘅嘢都變咗。我哋唔再想發橫財，唔想自己不勞而獲，唔想迫人生仔；我哋要返去第一步：過返開心少少嘅人生先再諗。

唔知係咪英文人冇文化，所以講「Happy New Year」唔會俾人批鬥；之但係日本韓國有華夏遺風，人哋都係「あけましておめでとうございます」「새해 복 만이 받으세요」，都係一句固定句式。相比英日韓嘅簡約清新，連珠爆發一堆四字祝賀語，非但冇美感，仲有啲土豪，有啲庸俗添。有時諗，如果要舞文弄墨，講祝賀說話不如每家寫篇四六駢文[1]吖？作首律詩吖？度返副春聯吖？開場白十句八句四字格，只不過係門面；入到門口，派完利是，仲可以言之有物，唔係流於盤問說教嘅，先至再講文化啦。

我嘅希望好平實，好謙卑：我淨係想我身邊嘅人幸福快樂。真心話要直接講，你話我冇文化都好，祝咁多位「新年快樂」。

[1] 「駢」音pin4，便宜個便。中大朋友，記得學生報要投 ① 破駢
#zaak2017 #17.009