《單機遊戲》

我覺得最彰顯到電腦遊戲嘅優點始終係傳統嘅Single player game。（利申：而家已經好少打機）

MMORPG又好、雙人或多人競技遊戲都好，佢哋好唔好玩唔單係睇遊戲設計，仲有另一個好大嘅因素﹣就係「有人陪你一齊玩」。有人一齊嘅話，好多平平無奇嘅嘢都可以變得好好玩，因為人係千變萬化、你估佢唔到嘅。同埋同人建立關係本身就係開心嘅事。

但係Single Player就冇呢個優勢，所以佢要靠其他嘢先會令人覺得好玩。Single player嘅遊戲講究嘅係故事、係劇本；係關於點樣解構一個虛幻世界、點樣令到玩家同虛構角色產生情感上嘅連結；點樣畀玩家以另一個人嘅性格、背景去做決定；點樣挑起人嘅喜怒哀樂，點樣引起道德反思；。如果小說係藝術、電影係藝術，咁電腦遊戲更加係一種比人忽視嘅藝術。

電腦遊戲到而家都仍然努力突破界限（視覺、音響、Gameplay上），亦都突破遊戲同玩家嘅關係；好似Stanley Parable會想break the fourth wall；Specs Op: The Line迫你選擇做啲殘暴嘅戰爭罪行，睇你會唔會選擇按住道德責任直情唔玩個遊戲；Portal個"narrator"會呃你；2013嘅小遊戲Depression Quest畀你以抑鬱病人嘅目光睇世界；2015有個叫Among the Sleep遊戲，以BB仔嘅眼光，好奇幻咁睇破碎家庭；最近有隻遊戲叫Cancer that dragon直情係畀你冇選擇，要你面對自己個仔有癌症嘅時候係有幾咁無助。

就算唔講一啲刻意打破玩家既定角色同埋期望嘅遊戲，就咁講返啲傳統嘅遊戲模式；當中嘅故事有唔少都係精彩絕倫，有啲更加係刻骨銘心。Legend of Zelda啊、Final Fantasy啊、Baldur's Gate啊、Dragon Age啊、Metal Gear Solid啊；有啲係好感人，譬如The Last of Us啊、Shadow of the Colossus、Life is Strange啊；仲有譬如Bioshock啊、Undertale啊...etc （其實我數唔晒，漏咗好多經典或者近年嘅好遊戲）就算係恐怖遊戲，好唔少都有好好嘅劇本同故事喺背後，有唔少唔係為嚇而嚇、為驚而驚。

Story-telling、講故事係人類核心技能之一，我覺得比思辨、或者其他「實用技能」更加重要。Story-telling唔單止係指用把口將故事講得好聽，而係你有冇能力接收故事、有冇能力發掘故事嘅意義同有冇能力（係能力。）畀故事感動。

雖然而家基本上係冇時間打機，但係我覺得以前小學中學玩嘅RPG係有好好幫我去欣賞Story-telling呢樣嘢架。(btw，而家流行嘅電話/tablet minigame好似都唔係以Story-telling為重點呢.. sosad）