《愛佢，就會想佢好》

香港文化破滅，非文不善、化不行，敝在冇愛。冇愛而崇外，破滅之道也。

香港地少，資源唔多，人才又少，因為多少呢個概念係相對嘅。對比起人地成個國家所擁有嘅龐大資源，就算TVB今時今日依然係喺佢嘅黃金時代，佢都難以拍出一套同美劇媲美嘅劇集。人地一套劇係成個英語世界加上其他識得英文嘅地區都會睇，你同我講廣東話武俠片？講笑咩？仲有，人地喺全國入面揀個最靚仔、最靚女嘅出嚟做主角，你就喺七百萬人當中搵人做男神、做花旦，點比？其實你將上面所講嘅嘢引伸去其他文化同產業，原理都係一樣。無論人又好、物又好，我地都唔夠人哋一個國家鬥。用Natural Selection去睇 - "Rarity precedes extinction"，點鬥都鬥唔驘；太少、太細、太弱，就算香港入面圍內鬥、圍內揀，都鬥唔出啲好勁嘅嘢出嚟，仲可能畀人淘汰㖭。

咦，咁諗諗下，既然人地成個國家去做，地多人多財多才多，實做得好啲；而我哋又咁難先做得好，咁點解唔索性將人哋好嘅文化同產業直接搬過嚟就算呢？慳水慳力，效果又好喎，何樂而不為？ 呢個就係崇優帶嚟嘅結果，係必然嘅結果 ﹣ 你想要「最好」，你就得到「最好」。個結論好合情合理、好自然而然，但係…就係好怪。

點解會覺得怪呢？因為人本來就唔係一種純粹崇優嘅動物，人係有愛嘅動物。點解你唔去認李嘉誠做老竇呢（假設佢肯認你做仔）﹣明明佢係比你阿爸更有財有勢，係個「更好」嘅爸爸？因為你愛你家人、你愛你老竇，呢啲唔係「好」可以代替到。點解你唔係一見到個最靚仔、最有錢、最聰明嘅人就走去識佢，放棄晒啲冇咁「好」嘅朋友呢？因為你知道朋友睇嘅係感情，唔係淨係睇佢個人特質有幾好。

個道理一字咁淺，就係人本身唔會盲中中一味咁崇優，人係會愛一啲唔係最好嘅嘢。如果有人話：「李嘉誠好過我阿爸喎，咁我搵佢代替我阿爸啦。」咁代表咩？就係代表佢從來冇愛過佢老竇囉。

咁但係有愛係咪就唔崇優呢？呢個問題我唔直接答你，我用例子答你。假設你愛人係個畫家，你會唔會想佢啲畫愈畫愈好？答：梗係想。咁萬一佢喺低潮期，乜都畫唔好，咁你會唔會就唔愛佢？答：梗唔會。咁如果佢自暴自棄，又或者耽於逸樂，咁你會唔會同佢講「咁就最好喇，你就係最好架喇」？答：你話會唔會？有愛又崇優，你就會想佢好；冇愛又崇優，咁你就會走佬，就係咁簡單。不過有愛又唔崇優，咁一係就自欺到不能自拔，一係就變咗玻璃心喇。

所以我唔太介意人地睇外語劇、聽外文歌、鍾意外來文化。因為呢啲嘢總係有優嘅一面、係有啲值得我哋去崇嘅地方、有啲值得發掘出嚟學習嘅地方，甚至幫我哋提高品味、擴展眼界、拉闊想象。不過鍾意還鍾意，愛還愛。愛係犧牲、愛就係當佢差會想佢好、愛係就算差都不捨不棄，而未必時時刻刻都有種「我好鍾意啊」嘅感覺㗎。