(beta 公測版本)
< 返回

《王菲、閻奕格、袁澧林》

作者:牛刀
日期:2016年12月31日

今朝睇到王菲噚晚演唱會嘅片段,再次感到婉惜。佢曾經係賣飛佛女歌手,但係我2010年代起就開始唔係咁諗。

最欣賞佢嘅個人特色。我覺得王菲佢可貴在於可塑。以往佢聲線嘅溫婉、唱腔嘅空靈、個性嘅跳脫,係得天獨厚之處。佢可以行商業路線,而且正正以此開展音樂事業(王靖雯時期《多得他》已經係代表作),成績仲一直都唔錯,不過慢慢自主空間大咗,就困佢唔住,開始呈現另有嘅風格。當時同同公司嘅Beyond合作,已經濕濕碎,佢大把突破(以下時序亂晒):《菲靡靡之音》向鄧麗君致敬(佢讀「yuan」韻腹係u唔係ü);「轉音」/「滑音」耍家;近得竇唯多,型格埋一份,自己作曲;又整-r尾音(《Di-Dar》),又吸收The Cranberries嘅「lar」咬字(將《Dreams》翻唱成《夢中人》)、翻唱《乘客》(《Going Home》)模仿Sophie Zelmani;又滲British rock,如此落去,去到《寓言》、《唱遊》應該玩得好犀利喇(可惜未聽過,唔熟)。同夕爺嘅投契(「無名份嘅夫妻」),更加係福氣,又要加分。

講咁多,都唔應該忽略對歌手好緊要嘅一點,就係現場表現穩定與否。以往嘅就唔多清楚,只係知有指佢上台前冇開聲習慣。近年嘅話,回晒塘。老就難養聲,又唔夠氣。

上面演唱會,要唱成場。相比嚟講,算係有努力搭救,運用一貫嘅轉音/滑音技巧,等走音嗰陣聽落冇咁難堪,連唱呢挺歌都用《Di-Dar》嗰款唱法,可能係為咗掩飾氣息問題。只能夠慨嘆歌后嘅黃金時代一去不返。

改變諗法嘅另一個原因,就係畀勁「敵」取代。我「新歡」係後起之秀閻奕格,後生可畏。《星光大道》已經展現出驚人嘅跨歌種駕馭能力,佢學美聲嘅基礎、闊音域,令人眼前一亮,喺比賽嶄露頭角,奠定「閻羅王」稱王之路。原來之前已經參加過比賽,表演過,錄過碟(不過好似出嗰時冇佢本人同意),唱過電視劇同迪士尼電影插曲,經驗豐富,技巧嫻熟。同父母寫信要唱歌一事,睇到佢嘅熱誠。(音樂世家,雙親都玩音樂,老豆係香港中樂團指揮閻惠昌。聽聞有負面風評,不過唔熟佢個圈。)更加唔好講虛心同埋力求完美嘅態度。比完賽、畢完業,歌星路都唔係一帆風順,呢兩三年先叫做過咗波折。之不過,經歷令人成熟,佢已經到咗隨心所欲揀招式去演繹嘅境界喇。上年喺台灣,難得有校園演出,梗係狗衝啦。無悔啊!佢淨係用咪都已經黐晒線,唱《A.I.N.Y. 愛你》喺禮堂自製迴音!同學仔一視同仁,冇落echo效果㗎!點可以唔拜服?唉,幾時先出碟啊?望穿秋水……華研唔好糟蹋佢嘅實力啊,我真心睇好佢超越王菲㗎。

講起多樣、多面,諗起另一個新女星,不過佢唔係唱歌出身。有人叫佢美心少女,有人叫佢文青女神,佢係Angela Yuen 袁澧林。如果有人問佢咩系,我會答佢:風系。但係咁就變咗做定型。多面,係演員嘅必要條件。起初有啲疑慮,回顧呢一年,睇嚟係多餘,某啲相仲影到佢開始有少少星味添。坊間咪同佢定型就真。唔係好知星味係咪要忽遠忽近,有非凡地位但係感覺親切。係嘅話,張國榮喺《今夜不設防》收放自如、率真不減星味嘅表現,應該一絕;佢本人嘅相貌同氣質帶挈唔少添。咁嘅話,有啲難喎,又係同輩,又有互相嘅相識。又不過,可能唔只一條方程式呢。來日方長,短短2016年稱唔上the year of Angela Lai-lam Yuen。Let there be decades. 風華、風華!百看不厭嘅女仔太少喇。

全文 1024 字 (唔計英文、空格、標點)