(beta 公測版本)
< 返回

《失眠狂想曲》

作者:擇言
日期:2017年1月20日

入夜嘅屋企異常安靜,冇人聲、冇風聲、冇電視、冇收音機,淨係得嘀嘀嘚嘚嘅秒針,一輕一重、一輕一重,提醒我時間嘅流動。飲咗大量咖啡嘅我,心跳慢唔落嚟,微弱噉用秒針一又二分一嘅速度幫我打拍子。
 
掛鐘嘅安靜嘈到我一片空白,嘈到我連心跳聲都聽唔到。我望住Macbook入面熟悉嘅藍白介面,無論射入我眼球嘅光子反映住幾多光暗對比,眼前嘅影像似乎都無法轉換成有用嘅資訊。我確切知道訊號到咗我腦嘅後方,再向外擴散。我感覺唔到邊樣有意義嘅物件。除咗自己嘅存在之外,我似乎咩都感覺唔到。

自己嘅感覺越強烈,就越覺得周圍冇嘢值得講。明明冇嘢好講,但係呢種想表達自己嘅慾望停唔到落嚟。我嘅布洛克同韋尼奇好似未使抖,唔肯陪伴冇辦法再運作嘅前額葉休息。腦入面嘅小人應該好落力咁提我下一分鐘要做咩,但係我好似聽極都聽唔清左腦同右腦傾緊啲乜——所以我都係交俾十隻手指,就好似玩Ouija,玩碟仙一樣,話我知我跟住要做乜。但係手指打出嚟嘅,係一句又一句,我自己都睇唔明嘅句子。

打字嘅聲音,慢慢蓋過安靜嘅嘈吵。我嘅心跳都放慢返去秒針嘅拍子。我睇到枱面慢慢左傾,畫面時光時暗。
 
睇嚟我應該去瞓。
 
#wtfijw #zaak2017

全文 419 字 (唔計英文、空格、標點)