《毒撚睇BL：同級生影評》

【腐】去戲院睇咗《同級生》。因為係最夜嗰場所以一半都坐唔滿（之前嗰場幾乎爆）。男人出乎意料咁多，足足有六七個。有個組合係兩男一女，雖然咁講唔係太好，但似足兩隻兵陪娘娘睇 BL 。

講返套嘢啦。今次算係我第一次認真睇 BL ，之前最多都係求其揭下啲 BL 漫。我本身就唔係好抗拒 BL 嘅，但一定唔係鍾意。我一向對 BL 嘅印象都係所謂嘅 YAOI ，即係無高潮無結尾無意義。我安慰自己，可能呢套講法都過時啦，你睇下以前啲集集一樣嘅《幪面超人》都可以變到依家咁峰迴路轉，可能依家啲 BL 都充滿劇情呢！抱住樂觀嘅心態入場，睇咗一粒鐘，哇，呢套嘢都真係幾 YAOI 。

首先，劇情幾乎係零。其實都唔係無嘅，咪一見鐘情→曖昩→告白→交往→扭計→氹返→冷戰→無事→完。而當中啲「→」嘅緣由同過程基本上一係可以無視，一係老套到核爆。總之睇呢套嘢就好似睇緊啲廿幾年前嘅少女漫畫咁，不過由男女變咗男男。真係悶到爆炸。就算主角換做男女或者女女我都係咁話。

然後，兩個主角係咁話「鍾意」「鍾意」「鍾意」，我又睇唔出套戲點表達佢哋鍾意對方，除咗三下唔埋兩下就 French kiss 之外……講真吖，我覺得《秒速五厘米》第一章嗰兩個小學雞嘅「愛情」都仲深刻啲。我一邊睇兩個男主角喺度伸舌，一邊諗：「原來啲腐女鍾意睇呢啲……」我想講我身為一個宅男都無乜睇過啲動畫每十幾分鐘就有一男一女喺度打晒茄輪。除咗 H 動。果然腐女嘅 level 係比較高嘅。

最後個結局，好平淡，極大路，睇完嘅感覺就係「哦」。兩條友其實咩嘢問題都無解決到，實行「憑著愛，我信有出路」。

所以呢套嘢我將佢睇成係「賣慾賣萌」番。啲吻戲呀抱抱呀摸脊骨呀啲腐女應該睇得幾興奮（雖然現場無尖叫），可能嫌唔夠喉（ sorry 套戲唔是 18 禁）。講萌，我估眼鏡君啲舉止喺腐女眼中應該算係萌掛……？（ Sorry 望住兩個男人面紅我真係一啲感覺都無。）加上金毛嘅聲優係神谷，我諗佢哋應該幾開心。

完場之後聽到有女觀眾講：「我一直以為金毛君係攻眼鏡君係受，點知原來金毛君攻又係佢，受又係佢喎～～」我心諗：「金毛君唔係得最後嗰兩幕弱勢咗少少咋咩，咁就變埋受啦……？咁眼鏡君係攻定受？定係無？」

‪#‎価値観が変わりました‬