(beta 公測版本)
< 返回

《豬扒腸仔麵》

作者:擇言
日期:2016年8月4日

圍城附近得兩間餐廳。一間喺城外,一間喺城內。城外嘅餐廳係大財團控制,價位高,味道只係一般。難得城內有舖頭開張,點都要試一試。

呢間餐廳叫自己做茶室,不過其實係開放式設計嚟。餐廳對上一手行高級路線,所以枱枱櫈櫈都有格調:客座係玻璃圓枱配以皮梳化;伙計企喺吧枱後,水吧係流線型設計。不過高級嘅餐廳做唔住,大家或者只係要啲平民享受,茶記開喺呢度有啲違和,不過更加啱我心水。

坐低之後一個後生女驚驚青青噉放低一個單調嘅menu,白底紅字,用標楷體寫住幾十個餐。有麥皮、有通粉、有三文治、有公仔麵。早餐嗰格,有一個餐嘅字體大過其他少少,叫清仔套餐。豬扒雞扒任擇一款,再加一餸配丁麵,卅五蚊送熱飲。我諗都唔諗就嗌咗個豬扒腸仔麵。

唔到五分鐘,伙記捧住個白色底,藍色花紋嘅陶瓷碗過嚟。一塊豬扒,齊揖揖噉剪咗做七等份,晾喺麵面;一條腸仔喺豬扒隔籬。你知唔知平時啲腸仔,其實係雞肉腸嚟㗎?英文好似叫chicken frank。所以腸仔同豬扒一齊食,都唔會咁哘,但係配雞扒就略嫌單調。初時我只係期望啲麵唔好太腍,啲豬扒有煮熟,條腸仔冇發脹。或者係上次喺城外餐廳食咗塊生雞扒嘅陰影,我對呢頭啲餐廳已經冇咩期望喇。

點知一咬一啖豬扒。不得了。塊豬扒厚薄均勻,大概三毫米厚;唔係浸熟,而係輕輕煎過。食油又唔多,啱啱煎出香口,又有一種炭燒嘅苦澀口感。條腸仔都係煎腸,浸咗啲湯都仲有煎腸嘅香味。麵底係出前一丁,本身有蠟質嘅麵,一般唔係煮唔熟硬掘掘就係腍過頭。呢個麵居然做到彈牙效果:麵嘅外層完全熟透,但係麵芯仲係咁煙韌。

只係最簡單嘅廉價食材,調理適中,喺我眼中已經近乎完美。我又使咩食咩黑毛豬、拉麵、德國腸?

其實開心真係可以好簡單。

全文 605 字 (唔計英文、空格、標點)