《啲廢青連岳飛係邊個都唔知》

啱啱睇到段片，係大家恥笑 ‪#‎吳若希‬ 唔知岳飛係邊個，以為岳飛塊面好紅，又同人結義，背脊刺咗「反清復明」。唔好講真假住，大家覺得佢唔知岳飛係邊個，有咩問題？
　
　
我試吓拋兩個理由出嚟：
一） 岳飛係歷史名將，一定要識
二） 細個課文有《岳飛之少年時代》，學過嘅嘢應該記得
　
我哋不如做個實驗。
　
【第一部份】
我抽一堆中國歷史名將，大家講唔講得出佢哋係咩年代嘅人，有咩事蹟？
① 王翦
② 韓信
③ 衛青
④ 郭子儀
⑤ 袁崇煥
　
【第二部份】
我想講幾樣初中應該學過嘅嘢，又考考大家記唔記得？
① 證明兩個三角形全等嘅條件
② 第一次世界大戰嘅遠因近因
③ 官渡之戰嘅經過
④ 動物細胞同植物細胞嘅分別
⑤ 藍礬（硫酸銅，Copper (II) sulphate） 嘅製作方法
　
我唔係為冇常識辯解，而係大家對「常識」嘅理解可以有好大分歧。有啲乜嘢一定要識，取決於好多因素。有啲係學校學，有啲係屋企人講，更加多係睇流行文化：小說、流行曲、大戲、電影、電腦遊戲呢啲聽返嚟。電視做《武媚娘》嗰期，個個都知道唐代有個皇帝叫李顯，聽過上官婉兒；興打《三國志》嗰期個個都識一百幾十個三國武將；鄭秀文出咗首歌，大家就會聽過「薩拉熱窩」（不過未必知道波斯尼亞係乜，遑論會聽過咩黑塞哥維那）。大家記得「全等三角形」嘅條件，可能都係因為嗰首《Side Angle Side》咋！
　
一個家庭主婦，或者會話：「你劏條魚都唔識﹐好冇常識囉！」
一個電腦人，或者會話：「你連 windows 都唔識裝，好冇常識囉！」
一個會計人，或者會話：「你連 credit 同 debit 都唔識分，好冇常識囉！」
一個音樂人，或者會話：「你連簡譜都唔識睇，好冇常識囉！」
一個中文人，或者會話：「你連古文八大家都唔識，好冇常識囉！」
　
其實好多嘢，可能真係唔係常識嚟㗎。
而呢個世界個個都識埋啲一模一樣嘅嘢，真係未必係好事。如果搵一千個人，列一堆佢哋認為個個都要識嘅「常識」出嚟，可能要過千頁嘅書先包得晒。
　
係嘞，上面嗰10條，你哋識唔識得晒？
　
咁都唔識？好冇常識囉！
　
＝＝＝＝
歡迎 Share 出去，考吓啲廢青廢中廢老。