《廁所激進派：裝電動廁所板》

喺日本無論係屋企定係公廁，好多時都有裝電動廁所板【ウォシュレット】：一塊可以發熱、噴水嘅裝置。

有咗呢塊板，開完大，個廁所識得噴暖水幫你洗pat pat，唔識用廁紙抹到出血，可以話係上個世紀嘅最偉大發明。

我肯定有好多香港人，同我一樣頂唔順要紙巾磨損屁股嘅痛苦。但係同時，又覺得呢啲嘢太浮誇，覺得廁紙已經做到晒所有嘢，因而呢種廁板唔多普遍。反而甚至為咗抹得舒服，有廠商仲出咗專愛嚟抹pat pat，沖廁唔會塞嘅濕紙巾添。抹pat紙圍返講緊五毫子一張，但係去一次要用三四張，兩蚊一次。用咁舒服嘅方法抆屎，兩千次就要四千蚊。兩千次即係幾耐呢，如果你間屋有四個人，每人每日屙一次，唔使兩年已經超過二千次啦。四千蚊夠買到啲咩？就係買到一塊識噴水嘅廁所板喇。仲未計你因為有廁板清潔，慳返幾多抹嘅時間，同埋減少patpat黐住晒唔舒服嘅情況。

如果你仲係覺得不可思議，我可以話你聽呢樣嘢我二十年前去印尼旅行已經見過。當時想沖廁點知㩒錯洗PAT，嚇到我癩屎 (好在我喺廁所)並唔係咩新科技。

至不過，即使個科技唔新，大家寧願用好多錢買幾呎階磚，或者用喺食嘢，都唔肯用多少少錢去改善生活質素，導致一切同生活有關嘅科技，都落後過人。