(beta 公測版本)
< 返回

《辯論》

日期:2016年12月8日

細個一直唔太認同辯論(Debate)呢種活動,因為覺得佢會薰陶人成為sophist,變成相對主義者,拗正又得,拗反又得,毫無立場可言。要拗就應該拗自己心目中認為啱嘅嘢。

而家對辯論稍為改觀。雖然我都仍然認為「要拗就應該拗自己心目中認為啱嘅嘢。」,但如果撇除呢一點唔睇住,辯論的確係幫人掌握說服人嘅技巧,而呢種技巧係無論你啱唔啱都好,都係有需要嘅。就當你有「好啱」嘅諗法(姑勿論咩為之啱啦),你冇辦法說服人嘅話,好多時只可以做到「獨善其身」,而唔會「兼達天下」。只可以「修身」,又或者可以「齊家」;但「治國」同「平天下」就唔洗講啦。
一個好人,當然可以滿足於「獨善其身」,係冇問題嘅。但「兼達天下」、「治國」同「平天下」好多時都唔係講滿唔滿足,係講有冇呢種責任感。冇嘅話,固然可以做個好人,唔應該受好多批評;正如亦都唔係人人有感召覺得有責任去貧窮國家做無國界醫生一樣。非滿足與否,係自身因天命、又或者自己所畀自己而有嘅責任;係責任同責任感。

辯論唔單止幫人培養說服人嘅能力,仲幫人習慣面對駁斥,可以沉著思考同應對,唔會因為人地少少反對就失去理智。佢又可以畀人學習去做資料搜集、資料篩選、資料整合,再由此砌一段敘述出嚟﹣呢啲都係難能可貴嘅技能。

仲有,佢令人習慣從對手嘅角度思考,呢點都好重要。一嚟令你預先諗定點樣駁斥人哋嘅駁斥,呢種係智謀、洞悉先機嘅能力。

二嚟藉呢種思維可以明白到自己立場嘅弱點,呢種係自省嘅能力。知道弱點有咩好處呢?從功利角度咁睇,呢種自省能力畀你預先諗下點去改善自己,繼而將弱點剔除;又或者預先諗方法遮咗佢。但我覺得更加有用嘅技能係你學識唔好咁狂傲自大、目空一切,因為人嘅大部份諗法都有其限制,未必下下都完滿解決到所有問題、所有矛盾,甚至好多時自己成套系統都會有啲位係有矛盾、唔相容﹣有時要解決可能要引入其他更荒謬、難以接受嘅前題、有時可能係要稍為忽略某啲客觀事實、有時係推到最後你發覺有啲前題係難以證明嘅、有時係價值問題。呢種因自省而有嘅謙遜,係即使嗰場辯論完咗,都係有助於一個人嘅修養。

三嚟當你要深入思考人地嘅立場,你就會明白對方嘅思維、思路,呢種係同理心嘅能力。同理心唔代表你認同佢,只不過令你唔會輕易將對方諗成「唔講道理」同「唔識思考」嘅蠢才。況且,有呢種同理心嘅人,先真真正正有資格判斷一個人係咪「唔講道理」同「唔識思考」。因為你幫佢諗埋佢嗰份,然後發覺...依,真係好多漏洞喎。

不過積極咁睇,有同理心係人與人之間乃至社會嘅和諧之本。「和諧」呢個詞雖然被人用到臭晒,但有邊個唔想人倫之間、社會大眾都安定和諧?「和諧」變成貶義詞只不過因為佢代表緊嘅係「被抑壓嘅唔和諧」,係一種「由上而下施壓嘅和諧」。但如果大家真係可以唔帶敵意(唔代表唔尖銳、唔透徹、唔深入同唔落人面)咁商量,然後真係出到有意義嘅結論,有邊個唔想?就算人性係唔能夠完全冇敵意,咁起碼係「我唔認同你,但我唔會想殺你全家。」嗰種。

仲有,當你嘗試明白對方嘅觀點,你先會真正睇得出「價值嘅分歧」。此外,你亦都有可能稍稍窺探到對方最擔心啲乜、最想要啲乜、最愛乜、最恨乜、最覺得咩有價值。有啲時候甚至你會產生同情,甚至於去到某啲位會修改自己價值觀𠻹。「點解佢有咁嘅價值呢?」,「點解佢同我唔同呢?」,「我嘅價值係咪真係咁穩固同高尚呢?」,呢啲係有同理心嘅人至會反思。從呢種反思當中,你可能會更清楚自己價值觀嘅價值,覺得更值得去維護佢;又或者你都會尊重一啲同你唔相符、唔夾,但係仍係一套值得存在嘅價值系統;又或者你會經過深思後諗明,點解某啲價值系統係唔應該存在喺世上,而你要努力去辯贏佢。

但係雖則咁講,當一個有權、有勢、有決策能力同有影響力嘅人同你講:「大家要互相明白大家,唔好咁有敵意啦。」呢種人一係極度虛偽,一係就極冇自省能力、毫無同理心。喺呢種情況下,磨滅同理心嘅並唔係「討論到想殺人全家」好憤怒嘅人,而係啲老奸巨滑、或懵然無知,自恃有權勢,濫用和諧,以至破壞同理心同和諧嘅人。anyway..有啲離題。

如果咁睇,辯論似係一種磨刀嘅工具,幫你磨利「辯才」,即係民主社會好重要嘅技能之一(立法會唔係用嚟辯論架咩?...吖,好似唔係,至少香港嗰個唔係。)。不過呢個比喻又唔完全貼切,因為磨刀工具相對嚟講係好中性,而辯論則係蘊藏咗「點拗都得」嘅價值。所以除非你本身有呢種修為,對真假對錯善惡有一定嘅執著,如果唔係,會唔會好易跌入"The dark side"呢?
#我唔識辯論

全文 1554 字 (唔計英文、空格、標點)