《我已經靈魂出竅千次》

‪#‎深夜廢噏‬ 論品味之差，喺朋輩之中我認第二冇人敢認第一。

小說散文嘅文筆、用字，歌曲嘅舞蹈，唱功、舞姿、聲線，電視電影，演員、劇情、角色設定、對白、燈光、道具，我通通都冇要求。作品同我之間，永遠有無數濾走雜質嘅篱，將污水重重過濾，變返清徹。世上一切事物進入我意識之前，我會自動修補－－喺好多人心目中係一種殘疾嚟嘅。福爾摩斯成日話人 see but not observe，正正就係講我。我就係冇咗observe嘅能力，淨係得see。不過我樂天知命，甘於see而不見。我嘅意識喺過濾網之後，意味住我可以無視表達嘅方式手法，可以全心欣賞故事內容。舖排幾亂，表達點差，都唔影響我欣賞故事嘅心。只要有故事喺入面，我就受故事牽引。

受牽引並非單純掛住睇，唔理細節咁簡單。睇每套電視劇，就算係愛回家，就算係印度嘅300集長篇婆媳糾紛劇，就算係日式嘅浮誇、韓式嘅獵奇，於我而言，都係即時嘅人物代入遊戲：對白之間，我嘅靈魂會進入每個角色嘅心緒，主角、閒角、茄喱啡，每字每句，都牽引住我嘅情緒。睇《三國演義》我會想像每個人嘅心路歷程：諸候、武將、送信嘅使者、覆命嘅軍士、街上嘅平民，交談之際、生死關頭、焚香沐浴、食飯開餐，冇一樣唔喺我嘅想像版圖入面。睇《富貴逼人》一家中jackpot，我會聯想到暴發生活嘅情景，驃叔繼續工作嘅意義，驃嫂富婆同師奶身份嘅衝突，帶弟點拍拖，來弟點成長等等。甚至簡單如伙記倒瀉嘢，我都會翻帶到佢見工嗰日，會飛到鏡頭以外諗到佢頭耷耷俾人鬧，諗到佢執嘢掃地嘅情景。故事隨時間推進，腦內世界就噉樣幾何級數噉構築起嚟。

心理學有個講法叫 Theory of mind ，可以叫「換位思考」，又譯做「同理心」，我睇戲睇書嘅時候，可能就係半秒換廿個位，顯然係同理心過剩嘅象徵。不過處理太多人太多事，腦緒 (thread) 會應接不暇。百佳漏汁，尚且過百個角度描述；睇電視故事太忙，一齣半個鐘，我已經靈魂出竅千次。就算個故事本身係平舖直敍一條線，到我處都變成立體，甚至係四次元嘅空間。

觀察細節，係評論家嘅事，感受故事，我已經滿足。

失去咗觀察嘅能力，換返個污水變清泉、平面變立體嘅天賦；犧牲品味但係學識另類欣賞，幾抵吖。